“17–23 abril. Mateo 18; Lukas 10: “K‘a‘ru tinb‘aanu re naq tweechani li junelik yu‘am?,” ” Kim, Taaqehin—Choq‘ re li Dominkil Tzoleb‘aal: Li Ak‘ Chaq‘rab‘ 2023 (2022)
“17–23 abril. Mateo 18; Lukas 10,“ Kim, Taaqehin—Choq’ re li Dominkil Tzoleb’aal 2023
Li chaab‘il aj Samaria, xb‘aan laj Dan Burr
17–23 abril
Mateo 18; Lukas 10
“K‘a‘ru tinb‘aanu re naq tweechani li junelik yu‘am?”
Il ru Mateo 18 ut Lukas 10, ut tz’iib’a li na’leb’ nakak’ul rik’in li Musiq’ej. Naq nakak‘ul li musiq‘anb‘il na‘leb‘, naru taapatz‘, jo‘ xye li Elder Richard G. Scott, “Ma wan chik li tento tinnaw?” (“Cómo obtener guía espiritual,” Liahona, noviembre 2009, 8).
Xkanab‘ankileb‘ chi wotzok
Sa’eb’ li ch’ol a’in wan li k’a’ru k’utb’il sa’ li evangelio li jalan wi’ rik’in li k’a’ru k’utb’il chiqu xb’aan li ruchich’och’. Eb‘ li komon maare naru neke‘xwotz junjunq eetalil li xe‘xtaw naq xe‘tzolok chiru li xamaan a‘in. Chan ru naq nokorosob‘tesi li Qaawa‘ naq neke‘qak‘e chi k‘anjelak lix k‘utum sa‘ li qayu‘am?
Xk’utb’al li tzol’leb’
Tento taqakuyeb’ xmaak li qas qiitz’in wi naqaj naq taakuye’q qamaak xb’aan li Qaawa’.
-
Chan ru naru taawoksi li jaljookil ru aatin chirix li moos li ink’a’ ki’uxtaanank-u re xk’eeb’aleb’ xch’ool li komon sa’ li tzoleb’aal re te’kuyuq maak? Maare tatruuq chixtz’iib’ankileb’ li patz’om jo’ li wahi’ chiru li pizarron ut taab’oqeb’ li komon chixk’oxlankileb’ naq jun reheb’ yoo chixyaab’asinkil li jaljookil ru aatin: Ani li awa’b’ej sa’ li jaljookil ru aatin? Ani li moos li ink’a’ xkuyuk maak? Ani nareetali li ech aj moosil? K‘a‘ru nareetali li k‘as? Patz‘ reheb‘ li komon naq te‘xye li na‘leb‘ re li jaljookil ru aatin li naxtoch‘ xch‘ooleb‘. (Chi‘ilmanq ajwi‘ “Xkomon chik li k‘anjeleb‘aal.”)
-
Naru taaye reheb’ naq te’xk’oxla chan ru xyeeb’al chi ak’il li jaljookil ru aatin chirix li moos li ink’a’ ki’uxtaanank-u, li naxk’ut ajwi’ chirix li kuyuk maak jo’ chan raj ru taak’ulmanq sa’eb’ li kutan wanko wi’. (Naru te’xb’aanu li k’anjel a’in sa’ kok’ ch’uut.) Aatinanqex chirix chan ru naq li jaljookil ru aatin kixsume lix patz’om laj Pedro chirix jarub’ sut tento taakuyuq maak.
Li Jesus ki’aatinak chirix li tumin ut li k’as re qatzolb’al chirix li kuyuk maak.
Re xtawb’al li junelik yu’am, tento taqara li Dios ut eb’ li qas qiitz’in.
-
A’in jun li na’leb’ li naru naxtenq’aheb’ li komon sa’ li tzoleb’aal chixtawb’al ru chi ak’il li jaljookil ru aatin chirix li chaab’il aj Samaria: Kanab’eb’ chixk’oxlankil naq yookeb’ chixtz’ilb’al rix jun asalto ut robo sa’ li b’e naxik chalen Jerusalen toj Jeriko. Ye re junjunq komon sa’ li tzoleb’aal naq te’chalq chi kawresinb’il chi aatinak ruuchil junjunq reheb’ li ani wankeb’ sa’ li jaljookil ru aatin, ut k’a’ru ke’xb’aanu aran. K‘a‘ut ta wi‘ naq laj tij ut laj Levita ink‘a‘ ke‘xaqli chixtenq‘ankil li teneb‘anbil winq? K’a’ut naq kixaqli laj Samaria? K’a’ chik ru li na’leb’ naru chixyeeb’al laj eechal ochochnal? K‘a‘ ta wi‘ ru kireek‘a li winq tenb‘il chirixeb‘ li wiib‘ chi kristiaan ink‘a‘ ke‘tenq‘an re? K’e reetal naq li seraq’ tixwaklesiheb’ xch’ool li komon sa’ li tzoleb’aal chi wank jo’ li chaab’il aj Samaria ut jo’ laj eechal ochochnal, ut naq ink’a’ te’wanq jo’ laj tij ut laj Levita.
-
Chan ru naq li jaljookil ru aatin chirix li chaab‘il aj Samaria naxsumeheb‘ li patz‘om naxye li Jesus sa‘ Lukas 10:25–29? Patz‘ reheb‘ li komon naq te‘aatinaq chirix junaq hoonal b‘ar wi‘ ke‘reek‘a naq, jo‘ li winq a‘an, (raqal 30) ke‘raj ru xtenq‘ankileb‘. Chan ru naq xe’xk’ul xtenq’ankileb’? Chan ru naq laa’o jo’ komon sa’ li teep tooruuq chi k’anjelak sa’ komonil re xtenq’ankileb’ li qas qiitz’in, jo’ chanru ke’xb’aanu laj Samaria ut laj eechal ochochnal?
Naqasik‘ ru “li jwal chaab‘il” naq naqasik‘ ru xb‘aanunkil wulaj wulaj li k‘a‘ru nak‘amok sa‘ li junelik yu‘am.
-
Chirix rilb‘al Lukas 10:38–42 sa‘ komonil, naru taapatz‘ reheb‘ li komon chan raj ru xe‘xk‘ul li raatin li Kolonel wi ta wankeb‘ sa‘ xna‘aj li xMarta. Chan ru naq a’in maare tixjal raj li k’a’ru te’xsik’ ru chirix a’an? Chan ru taqanaw k‘a‘ru li naraj xkomon xhoonal ut rilb‘al sa‘ li qayu‘am? Eb‘ li komon naru neke‘xtzol li raatin li Awa‘b‘ej Dallin H. Oaks “Bueno, Mejor, Excelente” (Liahona, noviembre 2007, 104–108) re xsik‘b‘aleb‘ xkomon xna‘leb‘.
Xkomon chik li k‘anjeleb‘aal
Eb‘ li k‘as sa‘ li jaljookil ru aatin re li moos maak‘a‘ ruxtaan.
Sa‘ aatinak chirix li k‘as sa‘ li jaljookil ru aatin re li moos maak‘a‘ ruxtaan, li Elder Jeffrey R. Holland kixye:
“Jalan jalan neke‘xye li wankeb‘ xnawom chirix jo‘k‘ihal xteram li tumin yeeb‘il resil arin—ut chekuy inmaak naq nawoksi lix tuminal Estados Unidos—a‘b‘an re xch‘olob‘ankil chi ink‘a‘ ch‘a‘aj, wi ta li k‘as li jwal b‘ab‘ay aj jun cient denario li ink‘a‘ kikuye‘, qayehaq raj naq a‘an jun cient dolar, jo‘kan naq li k‘as 10,000 talento li kikuye‘ maare a‘an raj lajeeb‘ mil millon chi dolar—malaj naab‘al chik!
“Jo‘ jun li k‘as, k‘a‘jo‘ xk‘ihal li tumin a‘an, li maare naxsachb‘esi qach‘ool. (Maa‘ani li naxik chi loq‘ok naxsach ta raj k‘a‘jo‘ xk‘ihal li tumin!) Anajwan, li rajom li jaljookil ru aatin, a‘an naq taasachq raj qach‘ool; a‘an naq toj reetal ink‘a‘ raj taqataw ru, ut jun chik naq moko tooruuq ta raj chixtojb‘al li k‘as a‘an. A‘an xb‘aan naq moko a‘in ta jun seraq‘ chirix wiib‘eb‘ li moos li neke‘xwech‘i rib‘ sa‘ li Ak‘ Chaq‘rab‘. A‘an jun seraq‘ chiqix laa‘o, lix junkab‘al li t‘anenaqil winqilal, chixjunileb‘ li wankeb‘ xk‘as, laj maak ut eb‘ li wankeb‘ sa‘ tz‘alam. Chiqajunilo laa‘o aj k‘as, ut li k‘a‘ru teneb‘anb‘il sa‘ qab‘een a‘an k‘ehe‘k sa‘ tz‘alam. Ut nokowan raj aran wi ta maak‘a‘ raj li rusilal li qaRey li koorach‘ab‘ xb‘aan naq nokoxra ut “naxtoq‘ob‘a qu” [Tzol‘leb‘ ut Sumwank 121:4]” (“Tz‘aqalaq eere eeru—junaq kutan,” Jolomil ch‘utub‘aj-ib‘ re octubre 2017).
Xchaab’ilob’resinkil li qak’utum
B’aanu jo’ kixb’aanu li Kolonel. Naq nakawil ru resil chan ru naq kik’utuk li Kolonel sa’ li Ak’ Chaq’rab’, sik’ li na’leb’ sa’ lix b’aanuhom li taatenq’anq aawe chi k’utuk chi jwal chaab’il wi’chik. Jo’ jun eetalil, sa’ Lukas 10:25–37, k’a’ru kixb’aanu li Jesus re xk’utb’al chiru laj na’ol chaq’rab’ chirix chan ru xk’ulb’al li junelik yu’am?