Ti Nayaw-awan nga Anak, ni Liz Lemon Swindle

Mayo 1–7

Lucas 12–17; Juan 11

“Makipagrag-okayo Kaniak; gapu ta Nabirokak ti Napukaw a Karnerok”

Rugiam ti panagsaganam babaen ti nainkararagan a panagadalmo iti Lucas 12–17 ken Juan 11. Ania ti “napukaw a karnero” iti klasem ti umay iti panunotmo? Usarem ti Umaykayo, Sumurot Kaniak—Para kadagiti Indibidual ken Pamilia ken daytoy a balabala bayat ti panagkalikagummo a manggun-od iti pannarabay ti Apo maipapan iti no kasano ti kasayaatan a maipaay dagiti kasapulan dagiti miembro ti klase, uray no saanda a dumardar-ay iti klase.

Yawis ti Panagbibinninglay

Ti panangyaplikar ket napateg a paset ti panagsursuro, isu nga awisem dagiti miembro ti klase a mangibinglay iti no kasano a pinilida nga agbiag iti maysa a banag a nasursuroda manipud kadagiti nasantuan a kasuratan iti daytoy a lawas.

Isuro ti Doktrina

Lucas 14:15–24

Awan ti umdas a panagpambar iti saan a panangawat iti ebanghelio.

• Tapno matulongan dagiti miembro ti klase nga agadal iti pangngarig maipapan iti dakkel a pangrabii, ipapanmo nga adda pasken a pangawisam kadakuada a sikanto ti agsangaili. Paibinglay kadakuada ti sumagmamano a rason no apay a makadar-ayda wenno saanda a makadar-ay. Basaenyo ti Lucas 14:15–24 nga aggigiddan, ket paglilinnawagan dagiti pambar dagiti tao iti pangngarig idi naawisda iti maysa a fiesta a nangibagi kadagiti bendision ti ebanghelio. Ania dagiti panagpambar dagiti tao ita iti saanda a panangawat kadagiti awis ti Mangisalakan nga umawat kadagiti bendision ti Nailangitan nga Ama? Nalabit a mabalin nga ibinglay dagiti miembro ti klase dagiti bendision a naawatda idi nagaramidda kadagiti sakripisio a kasapulan tapno agtungpal kadagiti pagbatayan ti ebanghelio.

Lucas 15

Mabalintayo a sapulen dagiti napukaw ket makipagrag-otayo iti Ama intono agsublida.

• Kasano nga ikkamto iti gundaway dagiti miembro ti klasem a mangiburay iti nasursuroda maipanggep iti tallo a pangngarig iti Lucas 15? Ibilangmo ti panangdutok iti tunggal miembro ti klase a mangrebyu iti maysa kadagiti pangngarig. Mabalinda a sapulen ken ibinglay dagiti sungbat kadagiti saludsod kas kadagitoy: Ania dagiti balikas a mangipakita no kasano ti rikna ti Nailangitan nga Ama kadagiti napukaw? Ania ti isingasing dagitoy a pangngarig no kasano a nasken a tumulongtayo iti amin nga annak ti Dios? Mabalin nga ibinglay dagiti miembro ti klase no kasano a nasarakan ida ti Mangisalakan idi nariknada a napukawda.

• Ti aggigiddan a panagkanta iti “Dear to the Heart of the Shepherd” (Hymns, no. 221) ket mabalin a napnuan kaipapanan a pangnayon kadagiti panangisuro kadagitoy a pangngarig.

• Kabayatan ti panangrebyum iti pangngarig ti nayaw-awan nga anak, mabalin a mairanud dagiti miembro ti klase babaen iti panangipamaysa kadagiti balikas, garaw, ken pammati ti tunggal tao iti pangngarig. Ania ti masursurotayo manipud iti tungal tao? Nalabit a mabalin nga isurat dagiti miembro ti klase ti kasukat a panangigibus iti pangngarig a maiduma ti ugali ti in-inauna nga anak a lalaki iti kabsatna. Ania ti isuro kadatayo ti balakad ti ama iti pangngarig maipapan iti no kasano ti nasken a mariknatayo maipapan kadagiti napukaw ken dagiti agsubli iti ebanghelio? (Kitaen met iti palawag ni Elder Jeffrey R. Holland iti “Dagiti Nainayon a Resources.”) Wenno mabalinmo nga idawat kadagiti miembro ti klase a mangipapan nga isuda ti ama iti daytoy a pangngarig. Ania dagiti mainayon a balakad nga itedna ti in-inauna nga anak a lalaki a makatulong kenkuana nga agrag-o iti panagdur-as wenno balligi dagiti dadduma?

Lucas 17:11–19

Ti panagyamanko kadagiti bendisionko ti mangyasidegto nga ad-adda kaniak iti Dios.

• Awisem dagiti miembro ti klase a mangibinglay no ania ti nasursuroda maipapan iti panagyaman manipud iti panagadalda iti Lucas 17:11–19 ken iti video a “President Russell M. Nelson on the Healing Power of Gratitude” (ChurchofJesusChrist.org). Kasano a nabendisionan ti managyaman nga agkukutel iti panangipeksana iti panagyamanna. Kasano a mabendisionantayo no yebkastayo ti panagyamantayo? Mabalin a mangisingasing dagiti miembro ti klase kadagiti wagas a pangipakitaantayo iti panagyamantayo iti Dios ken iti dadduma.

Juan 11:1–46

Ni Jesucristo isu ti Panagungar ken ti Biag.

• Maysa a wagas tapno maamiris ti Juan 11:1–46 ket ti mangidawat kadagiti miembro ti klase nga agsisinnublat nga agbasa kadagiti bersikulo ket awisen ida nga agsardeng ket ilawlawagda ti tunggal gundaway no masarakanda ti pakakitaan ti pammati ken ni Jesucristo. Mabalinmo nga idawat kadagiti miembro ti klase a mangibilang kadagiti pannirigan dagiti tao a nairaman—agraman ti Mangisalakan, dagiti Apostol, ni Marta, ni Maria, ken ni Lazaro. Ania ti masursurotayo manipud iti tunggal maysa kadakuada? Nalabit a mabalin nga ibinglay dagiti padas dagiti miembro ti klase idi napapigsa ti pammatida ken ni Jesuscristo bayat ti maysa a pannubok.

Dagiti Nainayon a Resources

Panagsursuro manipud iti sabali a napukaw.

Kastoy ti napaliiw ni Elder Jeffrey R. Holland iti kabsat nga inauna ti nayaw-awan nga anak: Saan a makagura unay daytoy nga anak a nagawiden ti kabsatna no di ketdi makagura gapu ta naragsak unay dagiti nagannak kenkuana iti daytoy. … Nasken a padur-asenna pay ti pannakipagrikna ken panangngaasi, ti kasapulan a pannirigan tapno makita a saan a panagkaribal ti panagsubli. Isu ti kabsatna. Bayat ti panagpakaasi ti amana kenkuana tapno kumita, isu ket maysa idin a natay, ken itan sibibiag. Isu ti maysa a napukaw ken itan nasarakan” (“The Other Prodigal,” Ensign, Mayo 2002, 63).

Panangpadur-as iti Panangisurotayo

Tulongam ti maysa a tao. Kas iti pastor iti pangngarig ti Mangisalakan (kitaen iti Lucas 15:4), “matulongam dagiti awan iti klasem. Dagiti gundawaymo a mangisuro ken mangpapigsa kadagiti miembro ti klase ken mangtulong kadakuada nga umasideg ken ni Cristo ket agtultuloy iti labes ti siled ti klase ken iti labes dagiti dumardar-ay kadagiti pormal nga adalenyo” (Panangisuro iti Wagas ti Mangisalakan, 8).