trigo nga andam nga anihon

Marso 20–26

Mateo 13; Lucas 8; 13

“Ang May mga Dalunggan nga Makadungog, Kinahanglan Siya Magpatalingh[o]g”

Samtang magbasa ka, hunahunaa ang mga pangutana nga mahimong ipangutana sa mga sakop sa imong klase samtang naningkamot sila nga makasabot sa mga mensahe sa mga sambingay. Unsa kaha ang lisod masabtan? Sa unsang paagi nga ang imong pagtuon moandam kanimo sa pagtubag sa ilang mga pangutana?

pagpaambit nga icon

Dapita ang Pagpaambit

Rebyoha uban sa klase ang “Mga Ideya sa Pagpalambo sa Inyong Personal nga Pagtuon sa Kasulatan” sa Dali, Sunod Kanako—Alang sa mga Indibidwal ug mga Pamilya. Dapita ang mga sakop sa klase sa pagpakigbahin sa mga pamaagi nga ilang gigamit aron sa pagtuon sa Mateo 13 ug Lucas 8; 13.

icon sa pagtudlo

Itudlo ang Doktrina

Mateo 13:1–23

Ang atong kasingkasing kinahanglang andam nga modawat sa pulong sa Dios.

• Unsaon nimo paggamit ang sambingay sa magpupugas sa pagdasig sa mga sakop sa imong klase nga maandam ang ilang kasingkasing nga modawat sa pulong sa Dios? Mahimo nimong isulat ang Mga Disipulo ug Uban diha sa pisara. Dapita ang mga sakop sa klase sa pagbasa sa Mateo 13:10–17 ug mangita kon giunsa paghulagway sa Manluluwas ang mga kalainan tali sa Iyang mga disipulo ug sa uban kinsa nakadungog sa Iyang mga sambingay. Dayon hangyoa ang mga sakop sa klase sa pagsiksik sa mga bersikulo 18–23, nga mangita kon unsa kaha ang hinungdan nga ang atong mga dalunggan mahimong “magalisud sa pagpakabati” o ang atong mga mata mopiyong ngadto sa espirituwal nga mga butang. Unsa nga direksyon ang atong madawat sa atong panahon gikan sa Dios ug sa Iyang mga sulugoon? Sa unsang paagi nga kita makaugmad og “maayong yuta” sa pagdawat sa ilang direksiyon? (bersikulo 23).

• Mahimo nimong dapiton ang pipila ka sakop sa klase nga ang matag usa moabot nga andam sa pagtudlo og usa ka seksiyon gikan sa mensahe ni Elder Dallin H. Oaks nga “Ang Sambingay sa Magpupugas” (Liahona, Mayo 2015, 32–35). Unsa ang gikadugang sa iyang mensahe sa atong panabot bahin sa sambingay?

Mateo 13:24–35, 44–53

Ang sambingay ni Jesus makatabang kanato nga makasabot sa paglambo, kapalaran, ug bili sa Iyang Simbahan.

• Unsaon nimo pagtabang sa mga sakop sa klase nga makasabot sa mga kamatuoran mahitungod sa Simbahan nga gitudlo diha sa sambingay ni Jesus sa Mateo 13? Mahimo nimong ilista ang pipila ka sambingay diha sa pisara (tan-awa sa latid karong semanaha sa Dali, Sunod Kanako—Alang sa mga Indibidwal ug mga Pamilya ug sa Pagtulun-an sa mga Presidente sa Simbahan: Joseph Smith, [2007], 355–367). Ang mga sakop sa klase makatuon sa usa o dugang pang mga sambingay sa tinagsa-tagsa o sa ginagmayng mga grupo ug ipaambit unsa ang ilang makat-onan mahitungod sa paglambo ug kapalaran sa Simbahan ni Kristo.

lalaki nga nangisda gamit ang usa ka pukot

Ang gingharian sa langit sama sa usa ka pukot sa mangingisda.

• Unsay atong makat-onan mahitungod sa bili sa pagkahisakop ngadto sa Simbahan gikan sa mga sambingay sa bahandi diha sa uma ug sa perlas nga labing bililhon, nga makita sa Mateo 13:44–46? Ang ubang mga sakop sa imong klase (o mga tawo nga ilang nailhan) tingali mihimo og mga sakripisyo—dako o gamay—aron mahimong mga miyembro sa Simbahan. Dapita ang mga sakop sa klase sa pagpakigbahin og mga sakripisyo nga ilang nahimo o nakita nga nahimo sa uban aron mahisakop sa Simbahan. Unsa nga mga panalangin ang miabot isip resulta? Dapita ang mga sakop sa klase sa pagpamalandong kon unsay ilang gibati nga giaghat nga isakripisyo alang sa Manluluwas.

Mateo 13:24–30, 36–43

Sa kataposan sa kalibotan, ang Ginoo mopundok sa mga matarong ug pagalaglagon ang mga daotan.

• Unsaon nimo pagtabang ang imong klase nga makakuha og mga leksiyon gikan sa sambingay sa trigo ug bunglayon nga makatabang kanila nga magpabiling matinud-anon nga mga Santos sa Ulahing mga Adlaw? Sugdi pinaagi sa pagdapit og usa ka sakop sa klase sa pag-summarize sa sambingay ug sa interpretasyon niini. Unsa ang pipila ka leksiyon niini nga sambingay alang sa atong panahon? Nganong importante man nga masayran nga ang Ginoo motugot sa Iyang mga Santos nga “managkaipon karon sa pagtubo” (Mateo 13:30) uban sa mga daotan hangtod sa panahon sa ting-ani? Unsaon nato sa pagpabiling lig-on ang atong pagtuo niini nga kahimtang, diin ang pagkadaotan naglibot kanato? Sa unsang paagi si Kristo makatabang kanato? Doktrina ug mga Pakigsaad 86:1–7 ug ang pamahayag ni Elder L. Tom Perry sa “Dugang nga mga Kapanguhaan” makahatag og dugang nga mga ideya sa ulahing adlaw nga paggamit niining sambingay.

mga kapanguhaan nga icon

Dugang nga mga Kapanguhaan

Kinahanglan natong amumahon ang maayo.

Si Elder L. Tom Perry nagtudlo: “Kanang karaan nga kaaway sa katawhan nakakita og daghang himan kutob sa iyang mahunahuna sa pagsabwag og bunglayon sa tanang dapit. Siya nakakita og mga paagi aron makatuhop kini gani sa kabalaan sa atong panimalay. Ang da[o]tan ug kalib[o]tanong mga paagi nagkatap nga daw wala nay paagi sa pagwagtang niini. Kini anaa sa internet ug pinaagi sa kahanginan sa mga himan nga atong gipalambo sa pag-edukar ug paglingaw kanato. Ang trigo ug bunglayon dungan nga nanubo. Ang tinugyanan sa umahan, gamit ang tanan niyang gah[o]m, nag-amuma nianang maayo ug naglig-on ug nagpanindot niini aron ang mga bunglayon bati tan-awon o paminawon” (Pagkaplag og Malungtarong Kalinaw ug Pagtukod og Mahangturong mga Pamilya,” Liahona, Nob. 2014, 44).

Pagpalambo sa Atong Pagtudlo

Isentro ang imong pagtudlo diha sa doktrina. Siguroa nga ang inyong mga diskusyon sa klase nakatutok sa pundasyon nga doktrina diha sa mga kasulatan. Mahimo nimo kining buhaton pinaagi sa paghangyo sa mga estudyante nga mobasa pag-una sa mga kasulatan, pagtutok sa inyong mga panaghisgotan sa klase diha sa mga kasulatan, ug sa paghangyo sa mga sakop sa klase sa pagpakigbahin sa ilang mga pagpamatuod bahin sa tinuod nga doktrina. (Tan-awa sa Pagtudlo sumala sa Pamaagi sa Manluluwas, 20–21.)