Mayo 8–14

Mateo 19–20; Marcos 10; Lucas 18

“Ania Pay ti Pagkurangak?”

Bayat ti panagsaganam a mangisuro, ibilangmo a sikakararag no kasano a matulongam dagiti miembro ti klase a mangibinglay no ania ti naadal wenno nariknada bayat iti bukodda a panagadal.

Yawis ti Panagbibinninglay

Mabalin pay a makatulong ti sagpaminsan a panangilawlawag kadagiti miembro ti klase kadagiti amin a padasda iti panagadal iti ebanghelio iti pagtaengan. Ania dagiti naballigian a padas a maibinglayda? Ania a tubeng wenno pannubok ti pakaipaspasanguanda? Ania a balakad ti maitedda iti tunggal maysa?

Isuro ti Doktrina

Mateo 19:3–9

Napateg unay ti kallaysa iti nagbaetan ti maysa a lalaki ken maysa a babai iti agnanayon a plano ti Dios.

• Nangnangruna pay, maigiddiat dagiti pannirigan iti lubong iti kallaysa manipud iti agnanayon a kinapudno. Tapno matulongan ti klasem a masursuruan maipapan kadagiti pannirigan ti Dios iti kallaysa, mabalinmo nga awisen ida a mangbasa iti Mateo 19:3–9 ket ilistam iti pisarra dagiti kinapudno a masarakanda maipanggep iti kallaysa. Mabalinda pay nga ilista dagiti mainayon a kinapudno a masarakanda iti sumaganad: Genesis 1:27–28; 1 Taga Corinto 11:11; Doktrina ken Katulagan 42:22; 49:15–17; 131:1–4; 132:19; ken Moises 3:18, 21–24. Kasano a mapatibker dagitoy a kinapudno iti “Ti Kaamaan: Maysa a Waragawag iti Lubong”? (ChurchofJesusChrist.org).

Mateo 20:1–16

Makaawat ti tunggal maysa iti bendision ti biag nga agnanayon, uray no kaanoda nga awaten ti ebanghelio.

• Ania ti makatulong kadagiti miembro ti klase a mangyaplikar kadagiti pagbatayan iti pangngarig ti mangmangged iti kaubasan? Mabalinmo nga awisen ti sumagmamano a miembro ti klase a mangisagana iti panangyakem iti pangngarig a maipabuya iti klase. Kalpasan ti pabuya, mabalin nga ibinglay dagiti tao nga agak-akem a mangmangged no kasano ti nariknada maipapan ti tangdan nga inawatda ken no apay. Ania ti isingasing daytoy a pangngarig maipapan ti pagarian ti langit? Ania dagiti mainayon a nalawag a pannakaammo ken pannakaawat a magun-odtayo maipapan iti daytoy a pangngarig manipud iti mensahe ni Elder Jeffrey R. Holland ti “The Laborers in the Vineyard”? (Liahona, Mayo 2012, 31–33).

Mateo 19:16–22; Marcos 10:17–27

Ti Mangisalakan ti mangtarabayto kadatayo nga umas-asideg Kenkuana no agkiddawtayo iti tulongna.

• Kasano a matulongam dagiti miembro ti klase a mangilasin ken mangyaplikar kadagiti pagbatayan iti estoria ti nabaknang nga agtutubo a lalaki? Mabalin a kiddawem kadakuada a mangbasa iti Marcos 10:17–27 ket ibilang no nakariknada iti kas iti narikna ti nabaknang nga agtutubo a lalaki. Ania ti nakatulong kadatayo a nangsurot iti balakad ti Mangisalakan uray kadagiti gundaway a narigat nga aramiden dayta? Mabalin a sidadaan dagiti miembro ti klase a mangibinglay kadagiti padasda idi naisaludsodda iti “Ania pay ti pagkurangak?” (Mateo 19:20) ken nakaawat iti bukodda a parikna tapno dumur-as. Tapno matulongan dagiti miembro ti klase a mabalin a maupay gapu iti panangdakamat kadagiti pagkuranganda, mabalinmo nga ibinglay ti palawag iti “Dagiti Nainayon a Resources.”

• Mabalin nga adda nabasan dagiti miembro ti klase a mensahe iti kumperensia nga adda pakainaiganna kadagitoy a bersikulo a naisingasing iti Umaykayo, Sumurot Kaniak—Para kadagiti Indibidual ken Pamilia. Awisem ida a mangibinglay kadagiti nalawag a pannakaammo ken pannakaawat (insights) a nagun-odda.

Ti Agbabbabawi a Publikano ken ti Managinsisingpet a Fariseo iti Templo, ni Frank Adams

Lucas 18:9–14

Nasken a pagtalkantayo iti asi ti Dios, saan nga iti bukodtayo a kinalinteg.

• Ti pangngarig ti Mangisalakan a mangidasdasig ti kararag ti maysa a Fariseo iti kararag ti maysa a publikano ket makatulong kenka a mangitampok iti galad nga idawat ti Apo kadagiti agkalikagum a sumurot Kenkuana. Tapno matulongan dagiti miembro ti klase a mangyaplikar iti daytoy a pangngarig iti aldawtayo, mabalinmo nga awisen ida a mangulit a mangisurat iti kararag ti Fariseo iti wagas a mausar dagiti kabaruanan a detalye ngem mangipeksa kadagiti isu met la a galad. Mabalinda nga aramiden ti kasta met laeng iti kararag ti publikano ket kalpasanna ibinglayda no ania ti insuratda. Kasano a mainaig dagiti bersikulo 15–17 ken 18–24 iti no ania ti insuro ti Mangisalakan iti daytoy a pangngarig? Mabalinmo met nga ibinglay ti sumaganad a palawag ni Elder Dale G. Renlund maipapan kadagitoy a bersikulo: “Nalawag ti mensahe para kadatayo: mayasideg iti Dios ti agbabbabawi a managbasol ngem iti aginsisingpet a tao a mangkondena iti dayta a managbasol” (“Our Good Shepherd,” Liahona, Mayo 2017, 31).

Dagiti Nainayon a Resources

Saantayo koma a kontento wenno maupay.

Insuro ni Elder D. Todd Christofferson:

“No sipupudnotayo nga agsaludsod, ‘Ania pay ti pagkurangak?’ Saanto nga ipalubos ti [Dios] a mangpugpugtotayo laeng, ngem gapu iti ayat sumungbatto para iti pagragsakantayo. Ket ikkannatayto iti namnama.

“Napateg daytoy a panagkagumaan, ken mabalin a nakabutbuteng daytoy no iti panangikarigatantayo iti kinasanto ket nagmaymaysatayo. Ti nadayag a kinapudno ket saantayo nga agmaymaysa. Adda kadatayo ti ayat ti Dios, ti parabur ni Cristo, ti liwliwa ken pannarabay ti Espiritu Santo, ken ti pannakisinged ken panangparegta kadagiti pada a Santo iti bagi ni Cristo. Saantayo a kontento iti ayantayo ita, ngem saantayo met a maupay” (“The Living Bread Which Came Down from Heaven,” Liahona, Nob. 2017, 39).

Panangpadur-as iti Panangisurotayo

Kasapulan ti Dios dagiti naidumduma a talento ken kabaelan. “Maparaburam dagiti annak ti Dios babaen ti panangipaaymo iti ayatmo kadagiti dadduma, dagiti sagut nga inted ti Dios kenka, ken dagiti padpadasmo iti biag. No agserbika a sipupudno ken agkalikagum iti tulong ti Dios, patibkerennakanto, ket dumur-askanto iti kabaelam a mangisuro iti ebanghelio iti wagas ti Mangisalakan” (Panangisuro iti Wagas ti Mangisalakan, 5).