“10–16 abril. Mateo 15–17; Markos 7–9: “Laa‘at li Kristo,” ” Kim, Taaqehin—Choq‘ re li Dominkil Tzoleb‘aal: Li Ak‘ Chaq‘rab‘ 2023 (2022)
“10–16 abril. Mateo 15–17; Markos 7–9,” Kim, Taaqehin—Choq‘ re li Dominkil Tzoleb‘aal: 2023
Li jaltesiik ru, xb‘aan laj Carl Heinrich Bloch
10–16 abril
Mateo 15–17; Markos 7–9
“Laa‘at li Kristo”
Jun reheb‘ tz‘aqal laa wajom jo‘ aj k‘utunel a‘an xtenq‘ankileb‘ li komon chixnimob‘resinkil lix paab‘aal chirix li Jesukristo. Chiwanq a‘in sa‘ aak‘a‘uxl naq nakatzoleb‘ li loq‘laj hu chiru li xamaan a‘in. K‘a‘ru na‘leb‘ nakataw li naru naxtenq‘aheb‘ li komon chixnimob‘resinkil xpaab‘aaleb‘ chirix li Qaawa‘?
Xkanab‘ankileb‘ chi wotzok
Jun na‘leb‘ re xwaklesinkileb‘ xch‘ool li komon chixtzolb‘aleb‘ li loq‘laj hu xjuneseb‘ ut rik‘in lix junkab‘aleb‘, a‘an xpatz‘b‘al reheb‘ rajlal xamaan naq te‘xwotz chan ru naq yookeb‘ chi osob‘tesiik ut yookeb‘ chixk‘ulb‘al k‘utb‘esinb‘il na‘leb‘ xb‘aan xtzolb‘aleb‘ li loq‘laj hu. Chan ru naq najala xb‘aanuhomeb‘ chiru li xamaan a‘in xb‘aan li na‘leb‘ xe‘xtzol sa‘eb‘ li ch‘ol a‘in?
Xk’utb’al li tzol’leb’
Nachal xnawom qach‘ool chirix li Kristo chi k‘utb‘esinb‘il.
-
Ma x’ajman ru chiru junaq komon sa’ laa tzoleb’aal naq tixch’olob’ chiru anihaq chan ru naq naxnaw naq yaal li evangelio? Sa’ Mateo 16:13–17, k’a’ru kixk’ut li Kolonel chirix chan ru naq naqak’ul lix nawom qach’ool? Naru taawotz chan ru naq laj Alma kixk‘ul lix nawom xch‘ool (chi‘ilmanq Alma 5:45–46) malaj li k‘a‘ru kixk‘ut li Qaawa‘ chiru laj Oliver Cowdery chirix li k‘utb‘esink (chi‘ilmanq Tzol‘leb‘ ut Sumwank 6:14–15, 22–23; 8:2–3). K’a’ raj ru nakak’oxla naq kixye laj Pedro malaj laj Alma malaj laj Oliver Cowdery wi ta wan ani kipatz’ok reheb’ chan ru naq neke’xnaw naq yaal li evangelio?
-
Ma wankeb’ tana’ li komon sa’ laa tzoleb’aal li yookeb’ chi tijok re xk’ulb’al li k’utb’esinb’il na’leb’, a’ut ink’a’ neke’xnaw chan ru naq te’xnaw ru naq neke’xk’ul? Sa‘ HearHim.ChurchofJesusChrist.org, neke‘tawman video b‘ar wi‘ eb‘ laj jolominel sa‘ li Iglees neke‘xwotz chan ru naq neke‘rab‘i lix yaab‘ xkux li Qaawa‘. Naru taak‘ut jun malaj junjunq reheb‘ li video a‘an sa‘ li tzoleb‘aal ut tex‘aatinaq chirix li neke‘xk‘ut chirix xk‘ulb‘al li k‘utb‘esinb‘il na‘leb‘. K‘a‘ chik ru chi na‘leb‘ malaj raqal sa‘eb‘ li loq‘laj hu najultiko‘ reheb‘ li komon li taatenq‘anq re anihaq chixk‘eeb‘al reetal li k‘utb‘esinb‘il na‘leb‘ naxk‘ul? (Jo‘ eetalil, chi‘ilmanq 1 Reyes 19:11–12; Galatas 5:22–23; Enos 1:1–8; Tzol‘leb‘ ut Sumwank 6:22–24; 8:2–3; 9:7–9.)
Eb’ lix laawil li tijonelil aajeleb’ ru choq’ re li qakolb’al.
-
Re xtikib‘ankil aatinak chirixeb‘ lix laawil li tijonelil, naru nakatz‘iib‘aheb‘ li raqal a‘in chiru li pizarron: Mateo 16:19; Tzol‘leb‘ ut Sumwank 107:18–20; 128:8–11; 132:18–19, 59; Jose Smith—Resilal 11:72; and “Xlaawil li tijonelil” sa‘ li K‘utul Raqal reheb‘ li Loq‘laj Hu). Chirix a‘an patz‘ reheb‘ li komon naq te‘ril jun malaj junjunq reheb‘ li raqal ut te‘xwotz junaq na‘leb‘ neke‘xtzol aran chirixeb‘ lix laawil li tijonelil. K‘a‘ut naq neke‘qaj ru lix laawil li tijonelil?
-
Re xtenq‘ankileb‘ li komon chixkawob‘resinkil lix nawom xch‘ooleb‘ chirix lix k‘ojob‘ankil wi‘chik lix laawil li tijonelil sa‘ roso‘jikeb‘ li kutan, naru taapatz‘ reheb‘ li xyiijach li komon naq te‘ril Mateo 17:1–9 ut li jun jachal chik te‘ril Tzol‘leb‘ ut Sumwank 110. Chirix a’an te’ruuq chixwotzb’al chirib’ileb’ rib’ li k’a’ru xe’xtzol, ut te’xk’e reetal chan ru naq juntaq’eeteb’ li wiib’ chi esil. Li video “Las llaves del sacerdocio: La restauración de las llaves del sacerdocio” (ChurchofJesusChrist.org) naru ajwi‘ natenq‘an.
Eb‘ lix laawil li tijonelil, a‘aneb‘ li wankilal chixb‘eresinkil lix k‘anjel li tijonelil.
Naq naqayal qaq‘e chixnimob‘resinkil qapaab‘aal, naqatikib‘ rik‘in li qapaab‘aal ak wan.
-
Li Elder Jeffrey R. Holland kixye resil jun yuwa‘b‘ej li kiraj naq taak‘iraaq li ralal re xk‘utb‘al chan ru naq tento taqajilosi qib‘ rik‘in li Qaawa‘ naq naqeek‘a naq moko tz‘aqal ta qapaab‘aal (chi‘ilmanq “Creo,” Liahona, mayo 2013, 93–95). Chirix rilb‘al Markos 9:14–30, naru tex‘aatinaq chirix li oxib‘ chi na‘leb‘ naxwotz li Elder Holland (chi‘ilmanq “Xkomon chik li k‘anjeleb‘aal”).
Xkomon chik li k‘anjeleb‘aal
Oxib’ li na’leb’ nokohe’xtenq’a chixtawb’al chik li qapaab’aal.
Chirix xyeeb’al li esil li natawman sa’ Markos 9:14–29, li Elder Jeffrey R. Holland kixye:
“Li xb’een na’leb’ chirix li esil a’in a’an naq sa’ xk’eeb’al reetal lix ch’a’ajkilal chirix li paab’aal, li yuwa’b’ej xb’een wa kixye resil li wan wi’ xkawilal, ut ka’ajwi’ chirix a’an kixye resil lix majelal. Li xb’een raatin ki’el sa’ junpaat, ut kixch’olob’ xyaalal lix paab’aal: “Qaawa’, ninpaab’.“ Nawaj xyeeb’al re chixjunileb’ li neke’raj chik xpaab’aaleb’, chijultiko’q eere li winq a’in! Sa‘ xhoonal li xiw, malaj xwiib‘al eech‘ool, malaj ch‘a‘ajkilal, xaqab‘omaq eerib‘ sa‘ xb‘een li k‘a‘ru ak xek‘ul, us ta moko nim ta a‘an. …
“Li xkab’ na’leb’ chanchan li xb’een, us ta jalb’il b’ayaq ru. Naq nachal li ch’a’ajkilal ut neke’wakli li patz’om, meetikib’ xsik’b’al eepaab’aal rik’in xyeeb’al jo’ nimal li maak’a’ eere, xb’aan a’an ajwi’ li tiklaak rik’in xmaak’a’il lee paab’aal. … Ink’a’ yookin chixyeeb’al naq teeb’aanu eerib’ jo’ wan eepaab’aal naq maak’a’. Yookin b‘an chixyeeb‘al naq texwanq chi tiik eeru rik‘in li paab‘aal li ak wan eere. …
“Li rox na’leb’: Naq nachal li ch’a’ajkilal malaj xkab’il rix laa ch’ool, matxuwak chixpatz’b’al aatenq’ankil. Wi jwal naqaj rik‘in tuulanil ut chi maak‘a‘ qab‘alaq‘ jo‘ li yuwa‘b‘ej a‘in, naru naqak‘ul” (“Creo,” Liahona, mayo 2013, 93–94).
Xchaab‘ilob‘resinkil li qak‘utum
Oksiheb‘ li patz‘om li neke‘b‘oqok chi ch‘olob‘ank. Wi nakapatz’eb’ li patz’om li neke’xk’eheb’ xch’ool li komon chixyeeb’al lix nawomeb’ xch’ool, a’an naru chixk’eeb’al xb’oqb’al li Musiq’ej. Jo’ jun eetalil, naq nekex’aatinak chirix Mateo 16:13–17, taaruuq raj taapatz’, “K’a’ru xetzol chirix li Kolonel li xkawob’resi lix nawom eech’ool naq a’an li Kolonel?“ (Chi‘ilmanq Li k‘utuk jo‘ li Kolonel32