“3–9 abril. Li Paswa: “At kamk, b‘ar wank laa wankil?,” ” Kim, Taaqehin—Choq‘ re li Dominkil Tzoleb‘aal: Li Ak‘ Chaq‘rab‘ 2023 (2022)
“3–9 abril. Li Paswa,” Kim, Taaqehin—Choq‘ re li Dominkil Tzoleb‘aal: 2023
3–9 abril
Li Paswa
“At kamk, b‘ar wank laa wankil?”
Naq nakakawresi aawib’ chi k’utuk chiru li xamaan a’in, k’oxla chan ru naq li seraq’ik sa’ laa tzoleb’aal sa’ li domingo re Paswa naru chixwaklesinkil li paab’aal chirix li Jesukristo ut lix tojb’al rix li maak xb’aan a’an.
Xkanab‘ankileb‘ chi wotzok
Patz’ reheb’ li komon chan raj ru te’xsume li patz’om jo’ “K’a’ru lix tojb’al rix li maak xb’aan li Jesukristo?“ ut “Chan ru naru tink’ul li osob’tesink rik’in lix tojb’al rix li maak xb’aan li Kristo?“ Patz‘ reheb‘ naq te‘xwotz junaq raqal reheb‘ li loq‘laj hu li xe‘ril chiru li xamaan li natenq‘an chixsumenkil li patz‘om a‘an.
Xk’utb’al li tzol’leb’
Li Jesukristo nokoxkol chiru li maak ut li kamk, nokoxkawob’resi sa’ xq’unal qu, ut naxk’ojob’ qach’ool sa’eb’ lix yalb’al qix.
-
Ma neke‘xtaw ru li komon naq li Jesus naxk‘ojob‘ qach‘ool sa‘eb‘ lix yalb‘al qix, naq nokoxkawob‘resi sa‘ xq‘unal qametz‘ew, ut naq nokorach‘ab‘ chiru li maak ut chiru li kamk? Jun na‘leb‘ naru natenq‘an reheb‘ chixtawb‘al ru li na‘leb‘ a‘in, a‘an xtz‘iib‘ankileb‘ li aatin a‘in chiru li pizarron: Maak, Kamk, Xyalb‘al qix, Xq‘unal qametz‘ew. Ye re li junjunq chi komon naq taaril jun reheb‘ li raqal sa‘eb‘ li loq‘laj hu li neke‘tawman sa‘ “Xkomon chik li k‘anjeleb‘aal” ut tixk‘oxla chan ru naq li Kolonel nokoxtenq‘a chixq‘axb‘al ru malaj chixkuyb‘al li k‘a‘ru tz‘iib‘anb‘il. Eb‘ li komon naru te‘xtz‘iib‘a li k‘a‘ru neke‘xtzol sa‘eb‘ li raqal a‘in rub‘el li junjunq chi aatin, ut te‘xch‘olob‘ xyaalal li Kolonel ut lix tojb‘al rix li maak xb‘aan a‘an.
Jalam-uuchli Jesus chiru li krusXkamik chiru krus, xb‘aan li xLouise Parker
-
Maare jun ch’ina k’anjel taatenq’anq chixk’utb’al chan ru naq jalan wi’ li ch’aje’k chiru li maak rik’in tz’aqob’resiiq qe qu: Naru taatz’iib’a chiru li pizarron junjunq aatin sa’ xtiklajik Moroni 10:32a’ut taatz’iib’a chi ink’a’ us, ut chi wank xmajelal. Chirix a‘an patz‘ reheb‘ li komon naq te‘risi li k‘a‘ru ink‘a‘ us (chi ink‘a‘ te‘xtuqub‘ ru). Ma xtz’aqlok ru li ch’a’ajkilal rik’in a’in? K‘a‘ru na‘leb‘ naqatzol sa‘ li raqal a‘in ut sa‘ li ch‘ina k‘anjel a‘in chirix lix wankilal lix tojb‘al rix li maak choq‘ qe? Li raatin li Awa’b’ej Dieter F. Uchtdorf maare taaruuq ajwi’ chatenq’ankil: “Wi li kolb’a-ib’ ka’ajwi’ naraj naxye risinkil li qapaaltil ut li qamaak, jo’kan raj li kolb’a-ib’—us ta k’a’jo’ xchaab’ilal—moko naxtz’aqob’resi ta li rajom li qaYuwa’ choq’ qe. Li rajom q‘axal taqenaq chiru a‘in: a‘an naraj naq li ralal xk‘ajol te‘wulaq jo‘ chanchan a‘an” (“Li maatan re usilal,” Jolomil ch‘utub‘aj-ib‘ re abril 2015).
-
Wankeb‘ li seraq‘ ut li jaljookil ru aatin li neke‘ru chiqatenq‘ankil re taqataw ru lix tojb‘al rix li maak xb‘aan li Kristo. Naru nakawotz ajwi‘ jun seraq‘ malaj jun na‘leb‘ chirix jun reheb‘ li aatin xe‘yeeman sa‘ li jolomil ch‘utub‘aj-ib‘ li neke‘tawman sa‘ “Xkomon chik li k‘anjeleb‘aal.” Malaj ut texruuq chirilb’al sa’ komonil “Handel’s Messiah: Debtor’s Prison“ (LDS.org; chi’ilmanq resil sa’ “Xkomon chik li k’anjeleb’aal“) ut tex’aatinaq chirix chan ru naq lix tojb’al rix li maak xb’aan li Kristo nokoxkol chiru li tz’alam wanko wi’. Eb‘ li komon naru neke‘xwotz xna‘leb‘ malaj reek‘ahomeb‘ chirix li Kolonel ut lix tojb‘al rix li maak choq‘ qe.
Mateo 28:1–10; Lukas 24:13–35; Jwan 20:1–29; 1 Korintios 15:3–8, 55–58
Wankeb’ laj yehol nawom sa’ li Ak’ Chaq’rab’ li ke’xch’olob’ xyaalal naq li Jesukristo kixq’ax ru li kamk.
-
Naru taak’oxla xnumsinkil resil li xb’een Paswa sa’eb’ li loq’laj hu—naq kiwakli li Jesukristo chi yo’yo. Naru taatz’aama re jun komon sa’ li tzoleb’aal naq tixye resil a’an rik’in tz’aqal li raatin (chi’ilmanq Jwan 20:1–17). Naru ajwi‘ taak‘ut jun video chirix li Santil Hu, maare “Ha resucitado” (ChurchofJesusChrist.org).
-
Maare eb’ li komon jwal wi’chik naq te’xtaw ru k’a’ut naq aajeleb’ ru laj yehol nawom chirix lix waklijik li Jesukristo chi yo’yo wi te’xk’oxla naq a’aneb’ raj aj ch’olob’anel chaq’rab’ malaj aj periodista li yookeb’ chixtz’ilb’al rix ma yaal naq kiwakli li Kristo chi yo’yo. Ye reheb’ naq te’xtaw ani sa’eb’ li loq’laj hu te’ruuq chi wank choq’ aj yehol nawom chirix (chi’ilmanq Mateo 28:1–10; Lukas 24:13–35; Jwan 20:19–29; 1 Korintios 15:3–8, 55–58). Te’ruuq ajwi’ chixtz’iib’ankil jun ch’ina esil chirix k’a’ raj ru te’xye li kristiaan a’in wi ta te’ch’olob’anq sa’ jun raqleb’aal aatin, malaj naq te’xye resil choq’ re jun periodico.
-
Jun na’leb’ re taachamo’q li qanawom chirix lix waklijik li Kolonel chi yo’yo a’an xk’oxlankil chan ru naq laa’o taqak’ut raj li qapaab’aal chiruheb’ li jun ch’ol chik. Chan raj ru te’xch’olob’ li komon lix nawomeb’ xch’ool chirix li Jesukristo wi ta te’xk’ul a’in: wi jun komon sa’ lix junkab’aleb’ xk’ul jun nimla yajel; wi jun ramiiw xkam jun lix komon; wi jun rech kab’al xpatz’ k’a’ut naq nakanima li Paswa. Waklesi xch‘ooleb‘ chirilb‘aleb‘ raqal sa‘eb‘ li loq‘laj hu (jo‘ li wankeb‘ sa‘ “Xkomon chik li k‘anjelb‘aal”) naq neke‘xk‘oxla chan raj ru te‘xsume. Kanab‘eb‘ junjunq li komon sa‘ li tzoleb‘aal chixyeeb‘al lix k‘oxlahomeb‘.
Xkomon chik li k‘anjeleb‘aal
Eb‘ li raqal sa‘eb‘ li loq‘laj hu chirix lix tojb‘al rix li maak xb‘aan li Kolonel.
Eb‘ li aatin chirix lix tojb‘al rix li maak xb‘aan li Kolonel.
-
Dale G. Renlund, “Chek‘oxla lix chaab‘ilal ut lix nimal ru li Dios,” Jolomil ch‘utub‘aj-ib‘ re abril 2020
-
Gerrit W. Gong, “Li Chaab‘il aj Ilol Karneer, lix Karneer li Dios,” Jolomil ch‘utub‘aj-ib‘ re abril 2019
-
Sharon Eubank, “Li Kristo: Li saqen li nalemtz‘un sa‘ q‘ojyin,” Jolomil ch‘utub‘aj-ib‘ re abril 2019.
-
Cristina B. Franco, “Lix wankilal li Jesukristo re k‘irtesink,” Jolomil ch‘utub‘aj-ib‘ re octubre 2020
Xchaab‘ilob‘resinkil li qak‘utum
Chatwanq choq‘ k‘anjeleb‘aal sa‘ ruq‘ li Musiq‘ej. “Laa k‘anjel jo‘ aj k‘utunel maawa‘ xk‘utb‘al jun tzolok q‘axal chaab‘il, a‘an b‘an xtenq‘ankil jalaneb‘ chixk‘ulb‘al xwankil li Santil Musiq‘ej, a‘ li tz‘aqal aj k‘utunel” (Li k‘utuk jo‘ li Kolonel, 10).