“Meei 8–14. Mataio 19–20; Mareko 10; Ruka 18: ‘Tera ae I Tuai Kororaoi Iai?,’” Nakomai, Iriirai—Ibukin te Reirei n Tabati: Te Nu Tetemanti 2023 (2022)
“Meei 8–14. Mataio 19–20; Mareko 10; Ruka 18,” Nakomai, Iriirai—Ibukin te Reirei n Tabati: 2023
Meei 8–14
Mataio 19–20; Mareko 10; Ruka 18
“Tera ae I Tuai Kororaoi Iai?”
Ngkai ko katauraoi n angareirei, tataro mwaaka n iangoia bwa kona kanga ni buokiia kain te kiraati n tibwa te bwai are a tia n reiakinna ke n namakinna n aia tai ni kamatebwai ibon irouia.
Kaunga te Tibwatibwa
E kona n ibuobuoki ngkana ko maroro n tainako ma kain te kiraati iaon ni kabane bwaai ake a rinanona n kamatebwaian te euangkerio are e boboto iaon te mweenga. Tera taneiai aika a nakoraoi ake a kona n tibwauaia? Tera kanganga ke kakaewenako aika a kaitarai? Tera te reirei ae a kona n anga imarenaia?
Reirei te Reirei
Te mare imarenan te mwaane ao te aine e kakawaki n Ana babaire te Atua ae akea tokina.
-
Ae rikirake, ana taratara te aonaaba iaon te mare e maenako man te koaua ae akea tokina. Ni buokiia kain te kiraati n ata ana taratara te Atua iaon te mare, kona bae ni kaoia bwa a na wareka Mataio 19:3–9 ao ni karinanna iaon te burakibooti koaua ake a kunei ni kaineti ma te mare. A kona naba ni karinani raon koaua ake a kunei ni booki aikai: Karikan Bwai 1:27–28; 1 I-Korinto 11:11; Reirei ao Berita aika Tabu 42:22; 49:15–17; 131:1–4; 132:19; ao Mote 3:18, 21–24. A kanga ni kakorakoraki koaua aikai inanon “Te Utu: Te Katanoata nakon te Aonaaba”? (ChurchofJesusChrist.org).
Aomata nako a kona ni karekei kakabwaia n te maiu are akea tokina, n aki taraia bwa nningai are a karekea iai te euangkerio.
-
Tera ae e na kona ni buokiia kain am kiraati ni karaoi nanon reirei n te kaikonaki irouia taan mwakuri n te nne ni kureebe? Kona bae ni kaoia tabeman kain te kiraati ni katauraoi ni karaoa te kaotioti iaon te kaikonaki ni kaotia nakon te kiraati. Imwiin te kaotioti, aomata ake a tei ibukiia taan mwakuri a kona n tibwaia bwa tera aia namakin ibukin booia are a karekea ao bukin tera. Terar ae e kaotia te kaikonaki aei ibukin te abanuea are i karawa? Tera rakan iango ake ti karekei ibukin te kaikonaki aei n te rongorongo mairoun Unimwane Jeffrey R. Holland “Taan Mwakuri n te Nne ni Kureebe”? (Riaona, Meei 2012, 31–33).
Mataio 19:16–22; Mareko 10:17–27
Te Tia Kamaiu e na kairiira ni kaniira riki nakoina ngkai ti bubuti ibukin Ana ibuobuoki.
-
Kona kanga ni buokiia kain te kiraati bwa a na kina ao ni karaoi reirei ni karakinan te ataenimwaane ae kaubwai? Teuana karaoana ko kona n tuangiia bwa a na wareka Mareko 10:17–27 ao n iangoia ngkana a tia n namakina are ai aron te kairake ae kaubwai. Tera ae e a tia ni buokiia n iriira ana reirei te Tia Kamaiu riki ngkana karaoana e rang kangaanga? Kain te kiraati a kona n rang tatauraoi n tibwai taneiai are a titirakinaki iai “Tera ae I Tuai Kororaoi Iai?” (Mataio 19:20) ao karekea te wirikiriki ibon iroum ni katamaroa. Ni buokiia kain te kiraati ake a kona ni bwarananoia n iangoia bwa tera ae a tuai ni kororaoi iai, ko kona n taekina te rongorongo n “Bwaai n Ibuobuoki riki Tabeua.”
-
Kain te kiraati a kona ni wareka te rongorongo man te maungatabu are e irekereke nakon kiibu aikai n aron are e taekinaki n Nakomai, Iriirai—Ibukiia Aomata n Tatabemaniia ao Utu. Kaoia bwa a na tibwai iango ake a karekei.
Te Tia Ikoikoti Ana Mwane te Uea ae Rairannano ao te Bwaritaio inanon te Tembora, iroun Frank Adams
Ti riai n onimakina ana nanoanga te Atua, tiaki oin raoiroira.
-
Ana kaikonaki te Tia Kamaiu are e kabotaua ana tataro te Bwaritaio ma te tia waremwane e kona ni buokiko ni kina anua ake e tuangko te Uea irouia ake a ukoukoria n iriria. Ni buokiia kain te kiraati ni karaoa te kaikonaki aei nakon ara bong, ko kona ni kaoia bwa ana manga korea ana tataro te Bwaritaio n te aro are e kabonganaaki n taai aikai ibukin kaotan te anua ae aekakina. A kona ni karaoa naba anne ma ana tataro te tia waremwane ao imwiina a na tibwa te bwai are a koreia. E kanga kibu 15–17 ao 18–24 n irekereke nakon ana reirei te Tia Kamaiu are n ana taetae ni kaikonaki? Ko kona naba n tibwai rongorongo aikai ni kaineti ma kibu mai iroun Unimwaane Dale G. Renlund: “Te rongorongo ibukira e matata: te tia bure ae raira nanona e kaniiaki riki nakon te Atua nakon te aomata ae raoiroi are e kabuakaka te tia bure anne” (“Ara Tia Kawakin Tibu ae Raoiroi,” Riaona, Meei 2017, 31).
Bwaai n Ibuobuoki Riki Tabeua
Tina aki un ke ni bwarannano.
E reirei Unimwaane D. Todd Christofferson:
“Ngkana ti titiraki ma nanora ni koaua, Tera ae I Tuai Kororaoi Iai?’ E na bon aki katikuira [te Atua] bwa ti na keeti, ma inanon te tangira E na kaeka ibukin kukureira. Ao E anganiira te kantaninga.
“Bon te mwakuri ae korakora, ao e na bon kamaroa ngkana ti teimatoa ibukin te mimitong n ti ngaira. Te koaua ae mimitong bwa ti aki tiku ni maroa. Iai iroura ana tangira te Atua, ana akoi Kristo, ana karaunano ao ana kairiiri te Tamnei ae Tabu, ao aia iraorao ao aia kaunganano raora aika Itiaki n rabwatan Kristo. Ti bia aki un n te tabo are ti mena iai, ke ni bwarannano” (“Te Berena ni Kamaiu are Ruo mai Karawa,” Riaona, Nobembwa 2017, 39).
Kanakoraoan Ara Anga reirei
Te Atua e kainnanoa am tarena ae onoti ao am konabwai. “Ko kona ni kakabwaia natin te Atua man karekean te tangira are iroum nakoia tabeman, te bwaintangira are e a tia n anganiko te Atua, ao am taneiai ni maium. Ngkai ko beku ma te kakaonimaki n ukoukora ana ibuobuoki te Atua, E na kakorakorako riki, ao kona rikirake inanon am kona n reirei te euangkerio n ana Kawai te Tia Kamaiu” (Teaching in the Savior’s Way, 5).