Te Nati ae Bakatae, iroun Liz Lemon Swindle

Meei 1–7

Ruka 12–17; Ioane 11

“Kam na Kimwareirei ma Ngai, bwa Ea Reke Irou Au Tibu Are Bua,”

Waakina am katauraoi n tataromwaaka ni kamatebwaia Ruka 12–17 ao Ioane 11. Tera “te tibu ae bua” n aia iango kain te kiraati? Kabongana Nakomai, Iriirai—Ibukiia Aomata n Tatabemaniia ao Utu ao te kabwarabwara aei ngkai ko ukoukora ana kairi te Uea iaon aron karekean kainnanoia kain te kiraati ae e na tamaroa riki, riki ngkana aki ira te kiraati.

Kaunga te Tibwatibwa

Karaoana bon te mwakoro ae kakaawaki n reiakinana, ngaia are kaoia kain te kiraati bwa a na tibwaia bwa a kanga n rineia bwa a na maiuakina te bwai are a reiakinna man koroboki aika tabu n te wiiki aei.

Reirei te Reirei

Ruka 14:15–24

Bon akea bukina ae tau bwa e na totokoaki te euangkerio.

• Ni buokaia kain te kiraati bwa a na kamatebwaia te taetae ni kaikonaki n te amwarake ae abwabwaki, kona bae ni kaoia nakon te bootaki n aia iango are aongkoa kona booia. Anganiia bwa a na tibwai tabeua bukina bwa e aera a na iria ke a na aki kona n iria. Wareka Ruka 14:15–24 n ikotaki, ao maroroakina aia karautaeka aomata n te taetae ni kaikonaki are a karaoia ngke a kaoaki nakon te baka n amwarake are e tei ibukin te euangkerio. Tera aia karautaeka aomata are a karaoia ibukin kabwakaia ni butimwaean ana kakao te Tia Kamaiu ni butimwaean ana kakabwaia Tamara are i Karawa? Tao a kona kain te kiraati n tibwai kakabwaia ake a karekei ngke a tia ni karaoi anganano aika riai ni maiuakin aekakin nako reirei n te euangkerio.

Ruka 15

Ti kona n ukoukoriia naake a tia ni bua ao ni kimwareirei ma te Tama ngke a oki.

• Kona kanga n anganniia kain te kiraati aia tai n tibwa te bwai are a tia n reiakinna ibukin taeka ni kaikonaki ake teniua n Ruka 15? Iangoia n anganiia kain te kiraati n tatabemaniia teuana te taetae ni kaikonaki bwa a na rinanona. A kona n taratarai ao n tibwai kaekaan titiraki n aron aikai: Tera taeka n te kaikonaki ae e kaota aron ana namakin Tamara are i Karawa ibukiia ake a bua? Tera ae e taekinaki n taeka ni kaikonaki ibukin arora ngaira ni buokiia natin te Atua? Kain te kiraati a kona n tibwa aron te Tia Kamaiu ni kuneia ngke a namakinna bwa a bua.

• Anenea “Dear to the Heart of the Shepherd” (Hymns, no. 221) n ikotaki e kona ni karaka nakon reirein taeka ni kaikonaki aikai.

• Ngkai ko rinanon taeka ni kaikonaki n te nati ae bakatae, kain te kiraati e na kona n reke tibwangaia man katuruturuan aia iango iaon taeka, mwakuri, ao koaua irouia n tatabemaniia n taeka ni kaikonaki. Tera ae ti reiakinna mai irouia n tatabemaniia? Tao kain te kiraati a kona ni korea te bwai are e riki n teuana imwiin teuana n tokin te taetae ni kaikonaki n anuan te nati are te ikawai riki nakon tarina ae kaokoro. Tera ana reirei te karo n taeka n ibuobuoki are e reireiniira ibukin arora ae tina riai n namakinna ibukiia ake a bua ao ibukiia ake a oki nakon te euangkerio? (Taraa naba ana maroro Unimwaane Jeffrey R. Holland n “Bwaai n Ibuobuoki riki Tabeua.”) Ke ko kona n tuangiia kain te kiraati bwa a na iangoia bwa angkoa ngaiia te karo n te taetae ni kaikonaki aei. Tera riki te reirei ae a na angan te nati are e ikawai riki bwa e na buokia ni kukurei n rikirakeia ke n tokanikaia tabeman?

Ruka 17:11–19

Te kakaitau ibukin au kakabwaia e na uotai ni kaniiai riki nakon te Atua.

• Kaoia kain te kiraati bwa a na tibwa te bwai are a reiakinna n te kakaitau ibukin aia kamatebwai n Ruka 17:11–19 ao te witeo n tamnein “President Russell M. Nelson on the Healing Power of Gratitude” (ChurchofJesusChrist.org). E kanga te rebera are kakaitau ni kakabwaiaki ibukin kaotan ana kakaitau? Ti kanga ni kakabwaiaaki ngkana ti kaota te kakaitau? Kain te kiraati a kona n taekini kawai ake ti kona iai ni kaota ara kakaitau nakon te Atua ao aomata.

Ioane 11:1–46

Iesu Kristo bon te Mangauti ao te Maiu.

• Teuana te kawai ni kamatebwaia Ioane 11:1–46 bon tuangakiia kain te kiraati bwa a na ikaruoruo ni wareki kibu ao ni kaoia bwa a na toki ao ni maroroakinna ni katoatai are a kunei iai kakoaua n ana onimaki Iesu Kristo. Ko kona naba n tuangiia kain te kiraati bwa a na iangoi aia taratara aomata ake a irekereke iai—n ikotaki ma te Tia Kamaiu, Abotoro, Mareta, Maria ao Rataro. Tera ae ti reiakinna mai irouia n tatabemaniia? Tao a kona kain te kiraati n tibwa aia taneiai ngke aia onimaki iroun Iesu Kristo e kakorakoraki inanon tain te kataaki.

Bwaai n Ibuobuoki Riki Tabeua

Reirei man taetae ni kaikonaki riki tabeua.

Unimwaane Jeffrey R. Holland e anga ana iango ibukin tarin te nati are e bakatae are te ikawai: “Te nati aei e aki rangi n un bwa tabeman a tia n okira mweengaia ma e un riki bwa ana karo a rangi ni kukurei ibukina. … E na riai ni butimwaea te nanoanga ao te akoi, namakin n tangira ni katamneia n nooria bwa aio tiaki te oki ni kaiangatoa. Bon tarina. Ngke e butiia tamana bwa e na nooria, bon ngaia are e a tia ni mate ao ngkai e a maiu. Bon teuare e bua ao ngkai e a reke” (“The Other Prodigal,” Ensign, May 2002, 63).

Kanakoraoan Ara Anga reirei

Anga baim nakon temanna. N ai aron te tia kawakin tiibu n ana taetae ni kaikonaki te Tia Kamaiu (taraa Ruka 15:4), “ko kona ni karoko irouia ake a bua man am kiraati. Am tai n reirei ao reireiniia ao ni kaungai nanoia kain am kiraati ao ni buokiia bwa ana nakon Kristo ao n reitia riki nakon are iaon te kiraatiruum ao nakoia naake a iriira am reirei ae barongaaki.” (Teaching in the Savior’s Way, 8).