Si Jesus naglakaw uban sa mga disipulo nagdala og mga binukag nga pan

Marso 27–Abril 2

Mateo 14; Marcos 6; Juan 5–6

“Ayaw Kamo Kahadlok”

Samtang mangandam ka sa pagtudlo gikan sa Mateo 14; Marcos 6; ug Juan 5–6, pangitaa ang mga mensahe nga may kalabotan sa imong klase. Samtang imong buhaton, ikonsiderar kon sa unsang paagi nga ang mga sakop sa klase maapil diha sa usa ka makahuloganon nga kasinatian gamit ang mga kasulatan.

pagpaambit nga icon

Dapita ang Pagpaambit

Usa ka paagi sa pagsugod og panaghisgotan mao ang pagdapit sa pipila ka sakop sa klase nga ang matag usa mopili og kapitulo gikan sa basahonon ug mopaambit og mensahe gikan nianang kapitulo nga makahuloganon ngadto kanila. Samtang mopaambit sila, ang ubang mga sakop sa klase mahimong mangutana o modugang og mga ideya.

icon sa pagtudlo

Itudlo ang Doktrina

Juan 5:16–47

Si Jesukristo mao ang Hinigugmang Anak sa Langitnong Amahan.

• Sa Juan 5, mihatag si Jesus og pipila ka ideya mahitungod sa Iyang kaugalingon, sa Iyang Amahan, ug sa Iyang relasyon ngadto sa Amahan. Aron matabangan ang klase nga madiskobrehan kining mga ideya, sulayi nga bahinon sila ngadto sa pipila ka grupo ug hatagan sila og pipila ka minuto sa paglista og daghang kamatuoran kutob sa ilang makit-an diha sa mga bersikulo 16–47 mahitungod sa kinaiya sa Dios, ni Jesukristo, ug mahitungod sa Ilang relasyon. Dapita ang mga grupo nga magpuli-puli sa pagbasa sa mga kamatuoran gikan sa ilang mga lista. Sa unsang paagi nga kining mga kamatuoran makatabang kanato aron mas masabtan ang atong Langitnong Amahan ug ang Iyang Anak? Sa unsang paagi nga kita makasunod sa ehemplo ni Jesukristo sa pagkamasulundon ngadto sa Amahan?

• Usa ka kalihokan diha sa latid karong semanaha sa Dali, Sunod Kanako—Alang sa mga Indibidwal ug mga Pamilya misugyot sa pagsulat sa matag higayon nga si Jesus migamit sa pulong Amahan diha sa Juan 5:16–47. Dapita ang pipila ka sakop sa klase sa pagpakigbahin kon unsa ang ilang nakat-onan samtang gikompleto nila ang kalihokan. Hangyoa sila sa pagpaambit og mga ideya nga ilang naangkon mahitungod sa Langitnong Amahan ug sa Iyang Hinigugmang Anak.

Mateo 14:15–21; Marcos 6:33–44; Juan 6:5–14

Ang Manluluwas makapadako sa atong mapainubsanong mga halad sa pagtuman sa Iyang mga katuyoan.

• Unsa ang makatabang sa mga sakop sa klase nga makakita og personal nga kahulogan diha sa milagro ni Jesus nga mipakaon sa lima ka libo? Mahimo nimong ipangutana kon sa unsang paagi nga ang pagbasa mahitungod sa milagro makatabang nga mapalambo ang ilang hugot nga pagtuo sa abilidad sa Manluluwas nga personal nga mopanalangin kanila. Mahimo nilang hisgotan ang mahitungod sa usa ka panahon sa dihang sila mibati nga ang Manluluwas mipalambo o mipadaghan sa ilang mga paningkamot sa pagtabang kanila nga matuman ang butang nga ingon og impossible. Usab, sa dili pa ang klase, mahimo nimong hangyoon ang mga sakop sa klase sa pagdala ngadto sa klase og usa ka litrato o butang nga magrepresentar sa ilang mga kasinatian.

  mga tinapay ug mga isda

  Si Jesus milagrosong mipakaon sa lima ka libo ka tawo gamit ang lima ka piraso nga tinapay ug duha ka isda.

• Unsaon nimo pagtabang sa mga sakop sa klase nga makapamalandong og mas lawom sa milagro nga gihulagway niining tudling. Unsa nga mga detalye niining istorya nga makapadugang sa atong hugot nga pagtuo diha sa Manluluwas? Sa unsang mga paagi nga ang Manluluwas makapakaon kanato sa espirituwal nga paagi? Kanus-a man kita napakaon ug napatunhay pinaagi ni Jesukristo?

Mateo 14:22–33

Gidapit kita ni Jesukristo sa pagpadaplin sa atong mga kahadlok ug mga pagduha-duha aron mas hingpit kitang makaduol ngadto Kaniya.

• Ang istorya diha sa Mateo 14:22–33 makatabang sa mga sakop sa klase nga mapalambo ang ilang hugot nga pagtuo sa Manluluwas ug sa ilang tinguha nga mosunod Kaniya. Dapita ang mga sakop sa klase sa pagbasa niining istorya, nga maghatag og espesyal nga pagtagad ngadto sa mga pulong nga gilitok ni Kristo, ni Pedro, ug sa ubang mga Apostoles. Sa unsa kaha nga paagi nga ang mga pulong ni Jesus nakatabang kang Pedro nga makabaton og hugot nga pagtuo nga mobiya sa sakayan ug molakaw ibabaw sa tubig? Sa unsang paagi nga ang tambag ni Jesus nga “mosalig” ug “dili malisang” (bersikulo 27) atong magamit karon? Unsa man ang atong makat-onan gikan ni Pedro kon unsay kahulogan nga mahimong disipulo ni Jesukristo ug sa pagsalig Kaniya? Mahimo nimo nga awhagon ang mga sakop sa klase sa paghunahuna mahitungod sa mga kasinatian ug mopaambit diin, sama ni Pedro, mihimo og lakang sa pagsunod sa Manluluwas, bisan kon ang sangpotanan walay kasigurohan. Hangyoa sila sa pagpaambit kon unsa ang ilang nakat-onan gikan sa ilang mga kasinatian. Sa unsang paagi si Jesukristo moabot sa pagluwas kanato diha sa atong mga panahon sa kahadlok o mga pagduha-duha?

Juan 6:22–71

Isip mga disipulo ni Kristo, kita kinahanglan gayod nga andam sa pagtuo ug pagdawat sa kamatuoran, bisan kon lisod kining buhaton.

• Ang mga panghitabo diha sa Juan 6 makahatag og makatabang nga panglantaw kon ang mga tawo adunay mga pangutana mahitungod sa doktrina, kasaysayan, o mga polisiya sa Simbahan ni Kristo. Aron matabangan ang mga sakop sa imong klase nga makasabot niining mga panghitabo, mahimo nimong isulat ang mga pangutana sama sa mosunod diha sa pisara aron ilang matubag: Unsa ang gilauman sa mga tawo? (tan-awa sa bersikulo 26). Unsa ang gitanyag ni Kristo kanila? (tan-awa sa bersikulo 51). Unsa ang wala masabti sa mga tawo? (tan-awa sa mga bersikulo 41–42, 52). Mahimo usab nimong ipangutana ang sama niini aron matabangan ang mga sakop sa klase sa paggamit niining istorya ngadto sa ilang mga kinabuhi: Unsa ang pipila ka mga paagi nga kita makapili sa paglakaw uban ni Kristo bisan kon kita adunay mga pangutana o mga pagduha-duha? (tan-awa sa bersikulo 66). Unsa ang ubang mga doktrina, mga ordinansa, o uban nga “mga pulong mahitungod sa kinabuhing dayon” nga makita diha lamang sa gipahiuli nga Simbahan ni Kristo? (tan-awa sa mga bersikulo 67–69). Alang sa mga ideya gikan sa Apostol sa bag-ong panahon, tan-awa sa mensahe ni Presidente M. Russell Ballard “Kang Kinsa Man Kami Moadto?,” (Liahona, Nob. 2016, 90–92).

Pagpalambo sa Atong Pagtudlo

Paminaw. “Ang pagpaminaw usa ka buhat sa gugma. … Hangyoa ang Langitnong Amahan sa pagtabang kanimo nga makasabot kon unsay isulti sa mga sakop sa imong klase. Samtang hatagan nimo og mainampingong pagtagad ang ilang gipamulong ug wala gipamulong nga mga mensahe, mas makasabot ka sa ilang mga panginahanglan, sa ilang mga kabalaka, ug sa ilang mga tinguha” (Pagtudlo sumala sa Pamaagi sa Manluluwas, 34).