“Abril 24–30. Juan 7–10: ‘Ako Mao ang Maayong Magbalantay sa mga Karnero’” Dali, Sunod Kanako—Alang sa Sunday School: Bag-ong Tugon 2023 (2022)
“Abril 24–30. Juan 7–10,” Dali, Sunod Kanako—Alang sa Sunday School: 2023
Neither Do I Condemn Thee [Bisan Ako Dili Usab Mosilot Kanimo], ni Eva Koleva Timothy
Abril 24–30
Juan 7–10
“Ako Mao ang Maayong Magbalantay sa mga Karnero”
Ikaw ug ang mga sakop sa imong klase makabaton og mga ideya samtang magbasa sa Juan 7–10 karong semanaha. Hinumdomi nga ang mga ideya niining latid kinahanglang mosuporta imbis nga mohulip sa inspirasyon nga imong madawat pinaagi sa pagtuon sa mga kasulatan.
Dapita ang Pagpaambit
Pahinumdumi ang mga sakop sa klase mahitugod sa kaimportante sa paghimo sa ilang mga panimalay nga sentro sa pagkat-on sa ebanghelyo. Hangyoa sila sa pagpaambit kon unsa ang gitudlo sa Espiritu Santo diha kanila samtang sila nagtuon sa Juan 7–10 sa panimalay, sa tinagsa-tagsa o uban sa ilang mga pamilya.
Itudlo ang Doktrina
Si Jesukristo mao ang Manluluwas sa kalibotan.
-
Sa tibuok Juan 7–10, mihimo ang Manluluwas og pipila ka pamahayag nga makatabang sa mga sakop sa klase nga mas makasabot sa Iyang misyon ug mas mahiduol ngadto Kaniya. Ikonsiderar ang pagdapit sa mga sakop sa klase sa pagbasa sa mosunod nga mga tudling sa kasulatan ug ipakigbahin kon unsay gitudlo niini mahitungod sa balaanong misyon sa Manluluwas. Sa unsang paagi nga natuman ni Kristo kining mga tahas diha sa atong kinabuhi?
-
Juan 7:37–39: Ang tinubdan sa “buhi nga tubig”
-
Juan 9:8–10, 35–38: “Ang Anak sa Dios”
-
Juan 10:7–9: “Ang pultahan”
-
Juan 10:11–14: “Ang maayong magbalantay sa mga karnero”
-
Light of the World [Kahayag sa Kalibotan], ni Howard Lyon
Kon magsunod kita sa mga pagtulon-an ni Jesukristo, mahimo kitang masayod nga kini tinuod.
-
Sa laing mga paagi, ang pagbaton og usa ka pagpamatuod sama sa pagkat-on og usa ka kahanas—ang duha nagkinahanglan og pagbansay ug kasinatian. Sa paghulagway niini, mahimo nimong dapiton ang mga sakop sa klase kinsa adunay piho nga kahanas, sama sa juggling o pagpatugtog og usa ka instrumento sa musika, aron mopasabot kon giunsa nila sa pagpalambo ang ilang kahanas. Nganong dili man igo ang pagbasa mahitungod sa kahanas o magtan-aw sa laing tawo nga naghimo niini? Isip usa ka klase, hisgoti kon sa unsang paagi nga ang paningkamot nga nalambigit sa pagbansay og kahanas susama ngadto sa espirituwal nga sumbanan nga gihulagway sa Manluluwas diha sa Juan 7:14–17. Sa unsang paagi nga kini lahi?
-
Tingali ang mga sakop sa klase makapaambit og mga kasinatian diin ang pagsunod sa kamatuoran sa ebanghelyo nakatabang kanila nga makabaton og usa ka pagpamatuod kabahin niini. Hatagi ang mga sakop sa klase og panahon sa paghunahuna og usa ka baroganan sa ebanghelyo nga gusto silang makabaton og mas lig-on nga mga pagpamatuod, ug dayon awhaga sila sa pagtakda og piho nga mga tumong sa pagsunod nianang baroganan sa mas hingpit nga paagi.
Ang kalooy sa Manluluwas gilugway ngadto sa tanan nga maghinulsol.
-
Niadtong kinsa mibati nga gipanghimaraot tungod sa ilang mga sala, ang istorya bahin sa Manluluwas nga nagtanyag og kalooy ug paghinulsol ngadto sa babaye nga nadakpan tungod sa pagpanapaw mahimong usa ka tinubdan sa kadasig. O, kon ang mga sakop sa klase mibati nga natintal sa pagpanghimaraot sa uban tungod sa ilang mga sala, ang istorya magsilbi isip usa ka pasidaan. Mahimo nimong dapiton ang mga sakop sa pagbasa sa Juan 8:1–11, nga mangita sa mga tubag sa mga pangutana sama sa mosunod: Unsa may gitudlo niining estorya mahitungod sa kalooy sa Manluluwas? Sa unsang paagi nga ang pagdawat sa Iyang kalooy kon kita makasala makatabang kanato kon kita matintal sa paghukom sa uban? (tan-awa sa Alma 29:9–10).
-
Aron matabangan ang mga sakop sa klase nga makita ang personal nga kamahinungdanon sa Juan 8:1–11, ikonsiderar ang pagbahin sa klase ngadto sa tulo ka grupo—ang usa mag-focus sa mga pulong ug mga aksiyon sa mga Pariseo, ang usa mag-focus sa mga pulong ug mga aksiyon sa Manluluwas, ug ang usa mag-focus sa mga pulong ug mga aksyon sa babaye. Makahimo sila niini samtang magbasa sa asoy o samtang magtan-aw sa video nga “Go and Sin No More” (ChurchofJesusChrist.org). Dapita ang matag grupo sa paghimo og lista sa espirituwal nga mga kamatuoran nga ilang nakat-onan gikan sa pagbasa sa matag bahin sa istorya.
-
Usahay wala kita makabantay sa mga paagi sa atong paghukom sa uban. Ania ang usa ka kalihokan aron makatabang sa mga sakop sa klase nga mabuntog kini nga kalagmitan: Hangyoa ang klase nga tabangan ka nga maghimo og lista sa mga paagi nga atong hukman ang mga tawo (sa ilang panagway, sa ilang kinaiya, sa ilang gigikanan, ug uban pa). Hatagi ang mga sakop sa klase og mga piraso nga papel nga gigunting sa porma sa usa ka bato, ug papilia sila og usa ka paagi sa paghukom sa uban nga ilang gibati nga sad-an sila ug isulat kini diha sa papel nga bato. Unsa ang atong makat-onan gikan sa mga pulong sa Manluluwas ngadto sa mga Pariseo diha sa Juan 8:1–11? Dapita ang klase sa pagsulat diha sa pikas bahin sa ilang papel nga mga bato og butang nga makapahinumdom kanila nga dili mohukom (tingali mga pulong gikan sa Juan 8).
Sa atong pagkaila kang Jesukristo, kita makaila sa Amahan.
-
Unsa ang gitudlo sa mga pulong sa Manluluwas diha sa Juan 8:18–19, 26–29 mahitungod sa koneksyon tali Kaniya ug sa Iyang Amahan? Human mabasa ug mahisgoti kining mga bersikulo, ang mga sakop sa klase mahimo nga molista diha sa pisara sa pipila ka butang nga gibuhat, gisulti, o gitudlo ni Jesus. Unsa ang atong makat-onan mahitungod sa Dios nga Amahan gikan niining mga butanga?
Pagpalambo sa Atong Pagtudlo
Pagpakabuhi nga takos sa giya sa Espiritu. Kon imong sundon ang ebanghelyo, ikaw takos sa pagpakig-uban sa Espiritu, kinsa mao ang labing maayo nga magtutudlo. Samtang magtinguha ka sa Iyang giya, Siya mohatag kanimo og mga hunahuna ug mga pag-aghat mahitungod kon unsaon sa pagtubag ang mga panginahanglan niadtong imong tudloan. (Tan-awa sa Pagtudlo sumala sa Pamaagi sa Manluluwas, 5.)