“Marso 20–26. Mateo 13; Lucas 8; 13: ‘Ti Adda Lapayagna a Dumngeg, Dumngeg Koma’” Umaykayo, Sumurot Kaniak—Para iti Sunday School: Baro a Tulag 2023 (2022)
“Marso 20–26. Mateo 13; Lucas 8; 13,” Umaykayo, Sumurot Kaniak—Para iti Sunday School: 2023
Marso 20–26
Mateo 13; Lucas 8; 13
“Ti Adda Lapayagna a Dumngeg, Dumngeg Koma”
Bayat ti panangbasam, panunotem dagiti saludsod a mabalin nga adda kadagiti miembro ti klasem bayat ti panangpadasda nga umawat kadagiti mensahe dagiti pangngarig. Ania koma ti narigat a maawatan? Kasano a maisagananaka ti panagadalmo a mangsungbat kadagiti saludsodda?
Yawis ti Panagbibinninglay
Irebyum a kadua ti klase ti “Dagiti Kapanunotan tapno Mapadur-as ti Bukodmo a Panagadal iti Nasantuan a Kasuratan” iti Umaykayo, Sumurot Kaniak—Para kadagiti Indibidual ken Pamilia. Awisem dagiti miembro ti klase a mangibinglay kadagiti pamay-an nga inusarda iti panagadal iti Mateo 13 ken Lucas 8; 13.
Isuro ti Doktrina
Nasken a maisagana ti puspusotayo a mangawat iti balikas ti Dios.
-
Kasano a mausaryo ti pangngarig ti agmulmula a mangparegta kadagiti miembro ti klase a mangisagana iti puspusoda nga umawat iti balikas ti Dios? Mabalinyo nga isurat ti Dagiti disipulo ken Dadduma iti pisarra. Awisem dagiti miembro ti klase a mangbasa iti Mateo 13:10–17 ket saraken no kasano nga inladawan ti Mangisalakan dagiti paggidiatan dagiti disipulona ken dagiti dadduma pay a nakangngeg kadagiti pangngarigna. Kalpasanna kiddawem kadagiti miembro ti klase a mangsukisok kadagiti bersikulo 18–23, a mangsapsapul no ania ti mabalin a makaigapu iti lapayag nga agbalin a “narigat a makangngeg” wenno nakakidem dagiti matatayo kadagiti naespirituan a banag. Ania a direksion ti aw-awatentayo iti panawentayo manipud iti Dios ken dagiti katulonganna? Kasano a maparang-aytayo ti “nasayaat a daga” tapno umawat iti direksionda? (bersikulo 23).
-
Mabalinmo nga awisen ti sumagmamano a miembro ti klase nga umay a saggaysa a nakasagana a mangisuro iti maysa a benneg manipud iti mensahe ni Presidente Dallin H. Oaks “The Parable of the Sower” (Liahona, Mayo 2015, 32–35). Ania ti inayon ti mensahena iti pannakaawattayo iti pangngarig?
Makatulong dagiti pangngarig ni Jesus a mangipaawat kadatayo iti panagdur-as, pagtungpalan, ken pateg ti Simbaanna.
-
Kasano a matulongam dagiti miembro ti klase a maawatanda dagiti kinapudno maipapan iti Simbaan a naisuro kadagiti pangngarig ni Jesus iti Mateo 13? Mabalinmo nga ilista ti sumagmamano kadagiti pangngarig iti pisarra (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ken Teachings of Presidents of the Church: Joseph Smith, [2007], 293–303). Mabalin nga adalen dagiti miembro ti klase ti maysa wenno ad-adu pay a pangngarig a saggaysa wenno iti babassit a grupo ket ibinglay no ania ti masursuroda maipapan iti panagdur-as ken pagtungpalan ti Simbaan ni Cristo.
Maipada ti pagarian ti langit iti maysa nga iket ti dumakdaklis.
-
Ania ti masursurotayo maipapan ti pateg ti pannakaibilang iti Simbaan manipud kadagiti pangngarig maipapan ti gameng a nailemmeng iti talon ken ti napateg unay a perlas, a masarakan iti Mateo 13:44–46? Mabalin a ti sumagmamano a miembro ti klasem (wenno tattao nga am-ammoda) ti nakaaramiden kadagiti sakripisio—dakkel wenno bassit— tapno agbalin a miembro ti Simbaan. Mangawis kadagiti miembro ti klase a mangibinglay kadagiti sakripisio nga inaramid wenno nakitadan nga inaramid dagiti dadduma tapno maibilangda iti Simbaan. Ania dagiti bendision a simmangbay kas bungana? Mangawis kadagiti miembro ti klase nga agutob maipanggep iti no ania ti naiparikna kadakuada a sakripisio para iti Mangisalakan.
Iti gibus ti lubong, ummongento ti Apo dagiti nalinteg ket dadaelenna dagiti nadangkes.
-
Kasano a matulongam ti klasem a makagun-od kadagiti adalen manipud iti pangngarig ti trigo ken ruruot a makatulongto kadakuada nga agtalinaed a napudno a Sasanto iti Ud-udina nga Aldaw? Rugian babaen ti panangawis iti maysa a miembro ti klase tapno manggupgop iti pangngarig ken ti pakaibuksilanna. Ania dagiti sumagmamano nga adalen iti daytoy a pangngarig iti aldawtayo? Apay a napateg a maammuan nga ipalubos ti Apo dagiti Santona nga “aggigiddan a dumakkel” (Mateo 13:30) kadagiti nadangkes agingga iti panawen ti panagapit? Kasano a mapagtalinaedtayo ti pammatitayo ken ni Jesucristo no kinadangkes ti amin iti aglawlawtayo? Kasano a makatulong ni Cristo kadatayo? Doktrina ken Katulagan 86:1–7 ken ti palawag ni Elder L. Tom Perry iti “Dagiti Nainayon a Resources” ket makaited iti nayon pay a nalawag a pannakaammo ken pannakaawat (insight) para iti maud-udi a pannakayaplikar iti daytoy a pangngarig.
Dagiti Nainayon a Resources
Nasken a taraonantayo ti nasayaat.
Insuro ni Elder L. Tom Perry: “Nasarakan dayta nabayagen a kabusor ti amin a sangkataw-an ti kas kaadu a pamuspusan a mabalinna a mapanunot bayat ti panangiwarasna kadagiti ruot iti adayo ken sapasap. Nasarakanna dagiti wagas a pakaisaknapan dagitoy uray pay iti kinasagrado ti bukodtayo a pagtaengan. Nalaus ti pannakaisaknap dagiti nadangkes ken nailubongan a wagas a kasla awanen ti pudno a wagas a mangikkat kadagitoy. Umay dagitoy babaen ti kable ken babaen dagiti mismo nga alikamen a naipaugalin kadatayo a mangadal ken mangparagsak kadatayo. Naggiddan a dimmakkel dagiti trigo ken ruot. Ti agay-aywan a mangimatmaton iti talon, nga iti amin a kabaelanna, taraonanna dayta nasayaat ken pagbalinenna daytoy a nakapigpigsa ken nakapimpintas tapno awanton ti pakaay-aywan dagiti ruot iti mata wenno iti lapayag” (“Finding Lasting Peace and Building Eternal Families,” Liahona, Nob. 2014, 44).
Panangpadur-as iti Panangisurotayo
Ipamaysam ti panangisurom iti doktrina. Siguraduem a maipamaysa dagiti panaglilinnawag iti klasem iti doktrina nga adda pakainaiganna iti pundasion iti nasantuan a kasuratan. Mabalinmo nga aramiden daytoy babaen ti panangidawat kadagiti estudiante a basaenda ti nasantuan a kasuratan a nasapsapa, ken idawat kadagiti miembro ti klase a mangibinglay kadagiti pammaneknekda maipapan iti pudno a doktrina. (Kitaen iti Panangisuro iti Wagas ti Mangisalakan, 20–21.)