“Abril 24–30. Juan 7–10: ‘Siak ti Naimbag a Pastor,’” Umaykayo, Sumurot Kaniak—Para iti Sunday School: Baro a Tulag 2023 (2022)
“Abril 24–30. Juan 7–10,” Umaykayo, Sumurot Kaniak—Para iti Sunday School: 2023
Saanka a Dusaen, ni Eva Koleva Timothy
Abril 24–30
Juan 7–10
“Siak ti Naimbag a Pastor”
Makagun-odkanto ken dagiti miembro ti klasem kadagiti nalawag a pannakammo ken pannakaawat [insights] bayat ti panangbasam iti Juan 7–10 itoy a lawas. Laglagipem a nasken a mangsuplemento dagiti kapanunotan iti daytoy a balabala imbes a mangsukat iti inspirasion a maawatmo babaen ti panagadal kadagiti nasantuan a kasuratan.
Yawis ti Panagbibinninglay
Ipalagip kadagiti miembro ti klase maipapan iti kinapateg ti panangaramid kadagiti pagtaenganda a sentro a pagsursuruan iti ebanghelio. Kiddawem kadakuada nga iburayda no ania ti insuro ti Espirtu Santo kadakuada bayat ti panangadalda iti Juan 7–10 iti pagtaenganda, kas individual wenno kaduada ti pamiliada.
Isuro ti Doktrina
Ni Jesucristo ti Mangisalakan ti lubong.
-
Iti intero a Juan 7–10, inaramid ti Mangisalakan iti sumagmamano a waragawag a makatulong kadagiti miembro ti klase a nasaysayaat a maawatanda ti misionna ken mayasidegtayo nga ad-adda Kenkuana. Ibilangmo ti panangawis kadagiti miembro ti klase a mangbasa kadagiti sumaganad a binatog ti nasantuan a kasuratan ket ibinglay no ania ti isuro dagitoy maipapan iti nadiosan a mision ti Mangisalakan. Kasano nga ipatungpal ni Cristo dagitoy nga akem iti biagtayo?
-
Juan 7:37–39: Ti ubbog ti “nabiag a danumr”
-
Juan 9:8–10, 35–38: “Ti Anak ti Dios”
-
Juan 10:7–9: “Ti ruangan”
-
Juan 10:11–14: “Ti naimbag a pastor”
-
Silaw ti Lubong; ni Howard Lyon
No agbiagtayo kadagiti pannursuro ni Jesucristo, maammuantayonto a pudno dagitoy.
-
Iti dadduma a wagas, mabalin a ti pananggun-od iti pammaneknek maipada iti panagsursuro iti baro a paglaingan—agpadpada a makasapul iti aramid ken padas. Tapno mailadawan daytoy mabalin nga awisem dagiti miembro ti klase nga addaan iti maysa a paglaingan, kas ti panagtukar iti instrumento, tapno mailawlawag no kasano a naasada kadagita a paglainganda. Apay a saan nga umanay a basaen laeng ti maipanggep iti maysa a paglaingan wenno buyaen ti maysa a mangipakpakita kadaytoy? Kas maysa a klase, paglilinnawagan no kasano a ti panagkagumaan iti panagsanay iti maysa a paglaingan ket maipada iti naespirituan a pagtuladan ti Mangisalakan a nailadawan iti Juan 7:14–17. Kasano a maiduma daytoy?
-
Nalabit a mabalin nga iburay dagiti miembro ti klase dagiti padas a nangtulong kadakuada a manggun-od iti pammaneknek babaen iti panagbiag iti maysa a kinapudno ti ebanghelio. Mangted iti oras kadagiti miembro ti klase a mangpanunot iti maysa a pagbatayan ti ebanghelio a kayatda a pakagun-odan iti napigpigsa a pammaneknek, ket kalpasanna allukoyen ida a mangituding kadagiti nalawag a panggep a tun-oyen nga agbiag a naan-anay iti dayta a pagbatayan.
Maited ti asi ti Mangisalakan iti amin nga agbabawi.
-
Kadagiti makarikna a nakondenada gapu iti basbasolda, ti estoria maipapan iti Mangisalakan a mangidiaydiaya iti asi ken panagbabawi iti babai a nagbasol iti pannakikamalala ket mabalin a pagtaudan ti pammaregta. Wenno, no marikna a masulisog dagiti miembro ti klase a mangkondena kadagiti dadduma gapu kadagiti basolda, mabalin nga agserbi ti estoria kas maysa a pammallaag. Mabalinmo nga awisen dagiti miembro ti klase a mangbasa iti Juan 8:1–11, nga agsapsapul kadagiti sungbat dagiti saludsod kas iti sumaganad: Ania ti isuro daytoy nga estoria maipapan iti asi ti Mangisalakan? Kasano a makatulong kadatayo ti panangawat iti asina no agbasoltayo no mariknatayo a masulisog a mangkedngan kadagiti dadduma? (kitaen iti Alma 29:9–10).
-
Tapno matulongan dagiti miembro ti klase a mangsapul iti personal a pakainaigan iti Juan 8:1–11, ibilang ti panangbingay iti klase iti tallo a grupo—maysa ti mangipokus kadagiti balikas ken tignay dagiti Fariseo, maysa ti mangipokus kadagiti balikas ken tignay ti Mangisalakan, ken maysa ti mangipokus kadagiti balikas ken tignay ti babai. Mabalinda nga aramiden daytoy bayat ti panagbasada ti pakaammuan wenno bayat iti panangbuyada iti video a “Go and Sin No More” (ChurchofJesusChrist.org). Awisen ti tunggal grupo nga agaramid iti listaan dagiti naespirituan a kinapudno a masursuroda manipud iti panagbasa iti tunggal paset ti pakaammuan.
-
No dadduma saantayo nga ammo dagiti wagas a pangkedngantayo kadagiti dadduma. Adtoy ti maysa nga aktibidad a mangtulong kadagiti miembro ti klase a mangparmek iti daytoy nga ayo: Agpatulongka iti klase a mangaramid iti listaan dagiti wagas a pangkedngantayo kadagiti tao (iti langada, ugalida, nagtaudanda, ken dadduma pay). Ikkam dagiti miembro ti klase kadagiti panid ti papel a nagetteng iti sukog ti maysa a bato, ket idawatmo kadakuada a pumili iti maysa a wagas a pangkedngan kadagiti dadduma a makarikna a nagbasolda ket isurat daytoy iti papel a bato. Ania ti masursurotayo manipud kadagiti balikas ti Mangisalakan kadagiti Fariseo iti Juan 8:1–11? Awisem ti klase a mangisurat iti sabali a bangir ti papelda a bato ti maysa a banag a mangipalagipto kadakuada a saan a mangkedngan (nalabit a maysa a ragup ti balikas manipud iti Juan 8).
No maam-ammotayo ni Jesucristo, maam-ammotayo ti Ama.
-
Ania ti isuro dagiti balikas ti Mangisalakan iti Juan 8:18–19, 26–29 maipapan iti pakainaiganna iti Amana? Kalpasan iti panangbasa ken panangilawlawag kadagitoy a bersikulo, mabalin nga ilista dagiti miembro ti klase iti pisarra ti sumagmamano a banag nga inaramid, insao, wenno insuro ni Jesus. Ania ti masursurotayo manipud kadagitoy a pagarigan?
Panangpadur-as iti Panangisurotayo
Agbiag a maikari iti pannarabay ti Espiritu. No agbiagka a mayannurot iti ebanghelio, maikarika iti panangkadkadua ti Espiritu. No kalikagumam a gun-oden ti pannarabayna, ikkannakanto kadagiti kapanunotan ken impresion maipapan iti no kasano a maipaaymo ti kasapulan dagiti sursuruam. (Kitaen iti Panangisuro iti Wagas ti Mangisalakan, 5.)