Transpigurasyon ni Kristo

The Transfiguration [Ang Transpigurasyon], ni Carl Heinrich Bloch

Abril 10–16

Mateo 15–17; Marcos 7–9

“Ikaw Mao ang Mesiyas”

Usa sa imong nag-unang katuyoan isip usa ka magtutudlo mao ang pagtabang sa uban nga makapalig-on sa ilang hugot nga pagtuo diha ni Jesukristo. Hinumdomi kini samtang magtuon ka sa mga kasulatan niining semanaha. Unsay imong nakit-an nga makatabang sa mga sakop sa klase nga mas motuo pag-ayo diha Kaniya?

pagpaambit nga icon

Dapita ang Pagpaambit

Usa ka paagi nga imong maawhag ang mga sakop sa klase nga personal nga magtuon sa mga kasulatan ug uban sa ilang mga pamilya mao ang pagdapit kanila sa pagpaambit matag semana kon sa unsang paagi nga ang pagtuon sa mga kasulatan nakatabang kanila nga modawat og pagpadayag ug nakapanalangin sa ilang kinabuhi. Pananglitan, sa unsang paagi nga ang ilang pagtuon niining mga kapitulo nakaimpluwensiya sa mga pagpili nga ilang gihimo niining semanaha?

icon sa pagtudlo

Itudlo ang Doktrina

Mateo 16:13–17

Ang pagpamatuod bahin ni Jesukristo moabot pinaagi sa gipadayag.

• Aduna bay bisan kinsa sa mga sakop sa imong klase nga kinahanglang mopasabot ngadto sa usa ka tawo kon giunsa nila pagkahibalo nga ang ebanghelyo tinuod? Diha sa Mateo 16:13–17, unsa may gitudlo sa Manluluwas mahitungod kon sa unsang paagi kita makadawat og pagpamatuod? Mahimo nimong ipaambit kon giunsa ni Alma pag-angkon ang iyang pagpamatuod (tan-awa sa Alma 5:45–46) o unsay gitudlo sa Ginoo kang Oliver Cowdery mahitungod sa pagpadayag (tan-awa sa Doktrina ug mga Pakigsaad 6:14–15, 22–23; 8:2–3). Unsa kaha ang gisulti nila ni Pedro o ni Alma o ni Oliver Cowdery kon adunay tawo nga nangutana kanila kon giunsa nila pagkahibalo nga ang ebanghelyo tinuod?

• Mahimong adunay mga tawo sa imong klase nga nag-ampo alang sa personal nga pagpadayag apan wala masayod kon unsaon sa pag-ila niini kon moabot kini. Sa HearHim.ChurchofJesusChrist.org, imong makit-an ang mga video diin ang mga lider sa Simbahan mopaambit kon giunsa nila sa pag-ila ang tingog sa Ginoo. Mahimong motan-aw ka og usa o daghan pa niining mga video uban sa klase ug maghisgot kon unsa ang gitudlo sa mga video mahitungod sa pagdawat og pagpadayag. Unsa pay laing mga pagtulon-an o mga kasulatan nga mahunahunaan sa imong klase nga makatabang sa usa ka tawo nga makaila og personal nga pagpadayag? (Pananglitan, tan-awa sa 1 Mga Hari 19:11–12; Mga Taga-Galacia 5:22–23; Enos 1:1–8; Doktrina ug mga Pakigsaad 6:22–24; 8:2–3; 9:7–9.)

Mateo 16:13–19; 17:1–9

Ang mga yawe sa pagkapari gikinahanglan sa atong kaluwasan.

• Aron sa pagsugod og usa ka panaghisgotan mahitungod sa mga yawe sa pagkapari, mahimo kang mosulat og mga pakisayran nga sama ani diha sa pisara: Mateo 16:19; Doktrina ug mga Pakigsaad 107:18–20; 128:8–11; 132:18–19, 59; Joseph Smith—Kasaysayan 1:72; ug “Mga Yawe sa Pagkapari” sa Ang Giya ngadto sa mga Kasulatan (scriptures.ChurchofJesusChrist.org). Dayon dapita ang mga sakop sa klase sa pagbasa og usa o daghan pa sa mga tudling ug sa pagpaambit og butang nga ilang makat-onan gikan kanila mahitungod sa mga yawe sa pagkapari. Nganong nagkinahanglan kita sa mga yawe sa pagkapari?

• Aron matabangan ang mga sakop sa klase nga mapalig-on ang ilang mga pagpamatuod sa pagpahiuli sa mga yawe sa pagkapari sa ulahing mga adlaw, mahimo nimong hangyoon ang katunga sa klase sa pagtuon sa Mateo 17:1–9 ug ang laing katunga sa pagtuon sa Doktrina ug mga Pakigsaad 110. Mahimo dayon silang mopaambit sa usag usa kon unsa ang ilang nakat-onan ug isulat ang pagkasusama tali sa duha ka mga istorya.

estatuwa ni Pedro nga nagkupot sa mga yawe

Ang mga yawe sa pagkapari mao ang awtoridad sa pagdumala sa paggamit sa pagkapari.

Marcos 9:14–30

Kon magtinguha og mas dako nga hugot nga pagtuo, kinahanglan gayod kita nga magsugod sa hugot nga pagtuo nga anaa kanato.

• Si Elder Jeffrey R. Holland migamit sa istorya bahin sa usa ka amahan nga nagtinguha og pagkaayo alang sa iyang anak nga lalaki sa pagtudlo kon unsaon nato pagduol ang Ginoo kon atong gibati nga ang atong pagtuo dili igo (tan-awa sa “Ginoo, Nagatuo Ako,” Liahona, Mayo 2013, 93–95). Human sa pagbasa sa Marcos 9:14–30 isip usa ka klase, mahimo kamo nga maghisgot sa tulo ka obserbasyon ni Elder Holland (tan-awa sa “Dugang nga mga Kapanguhaan”).

mga kapanguhaan nga icon

Dugang nga mga Kapanguhaan

Tulo ka obserbasyon nga makatabang kanato nga makabaton og dugang nga hugot nga pagtuo.

Human sa pagsaysay og usab sa istorya nga makita diha sa Marcos 9:14–29, si Elder Jeffrey R. Holland nagtudlo:

“Ang unang obserbasyon kabahin niini nga asoy mao nga kon mag-atubang og hagit sa [hugot nga] pagtuo, ang amahan mopahayag pag-una sa iyang kalig-on ug dayon moila sa iyang limitasyon. Ang iyang inisyal nga deklarasyon positibo ug walay pagduha-duha: ‘Nagatuo ako.’ Moingon ko sa tanan nga nangandoy og mas lig-on nga [hugot nga] pagtuo, hinumdomi kining tawhana! Sa mga higayon sa kahadlok o pagduha-duha o sa malis[o]d nga mga panahon, gamita ang hugot nga pagtuo nga napalambo na ninyo, bisan og limitado kini. …

“Ang ikaduha nga obserbasyon usa ka kalahian sa nahauna. Kon moab[o]t ang problema ug mga pangutana, ayaw sugdi ang inyong pagpangita sa pagtuo pinaagi sa pagsulti kon unsay wala ninyo, mosangpot lang kini sa inyong ‘pagkawalay pagtuo.’ … Wala ko magsulti ninyo nga magpakaaron-ingnon nga dunay [hugot nga] pagtuo nga wala kaninyo. Naghangyo ko ninyo nga magmatinud-anon sa pagtuo nga anaa na kaninyo. …

“Katap[o]sang obserbasyon: kon ang pagduha-duha o kalis[o]d moab[o]t, ayaw kahadlok sa pagpangayo og tabang. Kon gusto kita sa mapainubsanon ug matinuoron nga paagi sama niini nga amahan, matabangan kita” (“Ginoo, Nagatuo Ako,” Liahona, Mayo 2013, 93–94).

Pagpalambo sa Atong Pagtudlo

Pangutana og mga pangutana nga makadapit og pagpamatuod. Ang pagpangutana nga makaawhag sa mga sakop sa klase sa paghatag sa ilang mga pagpamatuod mahimong usa ka epektibong paagi sa pagdapit sa Espiritu. Pananglitan, kon maghisgot sa Mateo 16:13–17, mahimo nimong ipangutana, “Unsa ang inyong nakat-onan mahitungod sa Manluluwas nga nakapalig-on sa inyong pagpamatuod bahin Kaniya isip ang Manluluwas?” (Tan-awa sa Pagtudlo sumala sa Pamaagi sa Manluluwas, 32.)