Si Jesukristo mi-orden kang Pedro

Marso 6–12

Mateo 9–10; Marcos 5; Lucas 9

“Kining Napulog Duha Gipadala ni Jesus”

Samtang magbasa ka sa Mateo 9–10; Marcos 5; ug Lucas 9, tinguhaa ang inspirasyon gikan sa Espiritu Santo mahitungod sa panginahanglan niadtong imong gitudloan. Ang pagrekord sa imong espirituwal nga impresyon makatabang kanimo nga maandam alang sa usa ka kasinatian nga mopanalangin kanimo ug sa mga sakop sa imong klase.

pagpaambit nga icon

Dapita ang Pagpaambit

Mahimo nimong hangyoon ang mga sakop sa klase nga mosulat ang matag usa diha sa piraso sa papel og usa ka kamatuoran nga ilang nakat-onan gikan sa mga kasulatan niining semanaha, lakip ang mga bersikulo sa kasulatan. Human makolekta ang mga papel, pagpili og pipila aron basahon ngadto sa klase. Unsaon nato sa paggamit kining mga kamatuoran sa atong kinabuhi?

icon sa pagtudlo

Itudlo ang Doktrina

Mateo 9

Si Jesukristo adunay gahom sa pag-ayo kanato sa pisikal ug sa espirituwal nga paagi.

• Daghan sa milagroso nga pagpang-ayo sa Manluluwas nagtudlo usab og espirituhanong mga kamatuoran. Aron matabangan ang mga sakop sa klase nga masabtan kini, mahimo nimong bahinon ang klase ngadto sa upat ka grupo ug tahasan ang matag grupo og usa sa mosunod nga mga tudling: Mateo 9:2–8; Mateo 9:18–19, 23–26; Mateo 9:20–22; ug Mateo 9:27–31. Hangyoa ang matag grupo nga tun-an ang milagro nga gihulagway diha sa ilang tudling ug dayon i-summarize kini alang sa klase. Unsa nga espirituwal nga mga kamatuoran ang atong makat-onan gikan niini nga mga milagro?

babaye nga mikab-ot aron makahikap sa sapot ni Jesus

Salig sa Ginoo, ni Liz Lemon Swindle

Mateo 10

Ang Ginoo mihatag sa Iyang mga sulugoon og gahom sa paghimo sa Iyang buhat.

• Ang sugo sa Manluluwas ngadto sa Iyang mga Apostoles makatabang kanato diha sa atong indibidwal nga mga responsibilidad. Ang mga sakop sa klase mahimong aduna nay mga ideya niini nga hilisgotan pinaagi sa ilang personal nga pagtuon; pananglitan, adunay kalihokan kabahin niining hilisgotan diha sa Dali, Sunod Kanako—Alang sa mga Indibidwal ug mga Pamilya. Dapita sila sa pagpakigbahin sa unsay ilang nakat-onan o magtrabaho diha sa gagmay nga mga grupo sa pagkompleto sa kalihokan diha sa klase. Dapita ang mga sakop sa klase sa pagpakigbahin og mga kasinatian sa dihang nabati nila ang gahom sa Manluluwas samtang ilang gituman ang ilang mga calling.

• Sa unsang paagi nga ang pagtuon sa sugo ni Kristo ngadto sa Iyang mga Apostoles diha sa Mateo 10 makatabang sa mga sakop sa imong klase aron makasabot sa tahas sa mga propeta ug mga apostoles sa bag-ong panahon? Mahimong makatabang ang pagtandi sa sugo sa Manluluwas ngadto sa Napulog Duha sa sugo nga gihatag ngadto sa Korum sa Napulog Duha ka mga Apostoles niini nga dispensasyon, nga makita diha sa “Dugang nga mga Kapanguhaan.” Tingali ang mga sakop sa klase mahimong mopaambit kon sa unsang paagi sila naimpluwensiya pinaagi sa pagpangalagad sa buhi nga mga Apostoles. Ihatag ang imong pagpamatuod bahin sa balaanong calling sa buhi nga mga propeta ug mga apostoles, ug dapita ang mga sakop sa klase sa paghatag sa ilang pagpamatuod.

Mateo 10:17–20

Kon kita anaa sa pagserbisyo sa Ginoo, kita Iyang dasigon kon unsa nga mga pulong ang atong isulti.

• Ang mga tawo mobati usahay og kakulba kon magtudlo o makig-istorya sa uban mahitungod sa ebanghelyo. Apan ang Ginoo misaad sa mga disipulo nga Siya motabang kanila aron masayod kon unsa ang isulti. Unsa ang kinahanglan natong buhaton aron makadawat sa gisaad nga tabang sa Ginoo alang sa atong kaugalingon? Dapita ang mga sakop sa klase sa pagbasa sa Mateo 10:19–20; Doktrina ug mga Pakigsaad 84:85; ug Doktrina ug mga Pakigsaad 100:5–8 aron makit-an ang mga tubag niini nga pangutana. Kanus-a nga ang Espiritu Santo mitabang kanimo nga mahibalo kon unsa ang isulti? Mahimo nimong ipaambit ang imong mga kasinatian ug dapita ang mga sakop sa klase sa pagpaambit sa ilang kagalingong kasinatian.

mga kapanguhaan nga icon

Dugang nga mga Kapanguhaan

Usa ka sugo ngadto sa mga Apostoles sa ulahing mga adlaw.

Sa dihang gitawag ang pipila sa unang mga sakop sa Korum sa Napulog Duha ka mga Apostoles niining dispensasyon, si Oliver Cowdery mihatag kanila og usa ka sugo nga susama sa usa nga gihatag ni Jesukristo diha sa Mateo 10. Siya miingon:

“‘Kinahanglan ninyong pakigbatokan ang tanang pagpihig [prejudice] sa tanang kanasoran. … Busa, pahimangnoan ko kamo nga ugmaron ninyo ang dakong pagpaubos, kay nasayod ako sa garbo sa tawhanong kasingkasing. Pagbantay, basin ang mga ulug-ulogan sa kalibotan modasig kaninyo. Pagbantay basin ang inyong mga pagbati mabihag sa kalibotanong mga butang. Himoang mag-una ang inyong pangalagad. … [Kini] gikinahanglan nga makadawat kamo og pagpamatuod gikan sa Langit para sa inyong kaugalingon, aron makapamatuod kamo sa kamatuoran. …

“‘… Kinahanglan ninyong dad-on kining mensahe ngadto niadtong nagkonsiderar sa ilang kaugalingon nga maalamon. Ug kadto mahimong molutos kaninyo; sila mahimong magtinguha sa inyong kinabuhi. Ang kaaway kanunayng nagtinguha sa kinabuhi sa mga sulugoon sa Dios. Mao nga, kinahanglan kamong mangandam sa tanang panahon sa pagsakripisyo sa inyong kinabuhi, kon gikinahanglan man kini sa Dios alang sa pagpadayon ug pagpalig-on sa Iyang kawsa. …

“Iya dayon silang gikuptan sa kamot sa tagsa-tagsa ug miingon, ‘Ikaw ba uban sa tibuok katuyoan sa kasingkasing moapil niining pagpangalagad, sa pagsangyaw sa ebanghelyo uban sa tanang kakugi kauban niining imong mga kaigsoonan, sumala sa kahulugan ug tinguha sa sugo nga imong nadawat?’ Ang matag usa mitubag sa pagsanong” (sa “Minutes and Blessings, 21 Pebrero 1835,” Minute Book 1, 159–161, 164, josephsmithpapers.org; panitik [spelling] ug panulbok [punctuation] gimoderno).

Pagpalambo sa Atong Pagtudlo

Pagpamatuod sa mga panalangin. Kon mohatag ka og pagdapit sa pagbuhat, ipamatuod ngadto sa imong mga tigkat-on nga makadawat sila sa mga panalangin nga gisaad sa Dios kon sila mobuhat uban sa hugot nga pagtuo sa Iyang mga pagtulon-an. Ang mga panalangin kinahanglang dili mao ang atong nag-unang pangpadasig alang sa pagkamasulundon, apan ang Langitnong Amahan nagtinguha sa pagpanalangin sa tanan Niyang mga anak. (Tan-awa sa Pagtudlo sumala sa Pamaagi sa Manluluwas, 35.)