iOtioti ni Vakayakavi

Dou Vakananumi Au Kina, mai vei Walter Rane

29 ni Me–4 ni June

Maciu 26; Marika 14; Joni 13

“Dou Vakananuma”

Wilika na Maciu 26; Marika 14; kei na Joni 13, ka vakananuma vakatitobu na vakanananu kei na veivakauqeti eso, e yaco mai ena nomu vakasama. Na itukutuku cava ena vakalougatataki ira na lewe ni nomu kalasi?

ivakatakilakila ni veiwasei

Sureta na Veiwasei

Sureti ira na lewe ni kalasi mera wasea na ka era sa vulica ena macawa oqo a vukea me vakaibalebale cake vei ira na sakaramede. Na cava era a cakava kei na sala cava e veisautaka kina na nodra vakayagataka na sakaramede?

ivakatakilakila ni veivakavulici

Vakavulica na iVunau

Maciu 26:20–22

E dodonu meda dui dikeva tiko noda bula me vakadeitaki na kena vakayagataki vei keda na vosa ni Turaga.

• Eda sa rogoca e vuqa na lesoni ni kosipeli ena noda bula, ia eso na gauna eda temaki meda nanuma ni lesoni oqori sa baleti ira vakalevu eso tani tale. E rawa ni vukei keda na veivosakitaki ni Maciu 26: 20-22 meda uabaleta na itovo oqo. Na lesoni cava eda rawa ni vulica ena nodra vakayagataka na tisaipeli ki na nodra bula na vosa ni iVakabula? Kevaka e dua na lewe ni kalasi e wilika na vosa nei Peresitedi Dieter F. Uchtdorf baleta na itukutuku oqo ena nona itukutuku “Turaga, Koi Au Beka?,” e rawa beka ni ra wasea na veivakararamataki era rawata (Liaona,, Nove. 2014, 56–59).

Maciu 26:26–29

Na sakaramede e madigi me nanumi kina na iVakabula.

• Era na vakamacalataka vakacava na lewe ni kalasi na cakacaka vakalotu tabu ni sakaramede vua e dua e sega ni kila vinaka? Ena rawa beka ni o ni cakava vata e dua na lisi ni taro ena rairai tiko vua e dua me baleta na sakaramede, me vaka na “Cava na vuna e solia kina vei keda na iVakabula na sakaramede? Na cava na vuna e ivakatakarakara kaukauwa kina i Jisu Karisito na madrai kei na wai? Na cava eda yalataka ni da vakayagataka na sakaramede? Na yalayala cava soti eda ciqoma?” Sa rawa mera vakasaqara na lewe ni kalasi na isaunitaro ena ivurevure eso oqo: Maciu 26:26–29; Vunau kei na Veiyalayalati 20:75–79; kei na Ulutaga Vakosipeli,“Sakaramede” (topics. ChurchofJesusChrist.org). Sa rawa talega mo wasea na veivakararamataki mai vei Elder D. Todd Christofferson ena “iKuri ni iVurevure.”

  e vakayagataka tiko na marama na sakaramede

  Sa vukei au na sakaramede meu nanumi Jisu Karisito.

• Ena yaga sara vakavinaka vei ira na lewe ni kalasi ni ra veirogoci vakai ira ena sala mera nanuma kina na iVakabula ena gauna ni sakaramede kei na loma ni macawa (raica na Luke 22:19–20; Vunau kei na Veiyalayalati 6:36–37). Sa rawa mo sureti ira mera wasea na veika ena vukei ira kei na nodra matavuvale mera nanuma kina na iVakabula ka maroroya na nodra veiyalayalati. Sa rawa talega mera wasea na veika era sa cakava me gauna bibi kina na sakaramede.

Joni 13:1–17

Na iVakabula sa noda ivakaraitaki ni veiqaravi ena yalomalumalumu.

• Me vukea nodra vakananuma vakatitobu na nomu lewe ni kalasi na bibi ni kena ibalebale na Nona vuya na yavadra na Nona tisaipeli o Jisu, mo sureta e dua na lewe ni kalasi me mai matataki Pita ena italanoa oqo ka me vakatarogi mai vei ira na vo ni kalasi. Sa rawa ki na lewe ni kalasi mera vakasaqara ena Joni 13:1–17 ka vakasamataka na taro e vakaibalebale mera taroga vei Pita me ra vulica kina na veika a sotava. Na cava eda sa vulica mai na itukutuku oqo ena rawa ni veisautaka noda qaravi ira na tamata?

Joni 13:34–35

Na noda lomani ira na tani sa ivakatakilakila ni da sa tisaipeli dina i Jisu Karisito.

• Na cava ena vakayaloqaqataki ira na lewe ni kalasi mera dauloloma cake? Ena rawa beka ni o tarogi ira se ivakarau cava era raica ni ra sotava e dua e dau muri Karisito. Sa rawa mo sureta mera vakasaqara ena Joni 13:34–35 na sala mera kilai ira era sa tisaipeli dina ni iVakabula. Na cava eda rawa ni cakava me itovo dina ni noda bula vakatisaipeli na loloma? E rawa beka ni o veivosakitaka na sala e dua kina na sala ni vakadinadinataki Jisu Karisito na nodra lomani na tani. E rawa vakacava ni da cakava oqo ena noda matavuvale, ena tabana ni veimaliwai raraba, kei na veivanua tale eso?

• Sa vulica na kalasi e vuqa na ka baleta na iVakabula ena yabaki oqo, oka kina na vuqa na Nona ivakaraitaki ni Nona lomani ira na tamata. Dua na sala mera vakasamataka vakatitobu kina na lewe ni kalasi na ivakaro ena Joni 13:34 o ya mera vola na Me Vaka Kau sa Lomani Kemudou ena vava ni volavola ka kerea na lewe ni kalasi mera vola na ivakaraitaki era raica mai na Veiyalayalati Vou e vakaraitaka na loloma i Jisu. Mo vola sara Dou Veilomani Vakai Kemudou ena vava ni volavola ka kerea na lewe ni kalasi mera vola na sala eso eda rawa ni muria na Nona ivakaraitaki ni loloma. Era na raica beka na lewe ni kalasi eso na vakasama ena dua vei ira na vidio e volai tiko ena “iKuri ni iVurevure.”

ivakatakilakila ni ivurevure

iKuri ni iVurevure

“Tugana ki lomamu na ivakarau kei na itovo ni bula i Karisito.”

E vakatavulica o Elder D. Todd Christofferson, “Kania vakatautauvata [na] yagona na iVakabula ka gunuva na Nona dra [e kena ibalebale] me da umanaka kina na itovonibula kei na itovo i Karisito, ka biuta tani na tamata vakayago ka yaco me Yalododonu ‘ena veisorovaki i Karisito na Turaga’ [Mosaia 3:19.]. Ni da vakaivotavota ena madrai ni sakaramede kei na wai e veimacawa, ena vinaka vei keda me da vakasamataka na ivakarau me da umana kina na Nona itovonibula kei na ivakarau ni Nona bula sega ni ivalavala ca ki na noda dui bula kei na lomada” (“Na Madrai ni Bula ka Lako Sobu mai Lomalagi,” Liaona, Nove. 2017, 37).

Vidio me baleta na loloma ena ChurchofJesusChrist.org.

• “Dou Veilomani vakai Kemudou”

• “Solibula ni Matavuvale, Solia, kei na Loloma”

• “Vakavakarau nei Peresitedi Thomas S. Monson: A Vulica me Yalololoma ni Se Cauravou Gone”

Vakatorocaketaki ni Noda Veivakavulici

Raica yani ena mata ni Kalou. Saga mo raici ira na lewe ni nomu kalasi me vaka e raici ira tiko mai na Kalou, ka na vakatakila vei iko na Yalo na kedra yaga vakalou kei na gunirawa. Ni o vakayacora oqo, o na dusimaki ena nomu sasaga mo vukei ira (raica na Veivakavulici ena Vakarau ni iVakabula, 6).