tamata cakacaka ena were ni vaini

8-14 ni Me

Maciu 19–20; Marika 10; Luke 18

“A Cava Tale sa Vo Vei Au?”

Ni ko vakavakarau mo veivakavulici, vakasamataka ena masumasu na sala mo vukei ira kina na lewe ni kalasi mera wasea na veika era sa vulica se vakila ena nodra vuli vakai ira.

ivakatakilakila ni veiwasei

Sureta na Veiwasei

Ena rawa ni veivuke ena so na gauna me veivosakitaki na veika era sa sitava na lewe ni kalasi ena vulici ni kosipeli yavutaki e vale. Na veika cava soti era sa rawata e rawa me ra wasea? Na veivakataotaki se ibolebole cava era sa sotava tiko? Na cava e rawa ni ra veivakasalataki kina vakai ira?

ivakatakilakila ni veivakavulici

Vakavulica na iVunau

Maciu 19:3–9

Na nodrau vakawati na tagane kei yalewa sa yaga ki na Nona ituvatuva tawamudu na Kalou.

• Sa levu tikoga na vakasama ni kena sa gole tani mai na ka dina tawamudu na vakamau. Ni gadrevi me vukei nomu kalasi mera vulica na nanuma ni Kalou baleta na vakamau, mo sureta mera wilika na Maciu 19:3–9 ka vola ena vava ni volavola na dina era sa kunea baleta na vakamau. Sa rawa talega mera vola na ikuri ni dina era kunea ena kena oqo: Vakatekivu 1:27–28; 1 Korinica 11:11; Vunau kei na Veiyalayalati 42:22; 49:15–17; 131:1–4; 132:19; kei na Mosese 3:18, 21–24. Era sa vaqaqacotaki vakacava na dina oqo e “Na Matavuvale: Ai Vakaro ki Vuravura Raraba”? (ChurchofJesusChrist.org

Maciu 20:1–16

Na tamata kece ena rawa ni ciqoma na veivakalougatataki ni bula tawamudu, veitalia na gauna cava ga era ciqoma kina na kosipeli.

• Na cava ena vukea na nomu kalasi ni ra vakayagataka na ivakavuvuli ni vosa vakatautauvata ni tamata cakacaka ena were ni vaini? Sa rawa mo sureta e vica na lewe ni kalasi mera na dramataka na vosa vakatautauvata ki na kalasi. Ni oti na drama, sa rawa vei ira era matataki ira na tamata cakacaka mera wasea na nodra nanuma me baleta na isau era sa ciqoma kei na vuna. Na cava e tukuna tiko na vosa vakatautauvata oqo baleta na matanitu vakalomalagi? Na ikuri ni veivakararamataki cava eda rawata mai na vosa vakatautauvata oqo ena itukutuku nei Elder Jeffrey R. Holland e “Na Tamata Cakacaka ena Were ni Vaini”? (Liaona, Me 2012, 31–33).

Maciu 19:16–22; Marika 10:17–27

Ena dusimaki keda vakavoleka Vua na iVakabula ni da kerea na Nona veivuke.

• O na vukea vakacava na kalasi mera kila ka vakayagataka na ivakavuvuli mai na italanoa nei cauravou vutuniyau? Dua na sala o ya mera na wilika na Marika 10:17–27 ka raica ke ra sa bau vakanananu beka vakataki cauravou vutuniyau. Na cava sa vukei keda me da muria na ivakasala ni iVakabula ena gauna mada ga e dredre kina? Era na tuvakarau tu beka na lewe ni kalasi mera wasea na gauna era a taroga kina “A cava tale sa vo vei au?” (Maciu 19:20) ka ciqoma e dua na veivakauqeti vakayalo me torocake? Me vukei ira na lewe ni kalasi era na yalolailai ena nodra vakanamata kina veika e sega vei ira, sa rawa mo wasea na itukutuku ena “iKuri ni iVurevure.”

• Era sa na rairai wilika beka na lewe ni kalasi e dua na itukutuku ni koniferedi ka semati ki na veitikina oqo me vaka e vakaturi ena Lako Mai, Mo Muri Au—Baleta na Tamata Yadua kei na Matavuvale . Sureti ira me ra wasea na veika era sa cakava.

tamata yalomalumalumu kei na Farisi

Na Dau Kumuna na iVakacavacava sa Veivutuni kei Koya na Farisi sa Vakadonui Koya Ga ena Vale Tabu, mai vei Frank Adams

Luke 18:9–14

E dodonu meda nuitaka ga na loloma veivueti ni Kalou, sega ni noda ivalavala dodonu.

• Na vosa vakatautauvata ni iVakabula ni vakatauvatana na masu ni dua na Farisi kei koya sa dau kumuna na ivakacavacava ena vukea mo laveta cake na vakasama sa kerea tiko na Turaga vei ira era vakasaqara mera muri Koya. Me vukea na kalasi mera vakayagataka na vosa vakatautauvata oqo nikua, mo sureta mera vola tale na masu nei Farisi ena sala sa vakayagataki tu nikua ia me tukuna tikoga na itovo o ya. Mera na cakava talega ena masu nei dau kumuna na ivakacavacava ka wasea na veika era sa vola. E sema vakacava na tikina e 15–17 kei na18–24 ki na ka e vakavulica na iVakabula ena vosa vakatautauvata oqo? Ena rairai veivuke na vosa oqo baleta na veitikina oqo maivei Elder Dale G. Renlund: “E matata na itukutuku vei keda: sa toro voleka vua na Kalou na tamata ivalavala ca sa qai veivutuni mai vua na tamata sa vakadonui koya ka vakacacana na tamata ivalavala ca” (“Noda iVakatawa Vinaka,” Liaona, Me 2017, 31).

ivakatakilakila ni ivurevure

iKuri ni iVurevure

Meda kakua ni dokadoka se boletaki keda.

E vakavulica o Elder D. Todd Christofferson:

Kevaka eda taroga ena yalodina, “Na cava tale sa vo vei au?” Ena sega ni laivi keda na Kalou me da vakilakila, ia ena loloma ena sauma o Koya ena vuku ni noda bulamarau. Ka na solia vei keda o koya na inuinui.

Oqo e dua na sasaga veirawai, ka na dredre sara vakalevu kevaka eda sasaga duadua ki na yalosavasava. Na dina lagilagi sai koya eda sega ni tiko duadua. E tu vei keda na loloma ni Kalou, na loloma soliwale nei Karisito, na vakacegu kei na veituberi ni Yalo Tabu, kei na nodra veitokani kei na veivakayaloqaqataki na itokani Yalododonu ena isoqosoqo i Karisito. Me da kakua ni nanuma ni sa rauti keda na vanua eda sa toka kina, ia me da kakua talega ni yalolailai” (“Na Madrai ni Bula sa Lako Sobu mai Lomalagi,” Liaona, Nove. 2017, 39).

Vakatorocaketaki ni Noda Veivakavulici

E gadreva tu na Kalou na nomu taledi kei na gugumatua duatani. “Sa na rawa ni ko vakalougatataki ira na luvena na Kalou ena nomu vakayagataka na nomu dau lomani ira na tani, na isolisoli sa solia vei iko na Kalou kei na veika o sa sotava ena nomu bula. Ni ko sa veiqaravi ena yalodina ka vaqara na veivuke ni Kalou, ena vakalevulevui iko ko Koya, ka na tubu na nomu rawata mo vakavulica na kosipeli ena ivakarau ni iVakabula” (Veivakavulici ena iVakarau ni iVakabula, 5).