“8–14 Mei. Matiu 19–20; Mak 10; Luk 18: ‘?Wanem Samting Moa I Stap, we Mi Mi No Mekem Yet?,’” Kam Folem Mi—Blong Sandei Skul: Niu Testeman 2023 (2022)
“8–14 Mei. Matiu 19–20; Mak 10; Luk 18,” Kam Folem Mi—Blong Sandei Skul: 2023
8–14 Mei
Matiu 19–20; Mak 10; Luk 18
“?Wanem Samting Moa I Stap, we Mi Mi No Mekem Yet?”
Taem yu stap rere blong tij, wetem prea tingting blong olsem wanem yu save helpem ol memba blong klas oli serem wanem oli lanem long taem blong stadi blong olgetawan.
Invaetem Ol Memba blong Serem Wanem Oli Gat
Maet bae i help blong wanwan taem toktok raon long eksperiens blong ol memba blong klas abaot gospel i senta long hom. ?Wanem ol eksperiens long saed blong sakses we oli save serem? ?Wanem jalenj o ol rod blok we oli stap fesem? ?Wanem advaes nao oli save givim long olgeta wanwan?
Stap Tijim Doktrin
Mared bitwin man mo woman i stamba tingting blong God long plan blong Hem we i no save finis.
-
Plante tingting long saed blong mared tedei long wol, oli seraot long trutok we i no save finis. Blong helpem klas blong yu blong lanem abaot ol tingting blong God long saed blong mared, yu save invaetem olgeta blong ridim Matiu 19:3–9 mo blong mekem wan lis, antap long bod, blong ol trutok ia we oli faenem abaot mared. Oli save mekem wan lis tu blong ol trutok we oli faenem insaed long o skripja ia: Jenesis 1:27–28; 1 Korin 11:11; Doktrin mo Ol Kavenan 42:22; 49:15–17; 131:1–4; 132:19; mo Moses 3:18, 21–24. ?Olsem wanem nao ol trutok ia oli ripitim long “Famle: Wan Ofisol Toktok I Go long Wol”? (ChurchofJesusChrist.org/study/lib?lang=bis
Evriwan i save kasem blesing blong laef we i no save finis, nomata wanem taem oli kasem gospel.
-
?Wanem i save helpem ol memba blong klas blong yu blong oli praktisim ol prinsipol we i stap long parabol blong ol wokman blong plantesen? Maet yu save invaetem sam memba blong klas blong rere long wan drama blong parabol ia blong soemaot long klas. Afta long presentesen, olgeta we oli aktem ol wokman oli save serem olsem wanem oli filim abaot mane we oli kasem mo from wanem. ?Wanem nao parabol ia i talem abaot kingdom blong heven? ?Wanem sam narafala tingting we yumi save kasem abaot parabol ia long mesej blong Elda Jeffrey R. Holland “The Laborers in the Vineyard”? (Liahona, May 2012, 31–33).
Sevya bae i lidim yumi go moa kolosap long Hem taem yumi askem help blong Hem.
-
?Olsem wanem yu save helpem ol memba blong klas blong oli luksave mo laef folem ol prinsipol long stori blong yangfala rijman ia? Wan long ol samting i blong askem olgeta blong ridim Mak 10:17–27 mo tingting sapos oli bin eva filim olsem yang rijman ia. ?Wanem nao i helpem yumi blong folem toktok blong Sevya, iven taem yumi faenem i had blong mekem? Ol memba blong klas maet oli wantem blong serem ol eksperiens taem we oli askem olgetawan “?Wanem nao mi gat yet blong mekem?” (Matiu 19:20) mo kasem toktok blong spirit blong save kam moa gud. Blong helpem ol memba blong klas we maet tingting blong olgeta i kam slak taem oli stap lukluk nomo long wanem we oli no mekem yet, yu save serem long olgeta toktok we i stap long “Sam Moa Risos.”
-
Ol memba blong klas oli save ridim wan mesej blong konfrens we i go wetem ol ves we oli stap long Kam Folem Mi—Blong Wanwan Man, Woman mo Famli.. Invaetem olgeta blong serem wanem ol lanem.
Man blong tekem takis we i gat fasin blong sakem sin mo Farisi we i bilif strong se fasin blong hem i stret gud insaed long Tempol, i kam long Frank Adams
Yumi mas trastem bigfala sore blong God, be i no stret mo gudfasin blong yumiwan.
-
Parabol blong Sevya we i komperem prea blong Farisi wetem man blong tekem takis i save helpem yu blong luksave fasin we Lod i stap askem long olgeta we oli stap lukaotem blong folem Hem. Blong helpem ol memba blong klas blong praktisim parabol ia long dei blong yumi, yu save askem olgeta blong raetem bakegen prea blong Farisi folem ol samting we i stap hapen tedei be long sem fasin. Oli save mekem sem samting wetem prea blong man blong tekem takis mo afta serem wanem oli bin raetem. ?Olsem wanem nao ves 15–17 mo 18–24 i go wetem wanem Sevya i tijim long parabol ia? Maet yu save serem ol toktok ia tu we i kam long Elda Dale G. Renlund wei go wetem ol ves ia: “Mesej blong yumi long ples ia i klia: wan man blong sin we i stap sakem sin, i kam kolosap long God bitim man we i bilif strong se fasin blong hem i stret gud we i lukluk rabis long man blong sin” (“Our Good Shepherd,” Liahona, May 2017, 31).
Sam Moa Risos
Letem yumi no tingting se i naf ia nao mi stop ia o tingting daon long yumi.
Elda D. Todd Christofferson i tijim:
“Sapos yumi askem wetem wan tru hat, ‘Wanem samting moa i stap we mi mi no mekem yet?’ [God] bae i no lego yumi stap traem ges nomo, be wetem lav bae Hem i givim ansa blong mekem yumi hapi. Mo bambae Hem i givim hop long yumi.
“Hem i wan wok we i karem plante traehad, mo bae i mekem yumi kam fraet bigwan sapos yumi stap traehad blong kam tabu yumiwan. Trutok we i naes tumas i we yumi no stap yumiwan. Yumi gat lav blong God, gladhat blong Kraes, Tabu Spirit i lidim mo kamfotem yumi, mo felosip mo fasin blong leftemap tingting blong ol Sent we oli wan long bodi blong Kraes. Letem yumi no tingting se yumi oraet long wea ples yumi stap long hem naoia, mo tu no putum yumi daon” (“The Living Bread Which Came Down from Heaven,” Liahona, Nov. 2017, 39).
Kam Antap long Fasin blong Yumi blong Stap Tij
God i nidim ol talen blong yuwan mo ol samting we yu save mekem. “Yu save blesem ol pikinini blong God tru long lav we yu gat long narafala man, ol presen we God i bin givim long yu, mo eksperiens long laef blong yu. Taem yu stap fetful blong givim seves mo stap lukaotem help blong God, bae Hem i blesem yu, mo bae yu gro long wanem we yu gat blong tijim gospel long wei blong Sevya” (Teaching in the Savior’s Way, 5).