Minuyongan ti Tanem

Abril 3–9

Paskua ti Panagungar

“Adino ti Yanna, O Patay ti Panagballigim?”

Bayat ti panagsaganam a mangisuro iti daytoy a lawas, ibilangmo no kasano mangpadur-as iti pammati ken ni Jesucristo ken ti Pannubbotna ti panaglilinnawag iti klase iti Domingo ti Paskua ti Panagungar.

icon iti panagbibinninglay

Yawis ti Panagbibinninglay

Saludsodem kadagiti miembro ti klase no kasano ti isusungbatda kadagiti saludsod a kas iti “Ania ti Pannubbot ni Jesucristo?” ken “Kasano a makaawatak iti bendision ti Pannubbot ni Cristo?” Awisem ida a mangibinglay iti uray ania a nabasada iti nasantuan a kasuratan iti daytoy a lawas a makatulong a mangsungbat kadagitoy a saludsod.

icon iti panangisuro

Isuro ti Doktrina

Isalakannatayo ni Jesucristo manipud iti basol ken ipapatay, a mangpapigsa kadatayo kadagiti pagkapsutantayo, ken mangliwliwa kadatayo kadagiti pannuboktayo.

• Maawatan kadi dagiti miembro ti klasem a liwliwaennatayo ni Jesus kadagiti pannuboktayo ken papigsaennatayo kadagiti pagkapsutantayo, kasta met nga isalakannatayo manipud iti basol ken patay? Maysa a wagas a makatulong kadakuada a mangtakuat kadagitoy a prinsipio ket mabalin nga isurat dagitoy a balikas iti pisarra: Basol, Ipapatay, Pannubok, Dagiti Pagkapsutan. Mabalin a mangbasa ti tunggal miembro ti klase iti maysa kadagiti nasantuan a kasuratan a nakalista iti “Dagiti Nainayon a Resources” ket mangutob no kasano a makatulong ti Mangisalakan kadatayo a mangparmek wenno mangibtur kadagitoy a banag. Kalpasanna mabalin nga isurat dagiti miembro ti klase no ania ti nasursuroda manipud kadagitoy a nasantuan a kasuratan iti baba ti tunggal paulo ken ibinglayda ti pammaneknekda maipapan ti Mangisalakan ken ti Pannubbotna.

  Ni Jesus iti krus

  Ti Pannakailansa iti Krus, ni Louise Parker

• Nalabit a makatulong ti simple nga adalen a banag [object lesson] tapno mangiladawan iti paggidiatan ti panagbalin a nadalus manipud iti basol ken panagbalin a naan-anay: Mabalinmo nga isurat iti pisarra dagiti umuna a sumagmamano a linia manipud iti Moroni 10:32, ngem iraman dagiti biddut iti ispeling ken grammar. Kalpasanna awisem ti maysa a miembro ti klase a mangpugas (ngem saanna nga aturen) dagiti biddut. Mangrisut kadi daytoy iti problema? Ania dagiti adalen a masursurotayo manipud iti daytoy nasantuan a kasuratan ken iti daytoy adalen a banag maipapan iti epekto ti Pannubbot ti Mangisalakan kadatayo? Mabalin pay a makatulong ti palawag ni Presidente Dieter F. Uchtdorf: “No ti kaipapanan ti pannakaisalakan ket panangpugas laeng kadagiti biddut ken basoltayo, ngarud ti pannakaisalakan—a nakakaskasdaaw la unay—ket saan a mangipatungpal kadagiti paggep ti Ama kadatayo. Nangatngato nga amang ti panggepna: Kayatna nga agbalin a kas Kenkuana dagiti annakna” (“The Gift of Grace,” Liahona, Mayo 2015, 108).

• Makatulong kadatayo dagiti estoria ken analohia tapno maawatantayo a nasaysayaat ti Pannubbot ni Cristo. Mabalinmo nga ibinglay ti maysa nga estoria wenno analohia manipud iti maysa kadagiti mensahe iti sapasap a komperensia iti “Dagiti Nainayon a Resources.” Wenno aggigiddankayo a mangbuya iti “Handel’s Mesiah: Debtor’s Prison” (video), ChurchofJesusChrist.org, ket paglilinnawagan no kasano a wayawayaannatayo ti Pannubbot ni Jesucristo manipud kadagiti nakaibaludantayo. Kalpasanna mabalin nga ibinglay dagiti miembro ti klase ti uray ania man a kapanunotan wenno kaririknada maipapan iti Mangisalakan ken ti Pannubotna para kadatayo.

Mateo 28:1–10; Lucas 24:13–35; Juan 20:1–29; 1 Taga Corinto 15:3–8, 55–58

Imburay dagiti saksi iti Baro a Tulag iti pammaneknek a pinarmek ni Jesucristo ti patay.

• Ibilang ti panangrebyu iti pakaammuan iti nasantuan a kasuratan maipapan iti umuna a Paskua iti Panagungar—ti Panagungar ni Jesucristo. Mabalinmo nga awisen ti maysa a miembro ti klase a mangisalaysay iti estoria kadagiti bukodna a balikas (kitaen iti Juan 20:1–17). Mabalinmo pay nga ipakita ti Bible video, a kas iti “He Is Risen” (ChurchofJesusChrist.org).

• Nalabit a makagun-od ti klasem iti naun-uneg a pannakaawat maipapan iti kinapateg dagiti saksi ti Panagungar ni Jesucristo no ipapanda nga isuda dagiti abogado wenno agipadpadamag a mangus-usig iti naibaga a nagungar ni Cristo. Awisem ida a mangsapul kadagiti tao iti nasantuan a kasuratan a mabalin nga agserbi a kas saksi (kitaen iti Mateo 28:1–10; Lucas 24:13–35; Juan 20:19–29; 1 Taga Corinto 15:3–8, 56–58). Mabalinda pay nga isurat iti ababa a pakagupgopan ti no ania ti mabalin nga isao dagitoy a tao no agtestigoda iti korte wenno no kauman ida para iti maysa a report ti damag.

• Maysa a wagas tapno mapauneg ti panangbigbigtayo iti pateg ti panagungar ti Mangisalakan ket ti mangpanunot no kasano a mailawlawagtayo ti pammatitayo kadagiti dadduma. Kasano nga ibinglay dagiti miembro ti klase dagiti pammaneknekda maipapan ken ni Jesucristo kadagiti sumaganad a kasasaad: naamiris ti maysa a miembro ti pamilia iti nakaro a sakit; napukawan ti maysa a gayyem ti maysa nga ipatpateg; agsaludsod ti maysa a kaarruba no apay a rambakanyo ti Paskua ti Panagungar. Allukoyem ida nga agibasar kadagiti nasantuan a kasuratan (kas kadagiti adda iti “Dagiti Nainayon a Resources”) bayat ti panagplanoda kadagiti sungbatda. Awisem ti sumagmamano a miembro ti klase a mangibinglay kadagiti kapanunotanda.

resources icon

Dagiti Nainayon a Resources

Dagiti Nasantuan a kasuratan maipapan iti Pannubbot ken Panagungar ti Mangisalakan.

• Isaias 25:8; 53:3–6

• Juan 20:11–17

• Taga Roma 8:31–39

• 2 Nephi 9:5–12

• Mosiah 3:5–10

• Alma 7:10–14; 11:42–44

• 3 Nephi 11:8–17; 27:13–20

• Moroni 7:41

• Doktrina ken Katulagan 19:15–19

Dagiti mensahe maipapan iti Pannubbot ken Panagungar ti Mangisalakan.

• Dale G. Renlund, “Consider the Goodness and Greatness of God,” Liahona,; Mayo 2020, 41–44

• Gerrit W. Gong, “Good Shepherd, Lamb of God,” Liahona, Mayo 2019, 97–100

• Sharon Eubank, “Christ: The Light That Shines in Darkness,” Liahona, Mayo 2019, 73–76

• Cristina B. Franco, “The Healing Power of Jesus Christ,” Liahona, Nob. 2020, 60–62

Panangpadur-as iti Panangisurotayo

Agbalinka a maysa a ramit ti Espiritu. “Panggepmo kas maysa a mannursuro ti saan a mangidatag iti maysa a napintas a presentasion ngem ketdi tapno makatulong iti dadduma nga umawat iti impluensia ti Espiritu Santo, nga isu ti pudno a mannursuro” (Panangisuro iti Wagas ti Mangisalakan, 10).