“22–28 Mei. Josef Smit—Matiu 1; Matiu 24–25; Mak 12–13; Luk 21: ‘Pikinini blong Man Bae I Kam,’” Kam Folem Mi—Blong Sandei Skul: Niu Testeman 2023 (2022)
“22–28 Mei. Josef Smit—Matiu 1; Matiu 24–25; Mak 12–13; Luk 21,” Kam Folem Mi—Blong Sandei Skul: 2023
Seken Kaming, i kam long Harry Anderson
22–28 Mei
Josef Smit—Matiu 1; Matiu 24–25; Mak 12–13; Luk 21
“Pikinini blong Man Bae I Kam”
Blong mekem yu rere blong tij, tingbaot blong prea mo ridim gud Josef Smit—Matiu 1; Matiu 24–25; Mak 12–13; mo Luk 21. Lukaotem insperesen long taem blong stadi blong yuwan, mo afta stadi long lesen ia blong gat moa aedia.
Invaetem Ol Memba blong Serem Wanem Oli Gat
Raetem long bod, wan lis blong ol parabol blong Sevya we i stap long riding blong wik ia olsem, olif tri, gudfala man mo man blong stil, gud mo nogud wokman, ten yangfala gel, ol talen, mo ol sipsip mo nani. Askem ol memba blong oli serem ol trutok we oli bin lanem insaed long ol parabol ia we i save helpem olgeta oli rere from Seken Kaming blong Lod. ?Wanem nao oli bin mekem blong wok folem ol trutok ia long laef blong olgeta?
Stap Tijim Doktrin
Ol profesi abaot Seken Kaming blong Sevya i save helpem yumi fesem fiuja wetem fet.
-
Ol saen blong Seken Kaming, maet i had long sam memba blong klas blong oli andastanem. Wok long grup i save helpem olgeta blong faenemaot ol saen we i stap long Josef Smit—Matiu 1:21–37. Blong helpem olgeta andastanem moa gud, maet yu wantem blong komperem ol saen ia wetem ol rod saen. ?From wanem ol rod saen oli impoten? ?Olsem wanem nao ol saen blong Seken Kaming, i olsem ol rod saen? ?Long wanem wei nao oli defren? Yu save givim long wanwan grup ol pis pepa we oli sep olsem ol rod saen mo invaetem olgeta blong raet long wanwan pepa ia, wan saen we bae i hapen bifo Seken Kaming. Askem olgeta blong serem wanem oli faenem, mo invaetem klas blong toktok raon long pruf blong ol saen ia we i stap hapen long wol tudei.
Josef Smit—Matiu 1:26–27, 38–55; Matiu 25:1–13
Yumi mas rere oltaem long Seken Kaming blong Sevya.
-
Ol parabol insaed long Josef Smit—Matiu 1:26–27, 38–55 mo Matiu 25:1–13 i save helpem ol memba blong klas blong luk save se i impoten blong stap rere from Seken Kaming. Invaetem ol memba blong klas blong luklukgud long ol ves ia mo serem wanem oli filim Sevya i invaetem yumi blong mekem. Elda David A. Bednar i givim wan intepretesen blong ol ten yangfala gel we i save help (luk long “Sam Moa Risos”). ?From wanem fasin blong jenisim laef i wan eksperiens we wanwan long yumi i mas eksperiensem? ?Olsem wanem nao yumi mekem hemia? ?Wanem nao Doktrin mo Ol Kavenan 45:56-57 i ademap long save blong yumi abaot parabol ia?
-
Taem yu lanem abaot kambak blong Sevya, maet yu wantem blong rid o singsing tugeta abaot Seken Kaming (luk long “Jesus Christ—Second Coming” long topical index long bak blong hymbuk).
Long Las Jajmen, bae yumi givim long Lod wan ripot blong ol laef blong yumi.
-
Parabol blong ol talen mo parabol blong ol sipsip mo nani, i save givim long yumi insperesen abaot ripot blong ol laef blong yumi, we bae yumi givim long Lod long taem blong Las Jajmen. Maet yu save ridim ol parabol ia tugeta mo invaetem wanwan klas memba blong serem wan kwestin we Sevya bae i save askem yumi long hem long taem blong jajmen. Givim taem long ol memba blong klas blong mekem ol plan long ol wei blong wanem blong mekem long ol save we oli kasem long taem storian raon long lesen.
Pikjaol sipsip mo ol naniKraes i yusum ol sipsip mo ol nani blong tij abaot Las Jajmen (luk long Matiu 25:31–33).
-
Blong gat wan storian we i gat insperesen abaot Matiu 25:34–40, yu save invaetem ol memba blong klas blong serem ol eksampol we i stap insaed long ol ves ia abaot ol pipol we oli soem bigfala sore. Givim taem long olgeta blong oli tingting hevi long huia maet i nidim seves blong olgeta. ?Wanem sam long ol wei we yumi save wok long hem blong fitim olgeta we oli hanggri, olgeta we oli neked, mo visitim olgeta we oli sik?
Sam Moa Risos
Oel blong jenisim laef.
Elda David A. Bednar i givim wan intepretesen blong parabol ia blong ol ten yangfala gel we i save help:
“Tingting lon oel olsem oel blong jenisim laef [luk long Matiu 25:4–9]. …
“?Ol faef yangfala gel ia, oli selfis mo oli no wantem serem samting, o oli stap soem stret se oel blong jenisim laef i no blong serem? ?Paoa ia long saed blong spirit we yu kasem tru long fasin blong stap obei long ol komanmen, yu save serem long wan narafala man? ?Save ia we yu kasem tru long fasin blong stadi had mo tingting hevi long ol skripja, yu save givim long wan we i stap long nid? ?Pis ia we gospel i karem i kam long wan Lata-dei Sent i save transfea i go long wan we i stap eksperiensem oposisen o bigfala jalenj? Klia ansa blong wanwan kwestin ia hem i no.
“Olsem ol yangfala gel ia oli talem gud moa klia, wanwan long yumi i mas ‘pem blong yumiwan.’ Ol woman ia we oli gat insperesen oli no stap talemaot wan fasin blong mekem bisnis; be, oli stap talemaot klia wanwan wok blong yumi blong kipim faea blong testemoni blong yumi i laet i stap mo blong kasem wan saplae blong oel blong jenisim laef we i inaf. Naesfala oel ia yu kasem wan drop long wan taem—‘tijing folem tijing [mo] rul folem rul’ (2 Nifae 28:30), wetem longfala tingting mo blong evri taem” (“Converted unto the Lord,” Liahona, Nov. 2012, 109).
Stap Kam Antap long Fasin blong Yumi blong Stap Tij
Yu meksua se yu stap tijim tru doktrin. “Gohed blong askem yuwan: ‘?Hao nao wanem we mi stap tijim, bae i helpem ol memba blong klas blong mi blong oli bildimap fet blong olgeta long Kraes, sakem sin, mekem mo obei ol kavenan wetem God, mo kasem Tabu Spirit?’” (Teaching in the Savior’s Way, 20).