Na iKarua ni Lako Mai,, mai vei Harry Anderson

22-28 ni Me

Josefa Simici—Maciu 1; Maciu 24–25; Marika 12–13; Luke 21

“Na Luve ni Tamata ni sa Lako Mai”

Nanuma me tekivutaki nomu vakavakarau ni veivakavulici mo wilika ka masulaka na Josefa Simici—Maciu 1; Maciu 24–25; Marika 12–13 kei na Luke 21. Mo vakasaqara vakai iko na veivakauqeti, ka taleva tale na ituvatuva oqo me baleta na ikuri ni vakasama.

Sureta na Veiwasei

Vola ena vava ni volavola na vei italanoa vakatautauvata ni iVakabula e kune ena veitikina ka wiliki mai ena macawa oqo, me vakataka na vu ni lolo, na tamata vinaka kei koya na daubutako, ko iratou na italai yalodina kei ira na italai ca, ko iratou na goneyalewa le tini, na taledi, ka vakakina na italanoa ni sipi kei na me. Kerei ira na lewe ni kalasi mera wasea na dina era sa vulica mai ena vei italanoa vakatautauvata oqo ena vukei ira ena nodra vakavakarau ki na iKarua ni Nona Lako Mai na Turaga. Na cava era sa cakava mera bulataka kina na dina oqo ena nodra bula?

Vakavulica na iVunau

Josefa Simici—Maciu 1:21–37

Ena vukei keda na kena parofisaitaki mai na iKarua ni Nona Lako mai na iVakabula meda sotava kina na veisiga ni mataka ena vakabauta.

• Ena dredre toka vei ira eso na lewe ni kalasi mera kila vakavinaka na ivakatakilakila ni iKarua ni Nona Lako Mai na iVakabula. Ena rawa ni veivuke vei ira ke ra cakacaka vata vakailawalawa mera vakasaqara na vei ivakatakilakila ena Josefa Simici-Maciu 1:21-37. Ena rawa talega ni vukei ira mera kila vakavinaka na bibi ni vei ivakatakilakila oqo ke vaka mera vakatauvatana ki na ivakatakilakila ni gaunisala. Na cava era rui bibi kina na vei ivakatakilakila ni gaunisala? Era tautauvata vakacava kei na ivakatakilakila ni gaunisala na ivakatakilakila ni iKarua ni Lako Mai? Era sa duidui vakacava? E rawa mo solia ki na vei ilawalawa yadua na tikini pepa e droinitaki tu kina na vei ivakatakilakila ni gaunisala ka mera qai vola ena vei tikini pepa yadua eso na ivakatakilakila ni iKarua ni Nona Lako Mai. Mera qai wasea na cava era sa kunea, ka sureti ira na lewe ni kalasi mera veivosakitaka na ivakadinadina ni vei ivakatakilakila oqo e vuravura nikua.

Josefa Simici—Maciu 1:26–27, 38–55; Maciu 25:1–13

E dodonu meda na vakavakarau tiko ki na iKarua ni Nona Lako Mai na iVakabula.

• Ena rawa ni veivuke vei ira na lewe ni kalasi na vei italanoa vakatautauvata ka tiko ena Josefa Simici—Maciu 1:26–27, 38–55kei na Maciu 25:1–13mera kila kina na kena bibi ni nodra vakavakarau yani ki na iKarua ni Nona Lako Mai. Sureti ira na lewe ni kalasi mera vakasaqara na veitikina oqo ka wasea na ka era nanuma ni sureti keda tiko kina na iVakabula meda cakava. E solia o Elder David A. Bednar e dua na ivakadewa ni italanoa vakatautauvata ni tini na goneyalewa ena rawa me veivuke (raica na “iKuri ni iVurevure”). Na cava na vuna e rui bibi kina meda vakila vakataki keda nida sa saumaki mai? Meda cakava vakacava oqo? Na cava e kuria na Vunau kei na Veiyalayalati 45:56–57meda kila vakavinaka kina na italanoa vakatautauvata oqo?

• Ni o vulica me baleta na lesu mai ni iVakabula, sa rawa mo wilika se lagata vata na serenilotu me baleta na iKarua ni Lako Mai (raica na “Jisu Karisito—iKarua ni Lesu Mai ” ena ituvatuva vakamatanivola ni ulutaga ena daku ni serenilotu).

Maciu 25:14–46

Ena iOtioti ni Veilewai, eda na dui soli itukutuku kina vua na Turaga me baleta na noda dui bula yadudua.

• Na italanoa vakatautauvata me baleta na taledi ka vakakina na italanoa vakatautauvata ni sipi kei na me ena rawa ni vakauqeti keda meda nanuma lesu kina na itukutuku ni noda bula meda na solia vua na Turaga ena iOtioti ni Veilewai. E rawa mo ni wilika vata na italanoa vakatautauvata ka sureti ira yadudua na lewenikalasi mera wasea e dua na taro ena rawa ni taroga na iVakabula ena gauna eda na lewai kina me baleta na noda bula. Solia e dua na gauna vei ira na lewe ni kalasi mera tuvanaka nodra na cakacakataka na veivakauqeti era sa ciqoma ena gauna ni veivosaki.

  

  E vakayagataka na Karisito na sipi kei na me me vakavulica na iOtioti ni Veilewai (raica na Maciu 25:31–33).

• Ni gadrevi me vakauqeti na veivosaki baleta na Maciu 25:34–40, mo sureti ira na lewe ni kalasi mera wasea na ivakaraitaki ni so na tamata era vakaraitaka na yalololoma e vakamacalataki tiko ena veitikina oqo. Solia na gauna mera vakasamataka vakatitobu se o cei soti beka ena gadreva na nodra veiqaravi. Na sala cava soti e rawa nida muria mera na vakani kina ko ira era viakana, mera vakaisulutaki kina na luvaiwale, ka ra sikovi talega kina na tauvimate?

iKuri ni iVurevure

Na waiwai ni saumaki vou.

E vakatura o Elder David A. Bednar na ivakadewa oqo ni italanoa vakatautauvata me baleta e le tini na marama:

“Raica na waiwai oqo ni sa waiwai ni saumaki mai [raica na Maciu 25:4–9]. …

“Eratou a kocokoco li na goneyalewa vuku ena nodratou sega ni via wasea, se ratou a tukuna tiko vakadodonu ni waiwai ni saumaki vou e sega ni dau kerei? Ena rawa beka li ni soli tale vua e dua na tamata na kaukauwa vakayalo e taukena e dua mai na nona talairawarawa vakawasoma ki na ivunau? Ena rawa beka li ni vakadewataki vua e dua e gadreva tu, na kila-ka e rawati mai ena kena dau wiliki vakagumatua ni ivolanikalou? Ena rawa beka li ni vakadewataki na vakacegu e kauta mai na kosipeli ki vua e dua na Yalododonu Edaidai yalodina ki vua e dua ka sotava tiko na dredre se na vei bolebole lelevu? Na isau matata ki na veitaro kece oqori, E sega ni rawa.

“Me vaka ga eratou sa vakamatatataka mai na goneyalewa vuku, e dodonu vei keda me da sa dui ‘volia vakai keda na ka me baleti keda.’ Na veivakauqeti ni nodratou bula na goneyalewa oqori eratou sega ni vakamacalataka tiko e dua na ka vakabisinisi, ia eratou vakabibitaka tiko na noda dui itavi yadudua me rawa ni na waqa tikoga kina na noda cina ni ivakadinadina kei na kena rawati na waiwai ni saumaki vou. Na waiwai vakamareqeti oqo e rawati ena veituru yadua ena dua na gauna—‘vosa ena vosa [kei na] ivunau ena ivunau’ (2 Nifai 28:30), ena yalo ni vosota kei na gugumatua” (“Saumaki Vua na Turaga,” Liaona, Nove. 2012,109).

Vakatorocaketaki ni Noda Veivakavulici

Vakadeitaka ni ko sa vakavulica tiko na vunau dina. “Mo tarogi iko tiko e veigauna ‘Na sala cava era na vukei kina na noqu lewe ni kalasi mai na veika au sa vakavulici ira tiko kina me ra tara cake na nodra vakabauti Karisito, mera veivutuni, mera cakava eso na veiyalayalati ka muria tiko nodra veiyalayalati kei na Kalou, ka ciqoma na Yalo Tabu?’” (Veivakavulici ena iVakarau ni iVakabula,20).