“Abril 17–23. Mateo 18; Lucas 10: ‘Anianto ti Aramidek Tapno Matawidko ti Biag nga Agnanayon?,’” Umaykayo, Sumurot Kaniak—Para iti Sunday School: Baro a Tulag 2023 (2022)
“Abril 17–23. Mateo 18; Lucas 10,” Umaykayo, Sumurot Kaniak—Para iti Sunday School: 2023
Ti Naimbag a Samaritano, ni Dan Burr
Abril 17–23
Mateo 18; Lucas 10
“Anianto ti Aramidek Tapno Matawidko ti Biag nga Agnanayon?”
Basaem ti Mateo 18 ken Lucas 10, ket isuratmo dagiti naespirituan nga impresionmo. Bayat ti panangawatmo kadagiti impresion, mabalin a saludsodem, kas insingasing ni Elder Richard G. Scott, “Adda kadi pay nasken a maammuak?” (“To Acquire Spiritual Guidance,” Liahona, Nob. 2009, 8).
Yawis ti Panagbibinninglay
Naglaon dagitoy a kapitulo iti adu a pagarigan dagiti pannursuro ti ebanghelio a maigidiat iti no ania ti isuro ti lubong kadatayo. Nalabit a mabalin nga iburay dagiti miembro ti klase dagiti sumagmamano a pagarigan a nakitada iti panagbasada iti daytoy a lawas. Kasano a bendisionannatayo ti Apo no yaplikartayo a kanayon dagiti pannusurona?
Isuro ti Doktrina
Nasken a pakawanentayo dagiti dadduma no nasken nga umawat iti pannakapakawan manipud iti Apo.
-
Kasano a mausarmo iti pangngarig ti awan asina nga adipen a mangparegta kadagiti miembro ti klase nga agbalin nga ad-adu pay a managpakawan? Nalabit a mabalinmo nga isurat iti pisarra ti kas iti sumaganad a saludsod ket mangawis kadagiti miembro ti klase nga utobenda dagitoy bayat ti panangisarita ti maysa a tao iti pangngarig: Asino ti ibagi ti ari? Asino ti ibagi ti awan asina nga adipen? Asino ti ibagi ti padana nga adipen? Ania ti ibagi dagiti utang? Mangawis kadagiti miembro ti klase a mangibinglay no ania dagiti mensahe ti pangngarig para kadakuada a mismo. (Kitaen met iti “Dagiti Nainayon a Resources.”)
-
Mabalinmo nga awisen ti klase tapno agaramid iti panangibagay iti pangngarig maipapan iti awan asina nga adipen a mangisuro kadagiti isu met laeng nga adalen maipapan iti pammakawan nga us-usaren dagiti agdama a kasasaad ken detalye. (Ibilang ti panangitrabahoda iti daytoy iti sagsangagrupo.) Paglilinnawagan no kasano a sinungbatan ti pangngarig ti saludsod ni Pedro maipapan iti no mamin-ano a nasken a pakawanenna.
Insarita ni Jesus maipapan iti kuarta ken utang a mangisuro maipapan iti pammakawan.
Tapno magun-od ti agnanayon a biag, nasken nga ayatentayo ti Dios ken ti padatayo a tattao.
-
Adtoy ti maysa a kapanunotan a mabalin a mangted kadagiti miembro ti klase iti baro a pannirigan ti pangngarig ti naimbag a Samaritano: Awisen ida nga agpammarang nga agpalpalutpotda iti maysa a kaso maipapan ti kellaat nga idadarup ken pannakatulisan iti kalsada iti nagbaetan ti Jerico ken Jerusalem. Kiddawem iti sumagmamano a miembro ti klase nga umay iti klase a nakasagana a mangibagi iti nadumaduma a tao iti pangngarig ket pagsasaritaanda ti pannakairamanda iti kaso. Kas pagarigan, ania dagiti sumagmamano a rason apay a saan a nagsardeng ti padi ken Levita a mangtulong iti nadunor a lalaki? Apay a nagsardeng ti Samaritano? Ania dagiti kapanunotan a mainayon ti agay-aywan iti pagdagusan? Kasano ti mabalin a narikna ti nadunor a lalaki maipapan iti tunggal maysa kadagiti dadduma? Siguraduem a mangparegta dagiti panaglilinnawag kadagiti miembro ti klase tapno agbalin a kas iti naimbag a Samaritano ken ti agay-aywan iti pagdagusan ken liklikan ti panagbalin a kas iti padi ken Levita.
-
Kasano a masungbatan ti pangngarig iti naimbag a Samaritano dagiti saludsod ken Jesus iti Lucas 10:25–29? Mangawis kadagiti miembro ti klase a mangisarita kadagiti panawen idi nariknada ti kas iti “maysa a lalaki” (bersikulo 30) a nagkasapulan la unay. Kasano nga immay ti tulong? Kasano kas miembro ti ward a sangkamaysa a makapagtrabahotayo a mangtulong kadagiti dadduma, a kas iti inaramid ti naimbag a Samaritano ken ti agay-aywan iti pagdagusan?
Pilientayo “dayta nasayaat a paset” babaen ti panagaramid kadagiti inaldaw a pili a mangiturong iti agnanayon a biag.
-
Kalpasan ti panangbasa iti Lucas 10:38–42 kas maysa a klase, mabalinmo a saludsoden kadagiti miembro ti klase no kasano koma ti reaksionda iti balakad ti Mangisalakan no isuda ti adda iti lugar ni Marta. Kasano a maapektuan daytoy a padas dagiti masakbayan a pilida? Kasano a maammuantayo no ania dagiti banag iti bukodtayo a biag nga agkasapulan iti ad-adu pay a panawen ken atensiontayo? Mabalin a sukisoken dagiti miembro ti klase ti mensahe ni Presidente Dallin H. Oaks “Good, Better, Best” (Liahona, Nob. 2007, 104–8) a mangkita iti balakad a makatulong kadakuada.
Dagiti Nainayon a Resources
Dagiti utang iti pangngarig ti awan asina nga adipen.
Ti panangkomento kadagiti utang iti pangngarig ti awan asina nga adipen, kinuna ni Elder Jeffrey R. Holland:
“Adda ti pagdudumaan iti kapanunotan dagiti iskolar maipapan iti gatad ti kuarta a nadakamat ditoy—ket usarek ti pateg ti kuarta ti U.S. kas pagibasaran—tapno nalaklaka ti panagbilang, no ti basbassit, a di mapakawan a 100 a sentabo nga utang ket kunatayo a $100 iti agdama a panawen, ti ngarud 10,000 a talento nga utang a napakawan ket mabalin nga aggatad iti $1 billion—wenno ad-adu pay!
“Kas personal nga utang, dakkel unay a gatad dayta—di pulos matukod ti panunot. (Awan ti makabusbos iti kasta a kawadwad ti kuarta!) Ala, para kadagiti panggep daytoy a pangngarig, makuna a narigat a maawatan; makuna nga awan daytoy iti kabalinantayo a mangtukod iti kaipapananna, ti saan a panagsao iti ania man iti kinaawan ti kabalinantayo nga agbayad. Gapu ta saan a maipanggep daytoy nga estoria iti dua nga adipen nga agsinsinnupiat iti Baro a Tulag. Estoria daytoy maipanggep kadatayo, ti nagbasol a pamilia ti tao—dagiti amin a tao nga adda utangna, managbasol, ken balud. Agguutang ti tunggal maysa kadatayo, ket pannakaibalud ti dusa ti tunggal maysa kadatayo. Ket nagtalinaedtayo amin koma a kasta no saan a gapu iti parabur ti maysa nga Ari a mangwayawaya kadatayo gapu ta ay-ayatennatayo ‘ken natignay iti panangngaasi kadatayo’ [Doktrina ken Katulagan 121:4]” (“Be Ye Therefore Perfect—Eventually,” Liahona, Nob. 2017, 41).
Panangpadur-as iti Panangisurotayo
Suroten ti pagwadan ti Mangisalakan. Bayat ti panangbasam kadagiti pakaammuan maipapan iti panangisuro ti Mangisalakan iti Baro a Tulag, sapulem dagiti adalen iti pagwadanna a makatulong kenka nga agbalin a nalalaing a mannursuro. Kas pagarigan, iti Lucas 10:25--37, ania ti inaramid ni Jesus a mangisuro iti agilinlinteg maipapan iti no kasano a magun-od ti agnanayon a biag?