Panagbalbaliw-langa ni Cristo

Ti Panagbalbaliw ti Langa; ni Carl Heinrich Bloch

Abril 10–16

Mateo 15–17; Marcos 7–9

“Sika ti Cristo”

Maysa kadagiti kangrunaan a panggepmo a kas maysa a mannursuro ti mangtulong kadagiti dadduma a mangbukel iti pammatida ken ni Jesucristo. Laglagipem daytoy bayat ti panagadalmo kadagiti nasantuan a kasuratan iti daytoy a lawas. Ania ti makitam a makatulong kadagiti miembro ti klase tapno naun-uneg a mamatida Kenkuana?

icon iti panagbibinninglay

Yawis ti Panagbibinninglay

Maysa a wagas tapno maallukoymo dagiti miembro ti klase nga agadalda a bukod kadagiti nasantuan a kasuratan ken kaduada dagiti pamiliada ket ti panangawis kadakuada a mangibinglay iti tunggal lawas no kasano a nakatulong kadakuada a nakaawat iti paltiing ken naparaburan ti biagda iti panagadalda kadagiti nasantuan a kasuratan. Kas pagarigan, kasano a naimpluensiaan ti panagadalda kadagitoy a kapitulo kadagiti pilida iti daytoy a lawas?

icon iti panangisuro

Isuro ti Doktrina

Mateo 16:13–17

Umay ti pammaneknek maipapan ken ni Jesucristo babaen ti paltiing.

• Adda kadi asino man kadagiti miembro ti klasem a nasken a mangilawlawag iti maysa a tao no kasano nga ammoda a pudno ti ebanghelio? Iti Mateo 16:13–17, ania ti insuro ti Mangisalakan maipapan ti no kasano nga awatentayo ti pammaneknek? Mabalinmo nga ibinglay maipapan ti no kasano a nagun-od ni Alma ti pammaneknekna (kitaen iti Alma 5:45–46) wenno no ania ti insuro ti Apo ken ni Oliver Cowdery maipapan iti paltiing (kitaen iti Doktrina ken Katulagan 6:14–15, 22–23; 8:2–3). Ania iti panagkunayo a mabalin a kinuna ni Pedro wenno Alma wenno Oliver Cowdery no adda maysa nga agsaludsod kadakuada no kasano a naammuanda a pudno ti ebanghelio?

• Mabalin nga adda dagiti tao iti klasem a mangikarkararag iti personal a paltiing, ngem saanda nga ammo no kasano a mailasin daytoy no umay. Iti HearHim.ChurchofJesusChrist.org, mabalinmo a makita ti video nga ibinglay dagiti lider ti Simbaan no kasanoda a nailasin ti timek ti Apo. Mabalinyo a buyaen ti maysa wenno ad-adu pay kadagitoy a video iti klase ket pagsasaritaan dagitoy a video no ania ti isuroda maipanggep iti panangawat iti paltiing. Ania dagiti dadduma pay a pannursuro wenno nasantuan a kasuratan a mapanunotmo a makatulong iti maysa a tao a mangilasin iti personal a paltiing? (Kas pagarigan, kitaen iti 1 Ar-ari 19:11–12; Taga Galacia 5:22–23; Enos 1:1–8; Doktrina ken Katulagan 6:22–24; 8:2–3; 9:7–9.)

Mateo 16:13–19; 17:1–9

Kasapulan dagiti tulbek ti priesthood para iti pannakaisalakantayo.

• Iti panangirugi iti panaglilinnawag maipapan kadagiti tulbek ti kinasaserdote, mabalinmo nga isurat dagiti reperensia kas kadagitoy iti pisarra: Mateo 16:19; Doktrina ken Katulagan 107:18–20; 128:8–11; 132:18–19, 59; Joseph Smith—Pakasaritaan 1:72; ken ti “Tulbek ti Kinasaserdote” iti Pangiwanwan iti Nasantuan a Kasuratan (scriptures.ChurchofJesusChrist.org). Kalpasanna awisen dagiti miembro ti klase a mangbasa iti maysa wenno ad-adu pay kadagiti binatog ken mangibinglay iti maysa a banag a masursuroda manipud kadagitoy maipapan iti tulbek ti kinasaserdote. Apay a kasapulantayo dagiti tulbek ti kinasaserdote?

• Tapno matulongan dagiti miembro ti klase a mapapigsa ti pammaneknekda iti pannakaisubli dagiti tulbek ti kinasaserdote iti ud-udina nga aldaw, mabalinmo nga awisen nga agadal ti kagudua ti klase iti Mateo 17:1–9 ken ti sabali pay a kagudua ti klase a mangadal iti Doktrina ken Katulagan 110. Kalpasanna mabalinda ti agbibinninglay iti tunggal maysa no ania ti nasursuroda ken isuratda dagiti pagpapadaan ti dua a pakaammuan. Makatulong pay ti video a “Priesthood Keys: The Restoration of Priesthood Keys” (ChurchofJesusChrist.org).

estatua ni Pedro a nakaiggem kadagiti tulbek

Dagiti tulbek ti priesthood ket ti turay a mangiturong iti pannakausar ti priesthood.

Marcos 9:14–30

No agkalikagum iti dakdakkel a pammati, mangrugitayo iti pammati nga adda kadatayo.

• Inusar ni Elder Jeffrey R. Holland ti pakaammuan maipapan iti maysa nga ama nga agkalkalikagum iti pannakaagas ti anakna tapno maisuro no kasano nga umasidegtayo iti Apo no mariknatayo a saan nga umdas ti pammatitayo (kitaen iti “Lord, I Believe,” Liahona, Mayo 2013, 93–95). Kalpasan iti panangbasa iti Marcos 9:14–30 kas maysa a klase, mabalin a paglilinnawagan a sangkamaysa dagiti tallo a kapaliiwan ni Elder Holland (kitaen iti “Nainayon a Resources”).

resources icon

Dagiti Nainayon a Resources 

Tallo a pammaliiw a makatulong kadatayo a manggun-od iti napigpigsa a pammati.

Kalpasan ti panangisaritana manen iti pakaammuan a masarakan iti Marcos 9:14–29, insuro ni Elder Jeffrey R. Holland:

“Umuna a pammaliiw maipanggep iti daytoy a pakaammuan ket no maipaspasango iti karit ti pammati, ipatalged nga umuna ti ama ti pigsana ket kalpasanna bigbigenna ti limitasionna. Awan duadua ken awan panagkedked ti umuna a panangibagana: ‘Apo, mamatiak.’ Masaok iti amin nga agtarigagay iti napigpigsa a pammati, laglagipem daytoy a tao! Kadagiti kanito ti panagbuteng wenno panagduadua wenno pannakariribuk, pagtalinaedenyo ti pammati a napadur-asyon, uray no adda pagpatinggaanna dayta a pammati. …

“Ti maikadua a pammaliiw ket ti pagdumaan ti umuna. No dumteng dagiti problema ken adda dagiti saludsod, saanyo a rugian ti panagsapsapul iti pammati babaen ti panangisaoyo no kasano ti kadakkel ti awan kadakayo, a mangrugi iti ‘kinaawan pammatiyo.’ … Diak idawdawat kadakayo nga agpammarangkayo nga addaankayo iti pammati nga awan kadakayo. Idawatko kadakayo nga agbalinkayo a napudno iti pammati nga adda kadakayo. …

“Maudi a pammaliiw: No dumteng ti duadua wenno parikut, saankayo nga agbuteng a dumawat iti tulong. No tarigagayantayo ti tulong a sipapakumbaba ken sipupudno kas iti inaramid daytoy nga ama, magun-odtayo daytoy,” (“Lord, I Believe,” Liahona, Mayo 2013, 93–94).

Panangpadur-as iti Panangisurotayo

Agdamagka kadagiti saludsod a mangyawis iti pammaneknek. Ti panagdamag kadagiti saludsod a mangallukoy kadagiti miembro ti klase a mangiburay kadagiti pammaneknekda ket mabalin nga epektibo a wagas a mangawis iti Espiritu. Kas pagarigan, no paglilinnawagan ti Mateo 16:13–17, mabalinmo a saludsoden, “Ania ti nasursurom maipapan iti Mangisalakan a nangpapigsa iti pammaneknekmo maipapan Kenkuana a kas Mangisalakan?” (kitaen iti Panangisuro iti Wagas ti Mangisalakan, 32.)