ang maayong Samarianhon

The Good Samaritan [Ang Maayong Samarianhon], ni Dan Burr

Abril 17–23

Mateo 18; Lucas 10

“Unsay Kinahanglan Kong Buhaton aron Ako Makadawat sa Kinabuhing Dayon?”

Basaha ang Mateo 18 ug Lucas 10, ug i-rekord ang imong espirituwal nga mga impresyon. Sa pagdawat nimo og mga impresyon, tingali mangutana ka, sama sa gisugyot ni Elder Richard G. Scott, “Aduna pa bay dugang nga kinahanglan nakong masayran?” (“Aron Makabaton og Espirituhanong Giya,” Liahona, Nob. 2009, 6).

pagpaambit nga icon

Dapita ang Pagpaambit

Kining mga kapitulo naglangkob og daghang ehemplo sa mga pagtulon-an sa ebanghelyo nga lahi kay sa unsay gitudlo kanato sa kalibotan. Tingali ang mga sakop sa klase mahimong mopaambit og pipila ka mga ehemplo nga ilang makit-an sa ilang pagbasa niining semanaha. Sa unsa nga paagi ang Ginoo mopanalangin kanato kon kita mogamit sa Iyang mga pagtulon-an?

icon sa pagtudlo

Itudlo ang Doktrina

Mateo 18:21–35

Kinahanglan gayod kitang mopasaylo sa uban kon gusto kitang makadawat og kapasayloan gikan sa Ginoo.

• Unsaon nimo paggamit ang sambingay sa walay kalooy nga ulipon sa pagdasig sa mga sakop sa klase nga mahimong mas mapasayloon? Tingali mahimo nimong isulat ang mga pangutana sama sa mosunod diha sa pisara ug dapita ang mga sakop sa klase sa pagpamalandong niini samtang ang usa ka tawo mosaysay pag-usab sa sambingay: Kinsa ang girepresentahan sa hari? Kinsa ang girepresentahan sa walay kalooy nga ulipon? Kinsa ang girepresentahan sa isigka ulipon? Unsa ang girepresentahan sa mga utang? Dapita ang mga sakop sa klase sa pagpaambit kon unsa ang mga mensahe nga anaa sa sambingay alang kanila mismo. (Tan-awa usab sa “Dugang nga mga Kapanguhaan.”)

• Mahimo nimong dapiton ang klase sa paghimo og usa ka pagpahiangay sa sambingay sa walay kalooy nga ulipon nga nagtudlo sa samang mga leksiyon mahitungod sa pagpasaylo gamit ang modernong mga sitwasyon ug mga detalye. (Ikonsiderar ang pagpabuhat nila niini diha sa mga grupo.) Hisgoti kon sa unsang paagi nga ang sambingay mitubag sa pangutana ni Pedro kon kapila siya kinahanglang mopasaylo.

karaan nga mga sinsilyo

Namulong si Jesus bahin sa kwarta ug utang sa pagtudlo mahitungod sa pagpasaylo.

Lucas 10:25–37

Aron makaangkon og kinabuhing dayon, kinahanglang higugmaon gayod nato ang Dios ug ang atong mga silingan.

• Ania ang usa ka ideya nga mahimong makahatag sa mga sakop sa klase og bag-ong panglantaw sa sambingay bahin sa maayong Samarianhon: Dapita sila sa pagpakaaron-ingnon nga nag-imbestigar sila og kaso sa pagdagmal ug pagpanulis diha sa dalan sa tunga-tunga sa Jerico ug Jerusalem. Hangyoa ang pipila ka sakop sa klase nga moadto sa klase nga andam sa pagrepresentar sa lain-laing mga tawo diha sa sambingay ug maghisgot mahitungod sa ilang kalambigitan sa kahimtang. Pananglitan, nganong wala man mohunong ang sacerdote ug ang Levita aron tabangan ang naangol nga tawo? Nganong mihunong man ang Samarianhon? Unsa nga mga hunahuna ang madugang sa tigdumala sa balay nga abutanan? Unsay gibati sa naangol nga tawo mahitungod sa matag usa niadtong ubang mga tawo? Siguroa nga ang panaghisgotan makapadasig sa mga sakop sa klase nga mahimong sama sa maayong Samarianhon ug sa tigdumala sa balay nga abotanan ug malikayan nga mahisama sa sacerdote ug Levita.

• Sa unsang paagi nga ang sambingay sa maayong Samarianhon nakatubag sa mga pangutana nga gipangutana bahin ni Jesussa Lucas 10:25–29? Dapita ang mga sakop sa klase sa paghisgot mahitungod sa mga higayon sa dihang mibati sila sama sa “may usa ka tawo” (bersikulo 30) nga nagkinahanglan kaayo og tabang. Sa unsang paagi nga ang tabang miabot? Sa unsang paagi nga kita isip mga sakop sa ward magtambayayong aron sa pagtabang sa uban, sama sa gibuhat sa maayong Samarianhon ug sa tigdumala sa balay nga abotanan?

Lucas 10:38–42

Atong mapili “ang maayong bahin” pinaagi sa paghimo og inadlaw nga mga pagpili nga modala ngadto sa kinabuhing dayon.

• Human mabasa ang Lucas 10:38–42 isip usa ka klase, mahimo nimong pangutan-on ang mga sakop sa klase kon unsa kaha ang ilang reaksyon ngadto sa tambag sa Manluluwas kon anaa pa sila sa dapit ni Marta. Sa unsang paagi kaha nga kining kasinatian nakaapekto sa ilang umaabot nga mga pagpili? Unsaon nato pagkahibalo kon unsa nga mga butang sa atong kaugalingong kinabuhi ang angayan og dugang panahon ug pagtagad? Ang mga sakop sa klase mahimong mangita sa mensahe ni Presidente Dallin H. Oaks “Maayo, Mas Maayo, Labing Maayo” (Liahona, Nob. 2007, 104–8) aron mangita sa tambag nga makatabang kanila.

mga kapanguhaan nga icon

Dugang nga mga Kapanguhaan

Ang mga utang diha sa sambingay sa walay kalooy nga ulipon.

Sa pagkomentrayo sa mga utang mga giutang diha sa sambingay sa walay kalooy nga ulipon, si Elder Jeffery R. Holland miingon:

“Adunay managlahing opinyon tali sa mga eskolar kabahin sa bili sa salapi nga gihisgotan dinhi—ug pasensiya na nga kwarta sa U.S. ang hisgotan—apan aron sayon ang pagkwenta, kon ang mas gamay, wala mapasaylo nga 100 ka denario nga utang, maingon ta, $100 sa kasamtangang panahon, niana ang 10,000 ka talanton nga utang nga dali kaayong gipasaylo moabot na og $1 billion—o sobra pa!

Isip personal nga utang, dako kaayo kana nga kantidad—hingpit nga lapas sa atong panabot. (Walay makapamalit og ingon niana ka dako!) Hinoon, alang sa katuyoan niini nga sambingay, gidah[o]man nga dili kini matukib; kini gidah[o]man nga lapas kini sa atong abilidad sa pagsab[o]t, gawas pa nga lapas kini sa atong abilidad sa pagbayad. Kana tungod kay dili kini istorya kabahin sa duha ka ulipon nga naglalis diha sa Bag-ong Tugon. Istorya kini mahitungod kanato, ang napukan nga tawhanong pamilya—ang tanan mga mortal nga utangan, malapason, ug binilanggo. Ang matag usa kanato utangan, ug ang hukom mao ang pagkabilanggo sa matag usa kanato. Ug didto kitang tanan magpabilin unta kon dili pa tungod sa grasya sa atong Hari, kinsa mipalingkawas kanato tungod kay Siya nahigugma kanato ug “[mi]bati og kalooy ngari kana[to].”[Doktrina ug mga Pakigsaad 121:4]” (“Busa, Kamo Kinahanglan Magmahingpit—sa Katap[o]san,” Liahona, Nob. 2017, 41).

Pagpalambo sa Atong Pagtudlo

Sunda ang ehemplo sa Manluluwas. Samtang magbasa ka sa mga istorya bahin sa Manluluwas nga nagtudlo diha sa Bag-ong Tugon, pangita og mga leksiyon diha sa Iyang ehemplo nga makatabang kanimo aron mahimong mas maayo nga magtutudlo. Pananglitan, sa Lucas 10:25–37, unsa may gibuhat ni Jesus aron sa pagtudlo sa abogado kon unsaon pagbaton og kinabuhing dayon?