Ni Zaqueo iti Kayo ti Sikamoro, ni James Tissot

Mayo 15–21

Mateo 21–23; Marcos 11; Lucas 19–20; Juan 12

“Adtoy, Umayen ti Ariyo”

Bayat ti panangbasam iti Mateo 21–23; Marcos 11; Lucas 19–20; ken Juan 12, kitaen dagiti pagbatayan a makatulongto a mangipaay iti kasapulan dagiti tao a sursuruam. Ti Espiritu Santo ti mangparegta kenka tapno ammom no kasano a tulongam dagiti miembro ti klase a mangtakuat kadagita a pagbatayan.

Yawis ti Panagbibinninglay

Sumagmamano nga aldaw sakbay ti klase, awisem ti sumagmamano a miembro ti klase nga agsagana a mangibinglay iti maysa a padasda bayat ti panagadalda kadagiti naidutok a kapitulo iti daytoy a lawas. Idawatmo kadakuada a mangisarita maipapan kadagiti bendision a sumangbay kadakuada bayat ti panagadalda iti nasantuan a kasuratan bayat ti lawas.

Isuro ti Doktrina

Lucas 19:1–10

Personal nga am-ammonatayo ti Mangisalakan.

• Nalabit a narikna dagiti miembro ti klasem a naliwayan wenno nalipatan idan iti panawen iti biagda. Makatulong kadakuada ti pakaammuan maipapan ken ni Zaqueo tapno maawatanda nga am-ammo ida ti Nailangitan nga Ama ken ni Jesucristo ken ipatpategda ida. Tapno matulongan dagiti miembro ti klase a mangyarig itoy a pakaammuan iti biagda, awisem ida a mangipapan iti bagbagida nga isuda ni Zaqueo. Ania iti panagkunayo a nasursurona maipapan iti Mangisalakan manipud iti padasna? Ania ti masursurotayo manipud kadagiti panagkagumaan ni Zaqueo maipapan iti panagsapsapulna iti Mangisalakan?

Mateo 21:1–11; Marcoa 11:1–11; Lucas 19:29–44; Juan 12:12–16

Ni Jesucristo isu ti Aritayo.

• Maysa a simple nga aktibidad ti mangyam-ammo iti panaglilinnawag maipapan iti naballigian nga iseserrek ti Mangisalakan iti Jerusalem: mabalin nga idrowing ti sumagmamano a miembro ti klase dagiti banag iti pisarra nga adda pakainaiganna iti ari, a kas iti korona wenno trono, idinto a pugtuan dagiti dadduma pay dagiti idrowdrowingda. Kalpasanna mabalin dagiti sabali pay a miembro ti klase ti mangidrowing iti urbon ken sangsanga ti kayo. Ania ti pakainaigan dagitoy a banag iti ari? Kalpasanna mabalinmo nga iparang ti ladawan ti naballigian nga iseserrek ti Mangisalakan iti Jerusalem iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ket awisem dagiti miembro ti klase a mangbasa iti Marcos 11:1– 1. Kasano a nabigbig dagitoy a tao ni Jesus kas Arida? Kasano nga agdaydayawtayo ken ni Jesucristo kas Aritayo babaen kadagiti balikas ken tignaytayo?

Mateo 22:34–40

Dagiti dua a naindaklan a bilin ket ayaten ti Dios ken ayaten dagiti dadduma kas iti bagbagitayo.

• Kasano a matulongam dagiti miembro ti klase a makaawat a “kadagitoy dua a bilin”—panagayat iti Dios ken panagayat iti kaarrubatayo—“mapukpok amin a linteg ken ti sinao dagiti mammadto”? (Mateo 22:40). Kalpasan ti panangbasa iti Mateo 22:34–40 nga aggigiddan, mabalinmo nga isurat ti Ayatem ti Dios ken Ayatem ti padam a tao iti pisarra. Mangted iti tunggal miembro ti klase iti papel nga adda nakasurat a maysa a bilin iti daytoy. Awisem dagiti sumagmamano kadakuada a mangbasa iti bilinda ket saritaenda no kasano a makatulong kadatayo ti bilinda a mangtungpal iti maysa wenno isu amin kadagiti dua a naindaklan a bilin. Kalpasan a mailawlawagda ti bilinda, mabalin nga ikabilda iti pisarra ti ipapelda. Apay nasken a laglagipen nga amin a bilin a mainaig iti dua a naindaklan a bilin? (kitaen iti “Dagiti Nainayon a Resources”).

Mateo 23:13–33

Masalaknibantayonto no liklikantayo ti panangsurot kadagiti manangidalan a bulsek.

• Mangted kadi iti pagimbagan kadagiti miembro ti klase ti panangilawlawag iti termino a “manangidalan a bulsek,” nga inusar ti Mangisalakan a pangiladawan kadagiti naespirituan a bulsek a Fariseo ken escriba? (Mateo 23:16). Mabalinmo a panunoten ti maysa a wagas a pangipakitaan no ania koma ti kayarigan para iti maysa a tao a sumurot iti maysa a tao a saan a makakita. Wenno mabalin nga ilista ti klase iti pisarra dagiti kababalin ti maysa a manangidalan a bulsek [blind guide], kas nailadawan iti Mateo 23:13–33. Mainayon iti listaan, ibilangmo ti panangsapul kadagiti mainayon a nasantuan a kasuratan a mangisuro maipapan iti naespirituan a kinabulsek, kas iti 2 Taga Corinto 4:3–4; 2 Nephi 9:28–32; ken Jacob 4:14. Kasano a mailasin ken maliklikantayo dagiti manangidalan a bulsek?

Kinondena ti Mangisalakan dagiti Fariseo a kas managinsisingpet ken manangidalan a bulsek.

Dagiti Nainayon a Resources

Ti panagayat iti Dios ken panagayat iti padatayo a tao ti pundasion ti amin nga aramidentayo.

Maibatay iti dua a naindaklan a bilin a masarakan iti Mateo 22:37–39, insuro ni Presidente M. Russell Ballard:

“Ti panagtungpal kadagita a dua a bilin ket mangted iti maysa a wagas a pakapadasan iti nataltalna ken naragrag-o a padas. No ayaten ken pagserbiantayo ti Apo ken ayaten ken pagserbiantayo dagiti kaarrubatayo, gagangay a mariknatayo a naragragsaktayo, a sumangbay kadatayo nga awan ti sabali pay a nasaysayaat a wagas.

“Ti panagayat iti Dios ken panagayat kadagiti kaarrubatayo ket ti pundasion a mainaig iti doktrina ti ministering; panagsursuro a naisentro iti pagtaengan ken suportado ti Simbaan; naespirituan a panagdaydayaw iti Sabbath; ken ti aramid ti pannakaisalakan iti agsumbangir a belo a suportado kadagiti Relief Society ken elders quorum. Maibatay amin dagitoy iti nadiosan a bilin nga ayatentayo ti Dios ken ayatentayo dagiti padatayo a tao. Adda kadi pay mabalin a sabali pay a nalawlawag, napatpateg, ken nasimsimple ngem iti dayta?” (“The True, Pure, and Simple Gospel of Jesus Christ,” Liahona, Mayo 2019, 29).

Panangpadur-as iti Panangisurotayo

Saan a nasken nga isurom ti amin a banag. “Adu ti paglilinnawagan iti tunggal adalen, ngem saan a nasken nga isuro ti amin a banag iti maysa a class period tapno masagid ti puso ti maysa a tao—masansan nga umdasen ti maysa wenno dua a kangrunaan a punto. Kabayatan ti panangutobmo iti kasapulan dagiti agad-adal, tulongannakanto ti Espiritu a mangilasin no ania a pagbatayan, estoria, wenno nasantuan a kasuratan ti nagnangruna a napnuan kaipapanan kadakuada” (Panangisuro iti Wagas ti Mangisalakan, 7).