Tanaman nga Lubnganan

Abril 3–9

Pasko sa Pagkabanhaw

“O Kamatayon, Hain na ang Imong Pagkamadaugon?”

Samtang mangandam ka sa pagtudlo karong semanaha, ikonsiderar kon sa unsang paagi nga ang panaghisgotan sa imong klase bahin sa Dominggo sa Pasko sa Pagkabanhaw makaugmad og pagtuo kang Jesukristo ug sa Iyang Pag-ula.

pagpaambit nga icon

Dapita ang Pagpaambit

Pangutan-a ang mga sakop sa klase kon unsaon nila pagtubag sa mga pangutana sama sa “Unsa man ang Pag-ula ni Jesukristo?” ug “Unsaon man nako aron makadawat sa mga panalangin sa Pag-ula ni Kristo?” Dapita sila sa pagpaambit og bisan unsa nga mga kasulatan nga ilang nabasa karong semanaha nga makatabang sa pagtubag niining mga pangutana.

icon sa pagtudlo

Itudlo ang Doktrina

Si Jesukristo nagtubos kanato gikan sa sala ug kamatayon, naglig-on kanato diha sa atong mga kahuyang, ug naghupay kanato diha sa atong mga pagsulay.

• Nasabtan ba sa imong mga sakop sa klase nga si Jesus mohupay kanato diha sa atong mga pagsulay ug molig-on kanato diha sa atong mga kahuyang, ingon man sa pagtubos kanato gikan sa sala ug kamatayon? Usa ka paagi aron matabangan sila nga makadiskobre niining mga baroganan mao ang pagsulat niining mga pulong diha sa pisara: Sala, Kamatayaon, Mga Pagsulay, Mga Kahuyang. Ang matag sakop sa klase mahimong mobasa og usa sa mga kasulatan nga gilista diha sa “Dugang nga mga Kapanguhaan” ug mamalandong kon sa unsang paagi ang Manluluwas makatabang kanato sa pagbuntog o paglahutay niining mga butanga. Ang mga sakop sa klase mahimo nga mosulat kon unsay ilang nakat-onan gikan niining mga kasulatan ubos sa matag ulohan ug mopakigbahin sa ilang pagpamatuod bahin sa Manluluwas ug sa Iyang Pag-ula.

  Si Jesus diha sa krus

  Paglansang,ni Louise Parker

• Tingali ang usa ka yano nga butang nga gamiton sa leksiyon makatabang sa paghulagway sa kalainan tali sa pagkalimpyo gikan sa sala ug sa pagkahimong hingpit: Mahimo nimong isulat diha sa pisara ang unang pipila ka linya gikan sa Moroni 10:32, apan ilakip ang mga sayop sa spelling o grammar. Dapita dayon ang usa ka sakop sa klase sa pagpapas (apan dili korihian) ang mga sayop. Nakasulbad ba kini sa problema? Unsa nga mga leksiyon ang atong makat-onan gikan niining kasulatan ug niining leksiyon nga naggamit og butang mahitungod sa epekto sa Pag-ula sa Manluluwas ngari kanato? Kining pamahayag gikan ni Presidente Dieter F. Uchtdorf mahimong makatabang usab: “Kon ang kaluwasan nagpasab[o]t lamang og pagpapas sa atong mga sayop ug mga sala, niana ang kaluwasan—ingon sa kanindot niini—wala magtuman sa mga katuyoan sa Amahan alang kanato. Ang iyang tumong mas taas pa: Gusto Niya nga ang iyang mga anak mahimo nga sama Kaniya” (“Ang Gasa sa Grasya,” Liahona, Mayo 2015, 108).

• Ang mga estorya ug mga analohiya makatabang kanato nga mas masabtan ang Pag-ula ni Kristo. Mahimo nimong ipaambit ang usa ka istorya o analohiya gikan sa mga mensahe sa usa sa kinatibuk-ang komperensiya “Dugang nga mga Kapanguhaan.” Ang mga sakop sa klase mahimo dayon nga makapaambit og bisan unsang hunahuna o mga pagbati nila mahitungod sa Manluluwas ug sa Iyang Pag-ula alang kanato.

Mateo 28:1–10; Lucas 24:13–35; Juan 20:1–29; 1 Mga Taga-Corinto 15:3–8, 55–58

Ang mga saksi sa Bag-ong Tugon mipamatuod nga si Jesukristo mibuntog sa kamatayon.

• Ikonsiderar ang pagrebyo sa estorya sa kasulatan bahin sa unang Pasko sa Pagkabanhaw—ang Pagkabanhaw ni Jesukristo. Mahimo nimong dapiton ang usa ka sakop sa klase nga isaysay og usab ang estorya sa iyang kaugalingong mga pulong (tan-awa sa Juan 20:1–17).

• Tingali ang imong klase makabaton og mas lawom nga panabot bahin sa kaimportante sa mga saksi sa Pagkabanhaw ni Jesukristo kon ilang hunahunaon nga sila mga abodado o mga reporter sa mga balita nga nag-imbistigar sa giangkon nga si Kristo nabanhaw. Dapita sila sa pagpangita og mga tawo diha sa mga kasulatan kinsa magsilbi isip mga saksi (tan-awa sa Mateo 28:1–10; Lucas 24:13–35; Juan 20:19–29; 1 Mga Taga-Corinto 15:3–8, 55–58). Mahimo pa gani silang mosulat og mubo nga summary kon unsa kaha ang isulti niining mga tawhana kon magpamatuod diha sa korte o kon interbyohon alang sa usa ka report sa mga balita.

• Usa ka paagi aron mapalawman ang atong pagdayeg alang sa Pagkabanhaw sa Manluluwas mao ang paghunahuna kon unsaon nato sa pagpasabot ang atong mga gituohan ngadto sa uban. Unsaon sa mga sakop sa klase sa pagpakigbahin sa ilang mga pagpamatuod bahin ni Jesukristo sa mosunod nga mga sitwasyon: usa ka sakop sa pamilya ang na-diagnose nga dunay grabe nga sakit; usa ka higala ang nawad-an og minahal sa kinabuhi; usa ka silingan ang nangutana nganong magsaulog kamo og Pasko sa Pagkabanhaw. Awhaga sila sa pagtan-aw ngadto sa mga kasulatan (sama niadtong anaa sa “Dugang nga mga Kapanguhaan”) samtang magplano sila sa ilang mga tubag. Dapita ang pipila ka sakop sa klase sa pagpaambit sa ilang mga hunahuna.

mga kapanguhaan nga icon

Dugang nga mga Kapanguhaan

Mga kasulatan mahitungod sa Pag-ula ug Pagkabanhaw sa Manluluwas.

• Isaias 25:8; 53:3–6

• Juan 20:11–17

• Mga Taga-Roma 8:31–39

• 2 Nephi 9:5–12

• Mosiah 3:5–10

• Alma 7:10–14; 11:42–44

• 3 Nephi 11:8–17; 27:13–20

• Moroni 7:41

• Doktrina ug mga Pakigsaad 19:15–19

Mga mensahe mahitungod sa Pag-ula ug Pagkabanhaw sa Manluluwas.

• Dale G. Renlund, “Hunahunaa ang Pagkamaayo ug Pagkahalangdon sa Dios,” Liahona, Mayo 2020, 41–44

• Gerrit W. Gong, “Maayong Magbalantay, Kordero sa Dios,” Liahona, Mayo 2019, 97–100

• Sharon Eubank, “Kristo: Ang Kahayag nga Nagdan-ag Taliwala sa Kangitngit,” Liahona, Mayo 2019, 73–76

• Cristina B. Franco, “Ang Makaayo nga Gah[o]m ni Jesukristo,” Liahona, Nob. 2020, 60–62

Pagpalambo sa Atong Pagtudlo

Pagmahimong usa ka instrumento sa Espiritu. “Ang imong katuyoan isip usa ka magtutudlo dili ang paghimo og impresibo nga presentasyon apan sa pagtabang sa uban nga modawat sa impluwensiya sa Espiritu Santo, kinsa mao ang tinuod nga magtutudlo” (Pagtudlo sumala sa Pamaagi sa Manluluwas, 10).