“15–21 Mei. Matiu 21–23; Mak 11; Luk 19–20; Jon 12: ‘King blong Yufala I Stap Kam long Yufala,’” Kam Folem Mi—Blong Sandei Skul: Niu Testeman 2023 (2022)
“15–21 Mei. Matiu 21–23; Mak 11; Luk 19–20; Jon 12,” Kam Folem Mi—Blong Sandei Skul: 2023
Sakias long wan Sikamotri, i kam long James Tissot
15–21 Mei
Matiu 21–23; Mak 11; Luk 19–20; Jon 12
“King blong Yufala I Stap Kam long Yufala”
Taem yu ridim Matiu 21–23; Mak 11; Luk 19–20; mo Jon 12, lukaotem ol prinsipol we bae i help blong mitim nid blong olgeta we yu stap tijim. Tabu Spirit bae i givim insperesen long yu blong save olsem wanem blong helpem ol memba blong klas blong faenemaot ol prinsipol ia.
Invaetem Ol Memba blong Serem Wanem Oli Gat
Sam dei bifo klas, invaetem sam memba blong klas blong rere mo kam serem wan eksperiens oli bin gat taem oli stap stadi long ol japta blong wik ia. Askem olgeta blong talem abaot ol blesing we i kam long laef blong olgeta taem oli stadi long ol skripja truaot long wik.
Stap Tijim Doktrin
Sevya i save gud yumi wanwan.
-
Ol memba blong klas blong yu oli mas filim se samtaem long laef oli no lukluk tumas long olgeta o oli fogetem olgeta. Stori blong Sakias i save helpem olgeta blong andastanem se, Papa long Heven mo Jisas Kraes i save olgeta mo kea long olgeta. Blong helpem ol memba blong klas oli yusum stori ia long laef blong olgeta, invaetem olgeta blong pikjarem long maen blong olgeta se oli stap long ples blong Sakias long stori ia. ?Yu ting se hem i lanem wanem long Sevya long eksperiens blong hem? ?Wanem nao yumi save lanem aot long Sakias tru long traehad blong hem blong faenem Sevya?
Matiu 21:1–11; Mak 11:1–11; Luk 19:29–44; Jon 12:12–16
Jisas Kraes i King blong yumi.
-
Wan simpol aktiviti i save givim wan fas toktok long saed blong viktri wokbaot blong Sevya i go long Jerusalem: Sam memba oli save droem long bod sam samting we i blong wan king, olsem hat blong king o wan jea blong king, taem ol narawan oli stap traem blong talemaot wanem nao oli stap droem. Ol nara memba blong klas oli save dro wan yangfala hos mo ol branj blong wan tri. ?Wanem nao ol samting ia oli gat blong mekem wetem wan king? Afta yu save soem wan pikja blong viktri wokbaot blong Sevya i go long Jerusalem we i stap long aotlaen blong wik ia long Kam Folem Mi—blong Wanwan Man mo Famli mo invaetem ol memba blong klas blong ridim Mak 11:1–11. ?Ol pipol ia oli luksave Jisas olsem wanem, olsem King blong olgeta? ?Olsem wanem yumi wosip long Jisas Kraes olsem King blong yumi tru long ol toktok mo ol aksen blong yumi?
Tu bigfala komanmen, i blong lavem God mo lavem ol narafala man, olsem yumiwan.
-
?Olsem wanem yumi save helpem ol memba blong klas blong oli andastanem se “tufala loa ya”—blong lavem God mo lavem ol man we oli stap raonabaot long yu—“i stamba blong ol Loa we God i givim wetem ol tok blong profet tu”? (Matiu 22:40). Afta yufala i ridim Matiu 22:34–40 tugeta, yu save raetem Lavem God mo Lavem neba blong yu long bod. Givim wan pis pepa long wanwan memba blong klas wetem wan komanmen we oli raetem i stap long pepa ia. Invaetem sam long olgeta blong ridim ol komanmen blong olgeta mo tokbaot olsem wanem ol komanmen ia oli helpem yumi obei wan o tugeta long tufala bigfala komanmen ia. Afta we oli tokbaot komanmen blong olgeta, oli save putum pepa blong olgeta long bod. ?From wanem i impoten blong tingbaot se evri komanmen oli hang long tufala bigfala komanmen? (luk long “Sam Moa Risos”).
Bae oli protektem yumi taem yumi stap longwe long ol man blong lidim man we oli blaen.
-
?Bae i gud blong ol memba blong klas blong yu oli toktok raon long toktok ia “man blong lidim man we i blaen,” we Sevya i yusum blong tokbaot ol Farisi mo Ol tija blong Loa we oli blaen long saed blong spirit? (Matiu 23:16). Maet yu save tingting blong soemaot long wan wei, wanem bae i hapen sapos wan man i folem man we i no save lukluk. O klas i save mekem wan lis long bod abaot ol fasin blong wan man blong lidim man we oli tokbaot long Matiu 23:13–33. Blong ademap long lis we i stap, tingting blong rid long ol narafala skripja we oli tij abaot blaen long saed blong spirit, olsem 2 Korin 4:3–4; 2 Nifae 9:28–32; mo Jekob 4:14. ?Olsem wanem yumi save luksave mo stap longwe long ol man blong lidim man we oli blaen?
Sevya i talem long ol Farisi se oli rong, oli ol man blong tu fes mo ol man blong lidim man we oli blaen.
Sam Moa Risos
Lavem God mo lavem neba blong yumi i fandesen blong evri samting we yumi stap mekem.
Luklukbak long tufala bigfala komanmen we i stap long Matiu 22:37–39, Presiden M. Russell Ballard i tijim:
“Stap obei long tufala komanmen ia i givim wan wei blong eksperiensem moa pis mo glad. Taem yumi lavem mo wok blong Lod, mo lavem mo givim seves long ol neba blong yumi, olsem nomo, bae yumi filim se i gat moa glad i kam long yumi bitim eni narafala wei.
Blong lavem God mo lavem ol neba blong yumi, i doktrin fandesen blong wok blong givhan; blong lan long hom senta we Jos i sapotem; blong spirit wosip blong Sabat dei; mo blong wok blong fasin blong sevem man long tugeta saed blong vel, we ol Rilif Sosaeti mo ol kworom blong ol elda oli sapotem. Evri samting ia, oli stanap long ol tabu komanmen blong lavem God mo blong lavem ol neba blong yumi. ?Bae i gat eni samting i moa besik, i stap moa olsem stamba, o i moa simpol bitim hemia? (“Tru, Klin, mo Simpol Gospel ia blong Jisas Kraes,” Liahona, Mei 2019, 29).
Kam Antap long Fasin blong Yumi blong Stap Tij
Yu no nidim blong kavremap evri samting. “I gat plante samting blong tokbaot long wanwan lesen, be i no impoten blong kavremap evri samting long wan taem blong klas blong save tajem hat blong wan—oltaem wan o tu(2) stamba poen i inaf. Taem yu stap tingting hevi long wanem olgeta we oli stap lan oli nidim, Spirit bae i helpem yu blong luksave wanem prinsipol, o ol stori, o ol skripja we bae i save gat moa mining long laef blong olgeta” (Teaching in the Savior’s Way, 7).