Si Jesus nagtindog taliwala sa mga panganod

Be Not Afraid [Ayaw og Kahadlok], ni Michael Malm

Marso 13–19

Mateo 11–12; Lucas 11

“Papahulayon Ko Kamo”

Basaha ang Mateo 11–12 ug Lucas 11 atol sa semana sa dili pa ka magtudlo. Makatabang kini kanimo nga makadawat og pagpadayag kon unsaon pagtubag ang mga panginahanglan sa imong klase.

pagpaambit nga icon

Dapita ang Pagpaambit

Ang paggamit sa mga baroganan nga atong makit-an sa mga kasulatan ngadto sa atong mga kinabuhi mao ang usa ka importanting paagi sa pagsinati sa gahom sa pulong sa Dios. Awhaga ang mga sakop sa klase sa pagpaambit unsa ang ilang makit-an diha sa ilang pagtuon sa kasulatan niining semanaha nga ilang magamit ngadto sa ilang kinabuhi. Ang pagpaambit og ehemplo kon unsaon nimo sa paggamit ang mga kasulatan makatabang sa pagdasig sa mga sakop sa klase sa pagpaambit sa ilang kaugalingong mga ehemplo.

icon sa pagtudlo

Itudlo ang Doktrina

Mateo 11:28–30

Si Jesukristo mohatag kanato og pahulay kon kita mosalig Kaniya.

• Sa Mateo 11:28–30, ang Manluluwas nagtudlo nga Siya motabang kanato sa pagdala sa atong bug-at nga mga palas-anon kon kita modawat sa Iyang imbitasyon nga “Isangon ang akong yugo” (bersikulo 29). Aron sa pagtabang sa mga sakop sa klase nga mas masabtan kining saad, mahimo nimong ipakita ang usa ka hulagway sa usa ka yugo (tan-awa ang latid niining semanaha sa Dali Sunod Kanako—Alang sa mga Indibiduwal ug mga Pamilya) ug ipaambit ang mga kamatuoran sama niini: ang mga yugo gidesinyo sa pagtabang sa mga hayop nga madala ang bug-at nga karga o aron matuman ang buluhaton, ug ang mga yugo kasagaran gipahaom ngadto sa hayop. Unsa ang ikadugang niining mga detalye ngadto sa atong pagsabot sa Mateo 11:28–30? Unsa nga mga imbitasyon ang atong makit-an niining mga bersikulo? Unsa nga mga panalangin ang gisaad kanato? Mahimo usab nimong ipaambit ang gisaad ni Presidente Russell M. Nelson nga makit-an diha sa “Dugang nga mga Kapanguhaan.”

• Kitang tanan adunay mga palas-anon nga mapagaan pinaagi sa gahom ni Jesukristo. Aron sa pag-awhag og panaghisgotan mahitungod niini, mahimo nimong dapiton ang mga sakop sa klase sa pagbasa ug paghisgot sa Mateo 11:28–30 uban laing tawo diha sa klase. Mahimo sila nga maglakip og mga pangutana sama niini diha ilang mga panaghisgotan: Unsa ang ubang mga ehemplo sa mga palas-anon nga tingali dad-on sa usa ka tawo? Unsa ang kinahanglan natong buhaton aron moduol ngadto kang Kristo? Unsay ipasabot sa pagkuha sa yugo sa Manluluwas ngari kanato? Sa unsang paagi nga imong nabati ang Manluluwas mipagaan sa imong mga palas-anon samtang ikaw midangop ngadto Kaniya? Ang mga sakop sa klase tingali makakita og dugang nga mga ideya diha sa mensahe ni David A. Bednar “Makada[o]g sa Ilang mga Alantuson uban sa Kasayon” (Liahona, Mayo 2014, 87–90).

mga tawo nga nanan-aw sa mga disipulo nga naglakaw agi sa umahan sa trigo

The Disciples Eat Wheat on the Sabbath [Ang mga Disipulo Nangaon og Trigo diha sa Igpapahulay], by James Tissot

Mateo 12:1–13

Ang Igpapahulay mao ang usa ka adlaw sa pagbuhat og maayo.

• Sa ilang kadasig sa pagtuman nga mabalaan sa adlawng Igpapahulay, ang mga Pareseo mipatuman og higpit nga mga lagda ug mga tradisyon nga hinimo sa tawo, nga sa kataposan milibog sa ilang mga pagsabot sa tinuod nga katuyoan sa Igpapahulay. Aron sa pagsugod og usa ka panaghisgotan mahitungod kon nganong ang Ginoo naghatag kanato sa adlawng Igpapahulay, tingali magdapit ka og mga sakop sa klase sa pagrebyo sa Mateo 12:1–13 ug Hubad ni Joseph Smith, Marcos 2:26–27 (diha sa Bible appendix). Unsa ang gitudlo niini nga mga istorya mahitungod sa katuyoan sa Igpapahulay? Unsa nga dugang nga mga ideya mahitungod sa Igpapahulay ang atong maangkon gikan sa Exodo 31:16–17; Isaias 58:13–14; ug Doktrina ug mga Pakigsaad 59:9–13? Sa unsang paagi ang atong relasyon ngadto sa Manluluwas nausab samtang kita naningkamot sa pagtuman sa Iyang adlaw nga mabalaan?

• Samtang ang mga Pariseo naghatag og daghang detalyadong mga lagda kalabot sa Igpapahulay, ang Manluluwas nagtudlo og yano nga baroganan: “Ang atong Balaod nagtugot kanato sa pagtabang kang bisan kinsa sa Adlawng Igpapahulay.” (Mateo 12:12). Unsa pay laing mga baroganan nga makatabang kanato nga makatuman sa pagbalaan sa adlaw nga Igpapahulay? (tan-awa sa pamahayag ni Presidente Russell M. Nelson sa “Dugang nga mga Kapanguhaan”). Nganong ang baroganan mas epektibo man kay sa lista sa mga lagda samtang kita maningkamot sa pagpalambo og espirituwal nga pagpaningkamot sa kaugalingon?

• Sa mensahe ni Presidente Russell M. Nelson nga “Ang Igpapahulay usa ka Kahimut-an” (Liahona, Mayo 2015, 129–32) ug ang mga video uban sa tambag ni Elder Jeffrey R. Holland diha sa “Dugang nga mga Kapanguhaan” mahimong makadugang sa panaghisgotan mahitungod sa adlaw nga Igpapahulay.

mga kapanguhaan nga icon

Dugang nga mga Kapanguhaan

Giyugohan uban ni Jesukristo.

Si Presidente Russell M. Nelson nagtudlo: “Kamo makaduol ngadto kang Kristo aron mayugohan uban Kaniya ug sa Iyang gahom, aron nga kamo dili magbira sa palas-anon sa kinabuhi nga mag-inusara. Kamo nagbira sa palas-anon nga giyugo sa kinabuhi uban sa Manluluwas ug Manunubos sa kalibotan, ug sa kalit lang ang inyong mga problema bisan unsa ka grabe kini, mahimong mapagaan” (“The Mission and Ministry of the Savior: A Discussion with Elder Russell M. Nelson,” Ensign, Hunyo 2005, 18).

“Unsa man nga timailhan ang gusto nakong ihatag sa Dios?’

Si President Russell M. Nelson nagtudlo: “Kon kinahanglan nakong modesisyon nga ang usa ka kalihokan angay ba o dili angay alang sa Igpapahulay, mangutana lang ko sa akong kaugalingon, ‘Unsa man ang timailhan nga gusto nakong ihatag ngadto sa Dios?’ Kana nga pangutana nakapaklaro kaayo sa akong mga pagpili sa adlaw nga Igpapahulay” (“Ang Igpapahulay usa ka Kahimut-an”, Liahona,Mayo 2015, 130).

Ang mga panalangin sa pagtuman sa adlawng Igpapahulay.

Pagpalambo sa Atong Pagtudlo

I-awhag ang pagpaambit. “Ang matag indibidwal sa imong klase usa ka abunda nga tinubdan sa pagpamatuod, mga panab[o]t, ug mga kasinatian sa pagsunod sa ebanghelyo. Dapita sila sa pagpaambit ug pagbayaw sa usag usa” (Pagtudlo sumala sa Pamaagi sa Manluluwas, 5).