mga mamumuo sa ubasan

Mayo 8–14

Mateo 19–20; Marcos 10; Lucas 18

“Unsa Pa May Akong Kulang?”

Samtang mangandam ka sa pagtudlo, mainampoon nga mokonsiderar kon sa unsang paagi nga makatabang ka sa mga sakop sa klase sa pagpaambit kon unsay ilang nakat-onan og nabati atol sa ilang kaugalingong pagtuon.

pagpaambit nga icon

Dapita ang Pagpaambit

Mahimong makatabang ang panagsa nga paghisgot sa mga kinatibuk-ang kasinatian sa mga sakop sa klase nga may kalabotan gamit ang pagkat-on sa ebanghelyo nga nakasentro sa panimalay. Unsa nga malamposong mga kasinatian ang ilang ikapaambit? Unsa nga mga babag o mga hagit ang ilang giatubang? Unsa nga tambag ang ilang mahatag sa usag usa?

icon sa pagtudlo

Itudlo ang Doktrina

Mateo 19:3–9

Ang kaminyoon tali sa usa ka lalaki ug sa usa ka babaye mahinungdanon sa mahangturon nga plano sa Dios.

• Nagkadako na, ang panglantaw sa kalibotan bahin sa kaminyoon misimang gikan sa mahangturong kamatuoran. Aron matabangan ang imong klase nga makakat-on mahitungod sa panglantaw sa Dios kabahin sa kaminyoon, mahimo nimo silang dapiton sa pagbasa sa Mateo 19:3–9 ug ilista sa pisara ang mga kamatuoran nga ilang makit-an kalabot sa kaminyoon. Mahimo usab nilang ilista ang dugang nga mga kamatuoran nga ilang makit-an diha sa mosunod: Genesis 1:27–28; 1 Mga Taga-Corinto 11:11; Doktrina ug mga Pakigsaad 42:22; 49:15–17; 131:1–4; 132:19; ug Moises 3:18, 21–24. Sa unsang paagi nga kining mga kamatuoran nasuportahan diha sa “Ang Pamilya: Usa ka Pamahayag ngadto sa Kalib[o]tan”? (ChurchofJesusChrist.org).

Mateo 20:1–16

Ang tanan makadawat sa panalangin sa kinabuhing dayon, dili igsapayan kon kanus-a nila madawat ang ebanghelyo.

• Unsay makatabang sa mga sakop sa imong klase nga magamit ang mga baroganan sa sambingay sa mamumuo diha sa ubasan? Mahimo nimong dapiton ang pipila ka sakop sa klase nga mangandam sa pag-drama sa sambingay nga ipresentar sa klase. Human sa presentasyon, ang mga tawo nga naghulagway sa mga mamumuo mahimong mopaambit kon unsay ilang gibati mahitungod sa bayad nga ilang nadawat ug ngano. Unsa may gisugyot niining sambingay mahitungod sa gingharian sa langit? Unsa nga dugang nga mga ideya ang mabatunan sa mga sakop sa klase mahitungod niining sambingay gikan sa mensahe ni Elder Jeffrey R. Holland nga “Mga Mamumuo sa Ubasan”? (Liahona, Mayo 2012, 31–33).

Mateo 19:16–22; Marcos 10:17–27

Ang Manluluwas mogiya kanato aron mas mapaduol ngadto Kaniya samtang mangayo kita sa Iyang tabang.

• Unsaon nimo sa pagtabang sa mga sakop sa klase nga matino ug magamit ang mga baroganan diha sa estorya bahin sa adunahan nga batan-ong lalaki? Usa ka pamaagi mao ang paghangyo kanila nga basahon ang Marcos 10:17–27 ug ikonsiderar kon nakasulay na ba sila nga mobati sama sa adunahan nga batan-ong lalaki. Unsa ang nakatabang kanila nga makasunod sa tambag sa Manluluwas bisan kon ang pagbuhat sa ingon lisod? Ang mga sakop sa klase mahimong andam sa pagpaambit og mga kasinatian diin sila nakapangutana “Unsa pay akong kulang?” (Mateo 19:20) ug nakadawat og personal nga pag-aghat sa paglambo. Aron matabangan ang mga sakop sa klase kinsa lagmit nawad-an og kadasig tungod sa pagtutok sa unsa pay ilang kulang, mahimo nimong ipaambit ang pamahayag sa “Dugang nga mga Kapanguhaan.”

• Mahimong nabasa na sa mga sakop sa klase ang mensahe nga may kalabotan niining mga bersikulo sama sa gisugyot sa Dali, Sunod Kanako—Alang sa mga Indibidwal ug mga Pamilya. Dapita sila sa pagpaambit sa mga salabotan nga ilang naangkon.

mapainubsanong tawo ug Pariseo

The Repentant Publican and the Self-Righteous Pharisee in the Temple [Ang Mahinulsulon nga Maniningil og Buhis ug ang Nagpakatarong sa Kaugalingon nga Pariseo diha sa Templo], ni Frank Adams

Lucas 18:9–14

Kinahanglan kitang mosalig sa kalooy sa Dios, dili sa atong kaugalingong katarong.

• Ang sambingay sa Manluluwas nga nagtandi sa pag-ampo sa Pariseo ngadto sa maniningil og buhis makatabang nimo nga matutokan ang kinaiya nga gikinahanglan sa Ginoo niadtong nagtinguha sa pagsunod Kaniya. Aron matabangan ang mga sakop sa klase nga magamit kining sambingay sa atong panahon, mahimo nimo silang dapiton sa pagsulat og usab sa pag-ampo sa Pariseo sa paagi nga naggamit sa modernong mga detalye apan nagpahayag sa samang mga kinaiya. Mahimo nilang buhaton ang samang butang ngadto sa pag-ampo sa maniningil og buhis ug dayon ipaambit kon unsay ilang gisulat. Sa unsang paagi ang mga bersikulo 15–17 ug 18–24 dunay kalabotan ngadto sa gitudlo sa Manluluwas niini nga sambingay? Mahimo usab nimong ipaambit ang mosunod nga pamahayag kalabot niining mga bersikulo pinaagi ni Elder Dale G. Renlund: “Ang naghinulsol nga makasasala mas mapaduol ngadto sa Dios kay sa nagpakatarong sa kaugalingon nga tawo nga mipanghimara[o]t niana nga makasasala” (Ang Atong Maayong Magbalantay,” Liahona, Mayo 2017, 31).

mga kapanguhaan nga icon

Dugang nga mga Kapanguhaan

Dili kita makontento o mawad-an sa kadasig.

Si Elder D. Todd Christofferson nagtudlo:

“Kon sinsero kitang mangutana, ‘Unsa pa may akong kulang?’ Dili [Niya] kita pasagdan nga motagna, apan diha sa gugma motubag Siya alang sa atong kaayohan ug kalipay. Ug mohatag Siya kanato og pagla[o]m. Ug Siya mohatag kanato og paglaom.

“Makapaluya kini nga paningkamot, ug makahahadlok kaayo kon sa atong pagpaninguha alang sa pagkabalaan mag-inusara kita. Ang mahimayaong kamatuoran mao nga wala kita mag-inusara. Kita aduna sa gugma sa Dios, sa grasya ni Kristo, sa kahupayan ug giya sa Balaang Espiritu, ug sa pakigdait ug pagdasig sa isigka Santos diha sa lawas ni Kristo. Kinahanglang dili kita makontento kon asa kita, apan dili kita angayang mawad-an og kadasig” (“Ang Buhing Tinapay nga Nana[o]g gikan sa Langit,” Liahona, Nob. 2017, 39).

Pagpalambo sa Atong Pagtudlo

Ang Dios nagkinahanglan sa imong talagsaong mga talento ug mga abilidad. “Makapanalangin ka sa mga anak sa Dios pinaagi sa paggamit sa imong gugma alang sa uban, sa mga gasa nga gihatag sa Dios kanimo, ug sa mga kasinatian sa imong kinabuhi. Samtang matinud-anon ka nga moserbisyo ug magtinguha sa tabang sa Dios, Iya kang palamboon, ug modako ang imong kapasidad sa pagtudlo sa ebanghelyo sumala sa pamaagi sa Manluluwas” (Pagtudlo sumala sa Pamaagi sa Manluluwas, 5).