tawo nga diha sa kahoy samtang nagpadulong si Jesus

Zacchaeus in the Sycamore Tree [Si Zaqueo nga naa sa Kahoy nga Sicomoro], ni James Tissot

Mayo 15–21

Mateo 21–23; Marcos 11; Lucas 19–20; Juan 12

“Tan-awa, Ang Imong Hari Nagaanhi”

Samtang magbasa ka sa Mateo 21–23; Marcos 11; Lucas 19–20; ug Juan 12, pangita og mga baroganan nga makatabang nga makab-ot ang mga panginahanglan sa mga tawo nga imong gitudloan. Ang Espiritu Santo modasig kanimo aron masayod kon unsaon sa pagtabang ang mga sakop sa klase nga makadiskobre niadtong mga baroganan.

pagpaambit nga icon

Dapita ang Pagpaambit

Pipila ka mga adlaw sa dili pa ang klase, pagdapit og pipila ka sakop sa klase sa pagtungha sa klase nga andam na sa pagpaambit og usa ka kasinatian nga ilang naangkon samtang nagtuon niining mga kapitulo nga gitahas niining semanaha. Hangyoa sila sa pagsulti mahitungod sa mga panalangin nga miabot ngadto kanila samtang sila nagtuon sa mga kasulatan atol niining semana.

icon sa pagtudlo

Itudlo ang Doktrina

Lucas 19:1–10

Ang Manluluwas personal nga nakaila kanato.

• Ang mga sakop sa klase lagmit mibati nga napasagdan o nakalimtan usahay sa ilang kinabuhi. Ang istorya bahin ni Zaqueo makatabang nga ilang masabtan nga ang Langitnong Amahan ug si Jesukristo nakaila kanila ug nagpakabana kanila. Aron matabangan ang mga sakop sa klase nga mapahisama kini nga istorya ngadto sa ilang kinabuhi, dapita sila sa paghunahuna sa ilang kaugalingon isip si Zaqueo. Unsa kaha ang iyang nakat-onan mahitungod sa Manluluwas gikan sa iyang kasinatian? Unsa ang atong makat-onan gikan sa mga paningkamot ni Zaqueo mahitungod sa pagtinguha sa Manluluwas?

Mateo 21:1–11; Marcos 11:1–11; Lucas 19:29–44; Juan 12:12–16

Si Jesukristo mao ang atong Hari.

• Usa ka yano nga kalihokan ang makasugod og panaghisgotan mahitungod sa madaugon nga pagsulod sa Manluluwas ngadto sa Jerusalem: Pipila ka sakop sa klase mahimong magdrowing diha sa pisara og mga butang nga may kalabotan sa usa ka hari, sama sa korona o trono, samtang ang uban motag-an kon unsay ilang gidrowing. Dayon ang ubang mga sakop sa klase mahimong magdrowing og usa ka nati nga asno [colt] ug tulo ka sanga sa kahoy. Unsay kalabotan niining mga butanga ngadto sa usa ka hari? Mahimo dayon nimong ipakita ang hulagway bahin sa madaogon nga pagsulod sa Manluluwas ngadto sa Jerusalem gikan sa latid karong semanaha sa Dali, Sunod Kanako—Alang sa mga Indibidwal ug mga Pamilya ug dapita ang mga sakop sa klase sa pagbasa sa Marcos 11:1–11. Giunsa pagkaila niining mga tawo ni Jesus isip ilang Hari? Unsaon nato pagsimba si Jesukristo isip atong Hari pinaagi sa atong mga pulong ug mga buhat?

Mateo 22:34–40

Ang duha ka dagkong mga sugo mao ang paghigugma sa Dios ug paghigugma sa uban sama sa atong kaugalingon.

• Unsaon nimo sa pagtabang ang mga sakop sa klase aron makasabot nga “sa niining duha ka sugo”—ang paghigugma sa Dios ug ang paghigugma sa atong silingan—“nagsukad niining duha ka sugo ang tibuok nga Balaod ni Moises ug ang mga pagtulon-an sa mga propeta”? (Mateo 22:40). Human sa pagbasa og dungan sa Mateo 22:34–40 , mahimo nimong isulat ang Higugmaa ang Dios ug Higugmaa ang imong silingan diha sa pisara. Hatagi ang matag sakop sa klase og gilis sa papel nga adunay gisulat nga usa ka sugo diha niini. Dapita ang pipila kanila sa pagbasa sa ilang sugo ug hisgoti kon sa unsang paagi ang ilang sugo nakatabang kanato sa pagtuman og usa o duha niining duha ka dakong sugo. Human sila makahisgot sa ilang sugo, mahimo nilang ibutang ang ilang papel diha sa pisara. Nganong importante ang paghinumdom nga ang tanang sugo adunay kalabotan sa duha ka dagkong sugo? (tan-awa sa “Dugang nga mga Kapanguhaan”).

Mateo 23:13–33

Panalipdan kita samtang molikay kita sa pagsunod sa giya nga buta.

• Makabenepisyo ba ang mga sakop sa imong klase sa paghisgot sa termino nga “giya nga buta,” nga gigamit sa Manluluwas sa paghulagway sa pagkabuta sa nga Pariseo ug mga escriba sa espirituwal nga paagi? (Mateo 23:16). Mahimong maghunahuna ka og paagi sa pagpakita kon unsay mahitabo sa usa ka tawo nga magsunod sa tawo nga dili makakita. O ang klase mahimong maglista diha sa pisara sa mga kinaiya sa usa ka giya nga buta, sama sa gihulagway diha sa Mateo 23:13–33. Sa pagdugang sa lista, ikonsiderar ang pagtan-aw sa dugang nga mga kasulatan nga nagtudlo mahitungod sa espirituwal nga pagkabuta, sama sa 2 Mga Taga-Corinto 4:3–4; 2 Nephi 9:28–32; ug Jacob 4:14. Unsaon man nato sa pag-ila ug paglikay sa giya nga buta?

Si Jesus nakig-istorya sa mga Pariseo

Ang Manluluwas misaway sa mga Pariseo isip mga hipokrito ug giya nga buta.

mga kapanguhaan nga icon

Dugang nga mga Kapanguhaan

Ang paghigugma sa Dios ug paghigugma sa atong mga silingan mao ang pundasyon sa tanan nga atong buhaton.

Nagpasabot ngadto sa duha ka dakong sugo nga makit-an sa Mateo 22:37–39, si President M.Russell Ballard nagtudlo:

“Ang pagkamasulundon ngadto niadtong duha ka mga sugo naghatag og paagi sa pagsinati og dugang nga kalinaw ug hingpit nga kalipay. Kon kita mohigugma ug moserbisyo sa Ginoo ug mohigugma ug moserbisyo sa atong mga silingan, kita natural nga mobati og dugang nga kalipay nga moab[o]t kanato sa dili mas maayong paagi.

“Ang paghigugma sa Dios ug ang paghigugma sa atong mga silingan mao ang doktrinal nga sukaranan sa pangalagad; sentro sa panimalay, inabagan sa Simbahan nga pagkat-on; espirit[u]wal nga pagsimba sa Igpapahulay nga adlaw; ug ang buhat sa kaluwasan diha sa duha ka pikas sa tabil inabagan sa mga Relief Society ug sa mga elders korum. Ang tanan niining mga butanga gibase sa balaang mga sugo sa paghigugma sa Dios ug sa paghigugma sa atong mga silingan. Aduna pa bay bisan unsa nga labaw ka simpli, labaw ka importante, ug labaw ka yano kay niana?” (“Ang Tinuod, Lunsay, ug Yano nga Ebanghelyo ni Jesukristo,” Liahona, Mayo 2019, 29).

Pagpalambo sa Atong Pagtudlo

Ayaw sulayi pagtudlo ang tanan. “Daghan kaayo ang pwedeng mahisgotan sa matag leksiyon, apan dili kinahanglan nga matudlo ang tanan sa usa ka klasehan aron matandog ang kasingkasing sa usa ka tawo—kasagaran ang usa o duha ka importanting mga punto igo na. Samtang imong pamalandongan ang mga panginahanglan sa mga nagkat-on, ang Espiritu motabang kanimo sa pag-ila asa nga mga baroganan, mga estorya, o mga kasulatan ang labing makahuloganon ngadto kanila” (Pagtudlo sumala sa Pamaagi sa Manluluwas, 7).