Veikau mai Kecisemani, mai vei Derek Hegsted

12–18 ni Jiune

Luke 22; Joni 18

Kakua ni Yaco na Noqu Lewa, me Yaco Ga na Nomuni Lewa

Vakasamataka na cava o na cakava mo sureta kina na Yalo ki na nomu kalasi ni o veivosakitaka na veika bibi ena veiwase oqo. Vakasaqara ena masumasu na sala eso mera vukei kina na lewe ni kalasi mera vakatitobutaka na nodra lomana na iVakabula kei na nodra vakabauti Koya.

Sureta na Veiwasei

Sureta e vica na lewe ni kalasi mera wasea na veika era vakila ni ra wiliwili ena macawa oqo kei na tikina cava a vukei ira me vaqo na nodra nanuma.

Vakavulica na iVunau

Luke 22: 39–46

Eda sa yaco meda sa Vakarisito cake ni da digitaka meda soli keda ki na lewa nei Tamada.

• Na ivakaraitaki ni iVakabula ni a soli koya ki na lewa nei Tamana ena vukei ira na lewe ni kalasi ni ra via cakava vakakina. Me tekivutaki e dua na veivosaki, e rawa mo sureta na lewe ni kalasi mera wasea na gauna era a soli ira kina ki na veika era kila ni gadreva na Kalou mera na cakava. Kerei ira me ra wasea na sala era kila kina na ka e vinakata na Kalou me ra cakava kei na sala era a vakalougatataki kina ena nodra soli ira ki na Nona lewa. Sureti ira na kalasi mera wilika na Luke 22:39–46 ka vakasamataka vakatitobu na vuna a solia kina na iVakabula na Nona lewa ki na lewa nei Tamana. E rawa vakacava ni da vakamuria na ivakaraitaki ni Vakabula?

• Me ikuri ni nona cakacaka na iVakabula ena nona soli koya vua na Kalou ena Luke 22:42, na ivakaraitaki cava tale eso ni Nona talairawarawa eda na kunea ena Luke 22 kei na Joni 18? A soli koya vakacava na iVakabula ki na lewa nei Tamana ena Nona bula taucoko? Na cava e rawa ni da vakayacora meda vakataki Koya vakalevu cake? Na itukutuku nei Elder Neal A. Maxwell ena “iKuri ni iVurevure” ena rawa ni vakauqeti ira na lewe ni kalasi me ra vakasamataka na sala e rawa ni ra soli ira kina vua na Kalou.

Luke 22: 39–46

Sa mai vakayacora vei keda ko Jisu Karisito e dua na Veisorovaki tawayalani.

• Luke 22:39–46 e vakamacalataka na ka a yaco e Kecisemani. Me vukei ira na lewe ni kalasi mera kila vakavinaka na bibi ni soqo tabu oqo, sa rawa mo vola ena vava ni volavola na taro vakaoqo Na cava a yaco e Kecisemani? kei na Na cava na vuna e bibi kina vei au? Mera raica na lewe ni kalasi na isaunitaro ena Luke 22:39–46; Alama 7:11–13; Vunau kei na Veiyalayalati 19:16–19; kei na vidio “E Vakararawataki na iVakabula e Kecisemani” (ChurchofJesusChrist.org). Sa rawa talega mera kunea na isaunitaro ena itukutuku nei Peresitedi Tad R. Callister “Na Veisorovaki i Jisu Karisito” (Liaona, Me 2019, 85–87).

• Ena iVola i Momani, e vakatoka o Jekope na Veisorovaki i Jisu Karisito me “dua na veisorovaki tawayalani” (2 Nifai 9:7 Mera vukei na lewe ni kalasi mera kila vakavinaka na ibalebale ni veika oqo, mo wasea na ivakavuvuli i Peresitedi Russell M. Nelson ena “iKuri ni iVurevure” ka kerea mera vola na sala eso e rawa me vakatokai kina me tawayalani na revurevu ni nona solibula na iVakabula . Mera na wilika talega na veivolanikalou oqo ka mera vola talega: Iperiu 10:10; Alama 34:10–14; Vunau kei na Veiyalayalati 76:24; kei na Mosese 1:33. Meda vakavinavinakataka vakacava na veika sa cakava vei keda na iVakabula?

Caki nei Pita, mai vei Carl Heinrich Bloch

Luke 22:54–62

E rawa ni da yalodina vei Jisu Karisito se cava ga na noda rere kei na malumalumu.

• Me vukei ira na lewe ni kalasi me ra raitayaloyalotaka na veika e yaco ena Luke 22:54–62, e rawa ni o vakaraitaka e dua na iyaloyalo, me vaka na nona caki o Pita (ChurchofJesusChrist.org). se na vidio “Jesus Is Tried by Caiaphas, Peter Denies Knowing Him” (ChurchofJesusChrist.org). Sa rawa mera wasea na lewe ni kalasi na veika era sa vulica mai na veika a sotava o Pita ka vakauqeti ira mera yalodina tiko vei Jisu Karisito.

iKuri ni iVurevure

Me sa lewai keda ga na Tamada.

E vakavulica o Elder Neal A. Maxwell: “Ni ko sa solia me lewai iko na Kalou, o sa solia tiko Vua na ka duadua ga o na rawa mo solia dina Vua na ka sara ga e nomu. Kakua ni wawa vakabalavu mo kunea na icabocabo se tekivu mo biuta kina na isolisoli ni nomu lewa!” “Nanuma na Nona Yalololoma na Turaga,” Liaona, Me 2004,46).

Na Veisorovaki tawayalani.

E vakavulica o Peresitedi Russell M. Nelson:

“Sa tawayalani na Veisorovaki i [Jisu Karisito]—ka sega na kena itinitini. Sa tawayalani talega na nodra na vakabulai na kawatamata kecega mai na mate tawa-oti rawa. Sa yaco me tawayalani ena vuku ni Nona rarawa levu. Sa tawayalani na kena gauna, sa mai oti kina na kena dau cabori taumada na manumanu. Sa tawayalani na kena inaki—me a sa caka ga vakadua. Sa sega ni soli duadua ga na Veisorovaki, ki na dua na iwase ni wiliwili tawayalani ni tamata, ia ki na dua na wiliwili tawayalani ni vuravura taucoko ka bulia o Koya. Sa tawayalani e uabaleta yani na veigauna e vakarautaka na tamata se kina iyalayala ni gauna e kila rawa na tamata.

“O Jisu duadua ga a rawa me solia e dua na veisorovaki tawayalani vakaoqo, baleta ni sucu mai vua e dua na tina e vuravura ka tawamudu na Tamana. Ena vuku ni ituvaki cecere e mai sucu kina, sa yaco kina me Kabula tawayalani ko Jisu” (Na Veisorovaki,” Ensign, Nove. 1996,35).

Vakatorocaketaki ni Noda Veivakavulici

Mo iyaya ni cakacaka yalomalumalumu ni Yalotabu “Na nomu inaki vaka-qasenivuli e sega ni kena caka tu e dua na veivakavulici vakasakiti ia na nodra vukei ga eso tale mera ciqoma na veivakayarayarataki ni Yalo Tabu, o koya na qasenivuli dina sara” (Veivakavulici ena iVakarau ni iVakabula, 10).