Maikadua a Yaay

Ti Maikadua a Yaay, ni Harry Anderson

Mayo 22–28

Joseph Smith—Mateo 1; Mateo 24–25; Marcos 12–13; Lucas 21

“Umayto ti Anak ti Tao”

Laglagipem a rugian ti panagsaganam a mangisuro babaen ti nainkararagan a panagbasam iti Joseph Smith—Mateo 1; Mateo 24–25; Marcos 12–13; ken Lucas 21. Agkalikagumka a manggun-od iti pammaregta iti bukodmo, ket kalpasanna irebyum daytoy a balabala para kadagiti nayon pay a kapanunotan.

icon iti panagbibinninglay

Yawis ti Panagbibinninglay

Ilistam iti pisarra dagiti pangngarig ti Mangisalakan a masarakan iti babasaen iti daytoy a lawas, kas iti kayo ti igos, ti nasayaat a tao ken ti mannanakaw, dagiti napudno ken dakes nga adipen, dagiti sangapulo a babbalasang, dagiti talento, ken ti karnero ken dagiti kalding. Paibinglay kadagiti miembro ti klase dagiti kinapudno a nasursuroda manipud kadagitoy a pangngarig a makatulong kadakuada nga agsagana para iti Maikadua a Yaay ti Apo. Ania ti ar-aramidenda a mangyaplikar kadagitoy a kinapudno iti biagda?

icon iti panangisuro

Isuro ti Doktrina

Joseph Smith—Mateo 1:21–37

Dagiti padto maipapan iti Maikadua a Yaay ti Mangisalakan ket makatulong kadatayo a mangsango iti masakbayan nga addaan pammati.

• Mabalin a narigat a maawatan ti sumagmamano a miembro ti klase dagiti pagilasinan ti Maikadua a Yaay ti Mangisalakan. Mabalin a makatulong daytoy kadakuada nga agtrabaho iti kada grupo ken mangilasin kadagiti pagilasinan a masarakanda iti Joseph Smith—Mateo 1:21–37. Mabalin pay a makatulong kadakuada a makaawat a nasaysayaat ti kinapateg dagitoy a pagilasinan no idiligda dagitoy kadagiti pagilasinan iti kalsada. Apay a napateg dagiti pagilasinan iti kalsada? Kasano a mayarig dagiti pagilasinan ti Maikadua a Yaay kadagiti pagilasinan iti kalsada? Kasano ti paggidiatanda? Mabalinmo pay nga ikkan ti tunggal grupo kadagiti panid ti papel iti sukog dagiti pagilasinan iti kalsada ket awisem ida a mangisurat iti tunggal papel iti pagilasinan a kasakbayanto ti Maikadua a Yaay. Paibinglaymo kadakuada no ania ti nasarakanda, ket awisem ti klase a mangilawlawag iti pakakitaan dagitoy pagilasinan iti lubong iti agdama.

Joseph Smith—Mateo 1:26–27, 38–55; Mateo 25:1–13

Nasken a kanayon a nakasaganatayo para iti Maikadua a Yaay ti Mangisalakan.

• Dagiti pangngarig iti Joseph Smith—Mateo 1:26–27, 38–55 ken Mateo 25:1–13 ket makatulong kadagiti miembro ti klase a mangbigbig iti kinapateg ti nakapagsagana para iti Maikadua a Yaay. Awisem dagiti miembro ti klase a mangsukisok kadagitoy a bersikulo ket ibinglayda no ania ti mariknada a yaw-awis ti Mangisalakan nga aramidentayo. Nangted ni Elder David A. Bednar iti maysa a kayulogan ti pangngarig maipapan iti sangapulo a babbalasang a makatulong (kitaen iti “Dagiti Nainayon a Resources”). Apay a nasken a mapadasan ti tunggal maysa kadatayo ti pannakapasurot para iti bagbagitayo? Kasano nga aramidentayo daytoy? Ania ti mainayon ti Doktrina ken Katulagan 45:56–57 iti pannakaawattayo iti daytoy a pangngarig?

• Bayat ti panangsursurom iti panagsubli ti Mangisalakan, mabalin nga aggigiddan a basaen wenno kantaen dagiti himno maipapan iti Maikadua a Yaay (kitaen iti “Jesus Christ—Second Coming” iti topical index a masarakan iti likudan ti hymnbook).

Mateo 25:14–46

Iti Maudi a Panangukom, itedtayonto iti Apo ti pakaammuan maipapan ti biagtayo.

• Ti pangngarig dagiti talento ken ti pangngarig ti karnero ken dagiti kalding ket mabalin a mangparegta kadatayo a mangpanunot maipapan iti pakaammuan ti biagtayo nga itedtayonto iti Apo iti Maudi a Panangukom. Mabalin nga aggigiddankayo a mangbasa kadagiti pangngarig ket awisem ti tunggal miembro ti klase a mangibinglay iti maysa a saludsod a mabalin a saludsoden ti Mangisalakan maipanggep iti biagtayo inton maukomtayo. Mangted iti oras tapno agplano dagiti miembro ti klase kadagiti wagas a pakapagtignayandanto kadagiti impresion a naawatda kabayatan ti panaglilinnawag.

  ti karnero ken dagiti kalding

  Inusar ni Cristo ti karnero ken dagiti kalding tapno mangisuro maipapan iti Maudi a Panangukom (kitaen iti Mateo 25: 31–33).

• Tapno maparegta ti panaglilinnawag maipapan iti Mateo 25: 34–40, mabalinmo nga awisen dagiti miembro ti klase a mangibinglay kadagiti pagwadan dagiti tao a mangipakita iti panangngaasi a nailadawan kadagitoy a bersikulo. Mangted kadakuada iti oras nga agutob no asino ti mabalin nga agkasapulan iti serbisioda. Ania dagiti sumagmamano a maaramat a wagas tapno mapakantayo dagiti mabisin, makawesantayo dagiti lamulamo, ken masarungkarantayo dagiti masakit?

resources icon

Dagiti Nainayon a Resources

Ti lana ti pannakapasurot wenno kumbersion.

Insingasing ni Elder David A. Bednar daytoy mabalin a kayulogan ti pangngarig dagiti sangapulo a babbalasang:

“Ibilangyo ti lana a lana ti pannakapasurot [kitaen iti Mateo 25:4–9]. …

“Naimot kadi dagiti lima a manakman a babbalasang ken saan a nangibinglay, wenno husto kadi nga ipakpakitada a saan a mabalin a mabulod ti lana ti pannakapasurot wenno kumbersion? Maited kadi iti sabali a tao ti naespirituan a pigsa nga agbanag manipud iti agtultuloy a panagtungpal kadagiti bilin? Maited kadi iti maysa nga agkasapulan iti pannakaammo a nagun-od babaen ti napasnek a panagadal ken panagutob kadagiti nasantuan a kasuratan? Mayakar kadi iti tao a maipaspasango iti rigat wenno dakkel a karit ti talna ti ebanghelio a maisangbay iti maysa a napudno a Santo iti Ud-udina nga Aldaw? Ti nalawag a sungbat iti tunggal maysa kadagitoy a saludsod ket saan.

“Kas iti inyunay-unay a nasayaat dagiti manakem a babbalasang, tunggal maysa kadatayo ket nasken a ‘gumatangtayo para iti bagbagitayo.’ Saan nga iladladawan dagitoy naparegta a babbai a kasapulan ti bayadan; ketdi, yunay-unayda ti pagrebbengantayo a mangpatalinaed a nakasindi dagiti pagsilawantayo iti pammaneknek ken panggun-od iti abasto a kasapulan a lana ti pannakapasurot wenno kumbersion. Magun-od daytoy napateg a lana iti tunggal tedted—’tunggal binatog [ken] tunggal pammilin’ (2 Nephi 28:30), siaanus ken sipupursigi” (“Converted unto the Lord,” Liahona, Nob. 2012, 109).

Panangpadur-as iti Panangisurotayo

Siguraduem a mangisursuroka iti pudno a doktrina. “Agtultuloy a saludsodem iti bagim, ‘Kasano a matulonganto ti panangisurok dagiti miembro ti klasek a mangpatibker iti pammatida ken ni Cristo, agbabawi, agaramid ken agtungpal kadagiti katulagan iti Dios, ken umawat iti Espiritu Santo?’” (Panangisuro iti Wagas ti Mangisalakan, 20).