mokota voli na luvena tagane o tamana

Na Gone Cidroi, mai vei Liz Lemon Swindle

1-7 ni Me

Luke 12–17; Joni 11

“Tou Mai Reki Vata; Niu sa Kunea na Noqu Sipi ka a Yali”

Vakavakarau ena nomu vulica ena masumasu na Luke 12–17 kei na Joni 11. Na “sipi cava sa yali” ena nomu kalasi e vakasamataki rawa? Vakayagataka na Lako Mai, Mo Muri Au—Me Baleta na Tamata Yadua kei na Matavuvale kei na ituvatuva oqo ni ko vakasaqara na veidusimaki ni Turaga mo sotava vinaka kina na nodra gagadre na lewe ni kalasi, ni ra sega mada ga ni tiko ena kalasi.

ivakatakilakila ni veiwasei

Sureta na Veiwasei

Na cakava e tiki bibi ni vuli, mo sureta kina na lewe ni kalasi mera wasea nodra digitaka na ka mera bulataka era sa vulica oti mai na ivolanikalou ena macawa oqo.

ivakatakilakila ni veivakavulici

Vakavulica na iVunau

Luke 14: 15–24

E sega na iulubale vinaka me cakitaki kina na kosipeli.

• Ni gadrevi me vukei na lewe ni kalasi mera vulica na vosa vakatautauvata ni kana vata cecere, mera raitayalotaka ni ko sureti ira ki na dua na kana magiti. Mera qai wasea na vuna eso era na tiko kina se sega. Wilika vata na Luke 14:15–24 ka veivosakitaka na nodra iulubale na tamata era tukuni tiko ena vosa vakatautauvata ni ra sa sureti ki na kana magiti e matataka tiko na kalougata ni kosipeli. Na cava era vakaiulubaletaka na tamata nikua era sega ni ciqoma kina na veisureti ni iVakabula mera ciqoma na veivakalougatataki ni Tamada Vakalomalagi? E rawa mera wasea na lewe ni kalasi na nodra kalougata ni ra sa cakava na solibula eso me rawa ni ra bulataka kina eso na ivakavuvuli ni kosipeli.

Luke 15

Eda rawa ni da vakasaqarai ira sa yali tu ka reki vata kei Tamada ni ra sa lesu mai.

• O na solia vakacava vei ira na lewe ni kalasi na madigi me ra wasea na veika era sa vulica me baleta na italanoa vakaibalebale e tolu ena Luke 15? Sa rawa mo lesia ki na lewe ni kalasi yadua e dua na vosa vakatautauvata me railesuva. Sa rawa mera vakasaqara ka wasea na isau ni taro vakaoqo: Na vosa cava ena vosa vakatautauvata e vakaraitaka na nona nanuma na Tamada Vakalomalagi baleti ira sa yali tu? Na cava era vakatura tiko na italanoa vakaibalebale me baleta na sala meda dodoliga yani kina vei ira kece na luve ni Kalou? Sa rawa mera wasea na lewe ni kalasi na sala sa kunei ira kina na iVakabula ni ra sa vakila ni ra sa yali.

• Na lagati vata ni “Talei Vua na iVakatawa” (Serenilotu, naba 130) ena vakaibalebaletaka cake na veivakavulici ni vosa vakatautauvata oqo.

• Ni o ni railesuva na italanoa vakaibalebale ni gone cidroi, ena yaga vei ira na lewe ni kalasi me ra vakanamata ena vosa, ivalavala, kei na nodra vakabauta na tamata yadua ena vosa vakatautauvata. Na cava eda vulica mai vei ira yadua? E rawa ni ra vola e dua na ka a rawa ni itinitini ni italanoa vakaibalebale ka duatani kina na nona itovo na cauravou qase vei tacina. Na ivakasala cava nei tama ena vosa vakatautauvata e vakavulica meda itovo vakacava vei ira sa yali tu kei ira sa lesu mai ki na kosipeli? (Raica talega na itukutuku nei Elder Jeffrey R. Holland ena “iKuri ni iVurevure.”) Se mo kerea na lewe ni kalasi mera raitayalotaka ni ra sa tama ena vosa vakatautauvata oqo. Na ikuri ni vakasala cava era na solia vei cauravou qase me vukea nona rekitaki ira sa toso cake se rawa-ka tiko?

Luke 17: 11–19

Na yalovakavinavinaka baleta noqu veivakalougatataki e kauti au voleka Vua na Kalou.

• Sureti ira na lewe ni kalasi me ra wasea na veika era sa vulica me baleta na vakavinavinaka mai na nodra vulica na Luke 17:11–19 kei na vidio “President Russell M. Nelson on the Kaukauwa Veivakabulai ni Vakavinavinaka” (ChurchofJesusChrist.org). A vakalougatataki vakacava na vukavuka yalo vakavinavinaka ena nona vakaraitaka na nona vakavinavinaka? Eda na vakalougatataki vakacava ni da vakaraitaka na vakavinavinaka? E rawa ni ra vakatura na lewe ni kalasi na sala eso eda rawa ni vakaraitaka kina na noda vakavinavinaka vua na Kalou kei ira na tani.

Joni 11:1–46

Ko Jisu Karisito na Tucaketale kei na Bula.

• Dua na sala me dikevi kina na Joni 11:1–46 oya me kerei na lewe ni kalasi mera wilika na veitikina vakaveitaravi ka sureta mera cegu ni ra kunea na ivakadinadina ni vakabauti Jisu Karisito. Sa rawa talega mo kerei ira na lewe ni kalasi mera vakasamataka na nodra rai na tamata era vakaitavi kina—oka kina na iVakabula, iApositolo, Marica, Meri, kei Lasarusa. Na cava e rawa ni da vulica mai vei ira yadua? Sa rawa mera wasea na lewe ni kalasi na gauna a vaqaqacotaki kina na nodra vakabauti Jisu Karisito ena gauna ni veivakatovolei.

ivakatakilakila ni ivurevure

iKuri ni iVurevure

Na vuli mai vua e dua tale na cidroi.

A vakadikeva oqo o Elder Jeffrey R. Holland me baleta na tuakai gone cidroi: “Na gonetagane oqo e sega soti ni cudruvaka ni sa lesu mai vale o koya ka dua me vaka na nona cudruvaka na nodrau marautaka na nona itubutubu. Se bera tiko ni yacova yani na yalololoma kei na loloma veivueti, na rai ni yalololoma me raica ni oqo e sega ni lesumai ni dua na meca. Oqo na tacina. Ni a vakamasuti koya o tamana me raica, ni sa mate sa qai bula tale. Sai koya e dua sa yali ka sa qai kune tale” (Na Gonecidroi Tale Kadua,” Ensign, Me 2002, 63).

Vakatorocaketaki ni Noda Veivakavulici

Laki kauti koya mai. Me vakataka na ivakatawa ena vosa vakatautauvata ni iVakabula (raica na Luke 15:4), “mo laki kauti ira mai era sa yali tiko mai na nomu kalasi. Na nomu madigi mo veivakavulici ka laveta cake na lewe ni kalasi ka vukei ira me ra lako mai vei Karisito e teteva yani na taudaku ni rumu ni kalasi ka uabaleti ira era dau tiko ena kalasi” (Veivakavulici ena iVakarau ni iVakabula,,8).