Ni Jesus a makipagpagna kadagiti disipulona nga agbagbagkat kadagiti basket ti tinapay

Marso 27–Abril 2

Mateo 14; Marcos 6; Juan 5–6

“Dikayo Agbuteng”

Bayat ti panangisaganam a mangisuro manipud iti Mateo 14; Marcos 6; ken Juan 5–6, sapulem dagiti mensahe nga adda pakainaiganna iti klasem. No aramidem daytoy, ibilangmo no kasano a mairaman dagiti miembro ti klase iti napnuan kaipapanan a padas kadagiti nasantuan a kasuratan.

icon iti panagbibinninglay

Yawis ti Panagbibinninglay

Maysa a wagas a panangirugi iti panaglilinnawag ket ti panangawis kadagiti sumagmamano a miembro ti klase a saggaysa a mangpili iti maysa a kapitulo manipud iti mabasa ken mangibinglay iti mensahe manipud iti dayta a kapitulo nga addaan iti kaipapanan kadakuada. Bayat ti panangibinglayda, mabalin nga agdamag iti saludsod dagiti miembro ti klase wenno mangnayon kadagiti nalawag a pannakaammo ken pannakaawat [insights].

icon iti panangisuro

Isuro ti Doktrina

Juan 5:16–47

Ni Jesucristo ti Ay-ayaten nga Anak ti Nailangitan nga Ama.

• Iti Juan 5, nangted ni Jesus iti sumagmamano a nalawag a pannakaammo ken pannakaawat maipapan iti Bagina, ti Amana, ken ti pakainaiganna iti Ama. Tapno matulongan dagiti miembro ti klase a mangtakuat kadagitoy a nalawag a pannakaammo ken pannakaawat [insights], padasem a bingayen ida kadagiti grupo ken ikkan ida iti sumagmamano a minuto a mangilista iti adu a kinapudno agingga a masarakanda kadagiti bersikulo 16–47 maipapan ti kinatao ti Dios, ken ni Jesucristo, ken maipapan iti relasionda. Awisem dagiti grupo nga agsisinnublat a mangbasa kadagiti kinapudno manipud iti listaanda. Kasano a matulongannatayo dagitoy a kinapudno a makaawat a nasaysayaat iti Nailangitan nga Amatayo ken ti Anakna? Kasano a masurottayo ti pagwadan ni Jesucristo iti panagtungpal iti Ama?

• Ti aktibidad iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ket mangisingasing a tandaanan iti tunggal gundaway nga inusar ni Jesus ti balikas nga Ama iti Juan 5:16–47. Awisem ti sumagmamano a miembro ti klase a mangibinglay no ania ti nasursuroda bayat ti panangkumpletoda iti aktibidad. Awisem ida a mangiburay kadagiti nalawag a pannakaammo ken pannakaawat a nagun-odda maipapan iti Nailangitan nga Ama ken iti Patpatgenna nga Anak.

Mateo 14:15–21; Marcos 6:33–44; Juan 6:5–14

Mapadakkel ti Mangisalakan dagiti nanumo a datontayo tapno maipatungpal dagiti panggepna.

• Ania ti makatulong kadagiti miembro ti klase a mangsapul iti personal a kaipapanan iti milagro ni Jesus a panangpakan ti lima a ribu? Mabalin a saludsodem no kasano a mangpatibker ti panagbasa maipapan ti milagro iti pammatida iti kabaelan ti Mangisalakan a personal a mangbendision kadakuada? Mabalinda a pagsasaritaan ti panawen a nakariknaanda a pinadakkel wenno pinaadu ti Mangisalakan dagiti panagkagumaanda tapno matulonganda a mangipatungpal iti maysa a banag a kasla imposible. Kasta pay, sakbay ti klase, mabalinmo nga idawat kadagiti miembro ti klase a mangitugotda iti klase iti maysa a ladawan wenno banag a mangibagi iti padasda.

  dagiti tinapay ken ikan

  Namilagruan a pinakan ni Jesus ti lima a ribu a tattao iti lima a tinapay ken dua nga ikan.

• Ti video a “The Feeding of the 5,000” (ChurchofJesusChrist.org) ket mabalin a makatulong kadagiti miembro ti klase a mangutob iti milagro a nailadawan kadagitoy a binatog. Ania dagiti detalye iti daytoy a pakaammuan a mangpatibker iti pammatitayo iti Mangisalakan? Kadagiti ania a wagas a naespirituan a mapakannatayo ti Mangisalakan? Kaano a pinakan ken tinulongannatayo ni Jesucristo?

Mateo 14:22–33

Awisennatayo ni Jesucristo a mangiwaksi kadagiti buteng ken panagduaduatayo tapno ad-adda a naan-anay a makaasidegtayo Kenkuana.

• Ti pakaammuan iti Mateo 14:22–33 ket makatulong kadagiti miembro ti klase a mangpapigsa iti pammatida iti Mangisalakan ken iti tarigagayda a mangsurot Kenkuana. Mangawis kadagiti miembro ti klase a mangbasa iti daytoy a pakaammuan, a nangnangruna a mangiturong iti pasnek kadagiti balikas nga insao ni Cristo, ni Pedro, ken ti dadduma pay nga Apostol. Kasano a nakatulong dagiti balikas ni Jesus ken ni Pedro a maaddaan iti pammati a panawanna ti bilog ket magna iti rabaw ti danum? Kasano a mayaplikar kadatayo dagiti patigmaan ni Jesus nga “agtalgedkayo” ken “dikayo agbuteng” (bersikulo 27) ita nga agdama? Ania ti masursurotayo manipud ken ni Pedro maipapan ti kaipapanan ti panagbalin a disipulo ni Cristo ken panagtalek Kenkuana? Mabalinmo nga allukoyen dagiti miembro ti klase a mangpanunot ken mangibinglay kadagiti padas a, kas ken Pedro, nakatignayanda a mangsurot iti Mangisalakan, uray no mapagduaduaan ti ibungana. Kiddawem kadakuada nga ibinglayda no ania ti nasursuroda manipud kadagiti padasda. Kasano nga immarayat ni Jesucristo kadagiti kanito a nagbuteng wenno nagduaduatayo?

Juan 6:22–71

Kas disipulo ni Cristo, nasken a natallugodtayo a mamati ken umawat iti kinapudno uray no narigat nga aramiden daytoy.

• Dagiti pasamak iti Juan 6 ket mangted iti makatulong a pannirigan no addaan iti saludsod dagiti tao maipapan iti doktrina, pakasaritaan, wenno dagiti pagannurotan iti Simbaan ni Cristo. Tapno matulongam dagiti miembro ti klase a maawatan dagitoy a pasamak, mabalinmo nga isurat dagiti saludsod kas kadagiti sumaganad iti pisarra tapno sungbatanda: Ania ti ninamnama dagiti tattao? (kitaen iti bersikulo 26). Ania ti sabali nga impaay ni Cristo kadakuada? (kitaen iti bersikulo 51). Ania ti di naawatan dagiti tao? (kitaen iti bersikulo 41–42, 52). Mabalinmo pay ti agdamag kadagiti kastoy a saludsod tapno matulongam dagiti miembro ti klase a yaplikar daytoy a salaysay iti biagda. Ania dagiti sumagmamano a wagas a mabalintayo a pilien tapno makipagna ken Cristo uray man pay no addaaantayo kadagiti saludsod wenno panagduadua? (kitaen iti bersikulo 66). Ania dagiti sumagmamano a doktrina, ordinansa, wenno dadduma pay a “balikas ti agnanayon a biag” a masarakan laeng iti naisubli a Simbaan ni Cristo? (kitaen iti bersikulo 67–69). Para iti nalawag a pannakaammo ken pannakaawat manipud iti agdama nga Apostol, kitaen iti mensahe ni Presidente M. Russell Ballard “To Whom Shall We Go?,” (Liahona, Nob. 2016, 90–92).

Panangpadur-as iti Panangisurotayo

Dumngeg. “Ti panagdengngeg ket maysa nga aramid ti ayat. … Dawatem iti Nailangitan nga Ama a tulongannaka a makaawat no ania ti sawen dagiti miembro ti klasem. Kabayatan ti panangikasom a nasayaat kadagiti nayebkas ken saan a nayebkas a mensaheda, ad-adda a maawatamto dagiti kasapulanda, pakaseknanda, ken tarigagayda” (Panangisuro iti Wagas ti Mangisalakan, 34).