lalaki nga naggakos sa iyang anak

The Prodigal Son [Ang Nawala nga Anak], ni Liz Lemon Swindle

Mayo 1–7

Lucas 12–17; Juan 11

“Maglipay Kita kay Akong Nakaplagan ang Nawala Kong Karnero”

Sugdi ang imong pagpangandam pinaagi sa mainampoong pagtuon sa Lucas 12–17 ug Juan 11. Unsa nga “karnero nga nawala” ang imong mahunahunaan diha sa imong klase? Gamita ang Dali, Sunod Kanako—Alang sa mga Indibidwal ug mga Pamilya ug kining latid samtang magtinguha ka sa giya sa Ginoo kon unsaon pagtubag sa labing maayong paagi ang mga panginahanglan sa mga sakop sa klase, bisan kon wala sila magtambongan sa klase.

pagpaambit nga icon

Dapita ang Pagpaambit

Ang paggamit sa nakat-onan usa ka importante nga bahin sa pagkat-on, busa dapita ang mga sakop sa klase sa pagpaambit kon giunsa nila pagpili sa pagsunod og usa ka butang nga ilang nakat-onan gikan sa mga kasulatan karong semanaha.

icon sa pagtudlo

Itudlo ang Doktrina

Lucas 14:15–24

Walay igo nga rason alang sa pagsalikway sa ebanghelyo.

• Aron matabangan ang mga sakop sa klase sa pagtuon sa sambingay sa importante nga panihapon, mahimo nimo silang dapiton ngadto sa usa ka hunahuna lang nga salo-salo nga imong ipahigayon. Tugoti sila nga mopaambit og pipila ka rason nganong makatambong sila o dili. Magdungan sa pagbasa sa Lucas 14:15–24 , ug hisgoti ang mga rason nga gihimo sa mga tawo diha sa sambingay sa dihang gidapit sila ngadto sa kumbira nga nagrepresentar sa mga panalangin sa ebanghelyo. Unsa nga mga rason ang gihimo sa mga tawo karon sa pagkapakyas sa pagdawat sa mga pagdapit sa Manluluwas nga modawat sa mga panalangin sa Langitnong Amahan? Tingali ang mga sakop sa klase mahimong mopaambit sa mga panalangin nga ilang nadawat sa dihang sila mihimo og mga sakripisyo nga gikinahanglan aron masunod ang piho nga mga baroganan sa ebanghelyo.

Lucas 15

Mahimo natong pangitaon kadtong nawala ug maglipay uban sa Amahan kon mobalik sila.

• Unsaon nimo sa paghatag sa mga sakop sa klase og oportunidad sa pagpaambit unsa ang ilang nakat-onan mahitungod sa tulo ka sambingay diha sa Lucas 15? Ikonsiderar ang paghatag og tahas sa matag sakop sa klase og usa sa mga sambingay nga rebyohon. Sila mahimong makapangita ug mopaambit sa mga tubag sa mga pangutana nga sama niini: Unsa nga mga pulong diha sa sambingay nga nagpadayag kon unsa ang bation sa Langitnong Amahan mahitungod niadtong kinsa nangawala? Unsa ang gisugyot sa mga sambingay mahitungod kon unsaon nato sa pagtabang ngadto sa tanang anak sa Dios? Ang mga sakop sa klase mahimong makapaambit kon sa unsang paagi ang Manluluwas mitabang kanila sa dihang mibati sila nga sila nawala.

• Ang pagdungan sa pagpanganta sa “Gimahal sa Magbalantay” (Mga Himno, nu. 134) tingali mahimong makadugang sa kamakahuloganon sa mga pagtulon-an niining mga sambingay.

• Samtang magdungan kamo sa pagrebyo sa sambingay sa nawala nga anak, ang mga sakop sa klase mahimong makabenepisyo sa pagtutok sa mga pulong, mga buhat, ug mga pagtuo sa matag tawo diha sa sambingay. Unsa ang atong makat-onan gikan sa matag tawo? Tingali ang mga sakop sa klase mahimong mosulat og lahi nga kataposan sa sambingay diin ang kinaiya sa mas magulang nga anak ngadto sa iyang igsoong lalaki lahi. Unsa man ang gitudlo kanato sa tambag sa amahan diha sa sambingay kon unsay angay natong bation niadtong kinsa nawala ug niadtong kinsa mibalik sa ebanghelyo? (Tan-awa usab sa pamahayag ni Elder Jeffrey R. Holland diha sa “Dugang nga mga Kapanguhaan.”) O mahimo nimong hangyoon ang mga sakop sa klase sa paghunahuna nga sila ang amahan diha niining sambingay. Unsa ang dugang nga tambag ang ilang ihatag sa magulang nga anak aron makatabang kaniya nga maglipay sa pag-uswag o sa kalamposan sa uban?

Lucas 17:11–19

Ang pagpasalamat sa akong mga panalangin makapaduol nako ngadto sa Dios.

• Dapita ang mga sakop sa klase sa pagpaambit unsay ilang nakat-onan mahitungod sa pasalamat gikan sa ilang pagtuon sa Lucas 17:11–19. Sa unsang paagi ang mapasalamaton nga sanlahon napanalanginan tungod sa pagpahayag sa iyang pasalamat? Sa unsang paagi kita mapanalanginan kon kita mopahayag og kamapasalamaton? Ang mga sakop sa klase mahimong makasugyot og mga paagi nga kita makapakita sa atong kamapasalamaton ngadto sa Dios ug sa uban.

Juan 11:1–46

Si Jesukristo mao ang Pagkabanhaw ug ang Kinabuhi.

• Usa ka paagi sa pagsusi sa Juan 11:1–46 mao ang paghangyo sa mga sakop sa klase nga magpuli-puli sa pagbasa sa mga bersikulo ug sa pagdapit kanila sa paghunong ug maghisgot sa matang higayon nga makakita sila og ebidensiya sa hugot nga pagtuo diha ni Jesukristo. Mahimo usab nimong hangyoon ang klase sa paghunahuna sa mga panglantaw sa mga tawo nga nalambigit—lakip sa Manluluwas, sa mga Apostoles, ni Marta, Maria, ug ni Lazaro. Unsa ang atong makat-onan gikan sa matag usa kanila? Tingali ang mga sakop sa klase makapaambit og mga kasinatian sa dihang ang ilang hugot nga pagtuo ni Jesukristo napalig-on atol sa pagsulay.

mga kapanguhaan nga icon

Dugang nga mga Kapanguhaan

Nagkat-on gikan sa laing nawala nga anak.

Si Elder Jeffrey R. Holland mihimo niini nga obserbasyon mahitungod sa magulang nga igsoon sa nawala nga anak: “Kini nga anak wala kaayo masuko nga miuli ang igsoon apan siya nasuko nga ang iyang mga ginikanan nalipay kaayo mahitungod niini. … Kinahanglan pa siya nga mopalambo og kapuangod ug kalooy, sa halapad nga panglantaw aron makita nga kining mipauli dili usa ka kaaway. Kini mao ang iyang igsoon nga lalaki. Samtang ang iyang amahan nangamuyo kaniya nga motan-aw, mao kini ang namatay ug karon nabuhi. Mao kini ang nawala ug karon nakaplagan” (“The Other Prodigal,” Ensign, Mayo 2002, 63).

Pagpalambo sa Atong Pagtudlo

Pagtabang sa usa. Sama sa magbalantay sa karnero diha sa sambingay sa Manluluwas (tan-awa sa Lucas 15:4), “imong matabangan kadtong kinsa nawala gikan sa imong klase. Ang imong mga oportunidad sa pagtudlo ug pagdasig sa mga sakop sa klase ug sa pagtabang kanila nga moduol kang Kristo mopadayon lapas sa klasehanan ug lapas pa niadtong nagtambong sa inyong pormal nga mga leksiyon” (Pagtudlo sumala sa Pamaagi sa Manluluwas, 8).