“Marso 6–12. Mateo 9–10; Marcos 5; Lucas 9: ‘Dagitoy Sangapulo-ket-dua nga Imbaon ni Jesus’” Umaykayo, Sumurot Kaniak—Para iti Sunday School: Baro a Tulag 2023 (2022)
“Marso 6–12. Mateo 9–10; Marcos 5; Lucas 9,” Umaykayo, Sumurot Kaniak—Para iti Sunday School: 2023
Marso 6–12
Mateo 9–10; Marcos 5; Lucas 9
“Dagitoy Sangapulo-ket-dua nga Imbaon ni Jesus”
Bayat ti panangbasam iti Mateo 9–10; Marcos 5; ken Lucas 9, gun-odem ti pammaregta ti Espirtu Santo maipapan kadagiti kasapulan dagiti sursuruam. Ti panangisurat kadagiti naespirtuan nga impresionmo ket makatulong iti panangisaganam para iti padas a mangbendisionto kenka ken dagiti miembro ti klasem.
Yawis ti Panagbibinninglay
Mabalinmo nga awisen dagiti miembro ti klase a mangisurat iti papel iti maysa a kinapudno a nasursuroda manipud iti nasantuan a kasuratan itoy a lawas, karaman dagiti bersikulo iti nasantuan a kasuratan. Kalpasan a mapagtitiponmo dagiti papel, mangpili iti sumagmamano a maibasa iti klase. Kasano a maaramattayo dagitoy a kinapudno iti biagtayo?
Isuro ti Doktrina
Adda bileg ni Cristo a mangagas kadatayo iti bagi ken espiritu.
-
Kaaduan kadagiti namilagruan a panagagas ti Mangisalakan ket makaisuro pay kadatayo kadagiti naespirtuan a kinapudno. Tapno matulongam dagiti miembro ti klase a maawatan daytoy, mabalinmo a bingayen ti klase iti uppat a grupo ken mangdutok iti tunggal grupo iti maysa kadagiti sumaganad a binatog: Mateo 9:2–8; Mateo 9:18–19, 23–26; Mateo 9:20–22; ken Mateo 9:27–31. Idawat iti tunggal grupo a mangadal iti nailadawan a milagro a nadakamat iti binatogda ket kalpasanna gupgopenda daytoy para iti klase. Ania dagiti naespirituan a kinapudno a masursurotayo manipud kadagitoy a milagro?
Agtalek iti Apo, ni Liz Lemon Swindle
Ikkan ti Apo dagiti katulonganna iti bileg a mangaramid iti trabahona.
-
Ti panangawag ti Mangisalakan kadagiti Apostolna ket makatulong kadatayo kadagiti bukodtayo a pagrebbengan. Mabalin nga addaan dagiti miembro ti klase kadagiti nalawag a pannakaammo ken pannakaawat [insights] iti daytoy a topiko babaen ti bukodda a panagadal; kas pagarigan, adda maysa nga aktibidad iti daytoy a topiko iti Umaykayo, Sumurot Kaniak—Para kadagiti Indibidual ken Pamilia. Awisem ida a mangibinglay no ania ti nasursuroda wenno agtrabaho iti babassit a grupo a mangileppas iti aktibidad iti klase. Awisem dagiti miembro ti klase a mangibinglay kadagiti padasda idi nariknada ti bileg ti Mangisalakan bayat ti panangipatungpalda kadagiti takemda.
-
Kasano a makatulong kadagiti miembro ti klase ti panagadal iti panangawag [commission] ni Cristo kadagiti Apostolna iti Mateo 10 tapno maawatanda ti akem dagiti kabaruanan a propeta ken apostol? Mabalin a makatulong nga idilig ti panagawag [commission] ti Mangisalakan iti Sangapulo-ket-dua iti panagawag [commission] a naited iti umuna a Korum dagiti Sangapulo-ket-dua nga Apostol iti daytoy a dispensasion, a masarakan iti “Dagiti Nainayon a Resources.” Nalabit a mabalin nga ibinglay dagiti miembro ti klase no kasano a naimpluensiaanda babaen iti panagministro dagiti sibibiag nga Apostol. Ibinglaymo ti pammaneknekmo maipapan iti nadiosan a takem [calling] dagiti sibibiag a propeta ken apostol, ken mangawis kadagiti miembro ti klase nga ibinglayda ti pammaneknekda.
No addatayo iti serbisio ti Apo, paregtaennatayonto no ania dagiti isaotayo.
-
No dadduma agnerbios dagiti tao no mangisursuro wenno makisarsaritada kadagiti dadduma maipapan iti ebanghelio. Ngem inkari ti Apo kadagiti disipulo a tulonganna ida a mangammo no ania ti isaoda. Ania ti nasken nga aramidentayo tapno umawat iti inkari a tulong ti Apo para iti bagbagitayo? Mangawis kadagiti miembro ti klase a mangbasa iti Mateo 10:19–20; Doktrina ken Katulagan 84:85; ken Doktrina ken Katulagan 100:5–8 a mangsapsapul kadagiti sungbat iti daytoy a saludsod. Kaano a tinulongannaka ti Espiritu Santo a nangammo no ania ti isaom? Mabalinmo nga ibinglay dagiti padasmo ket awisem dagiti miembro ti klase a mangibinglay iti bukodda.
Dagiti Nainayon a Resources
Maysa a komision kadagiti Apostol iti ud-udina nga aldaw.
Idi naawagan ti sumagmamano kadagiti umuna a miembro ti Korum dagiti Sangapulo-ket-dua nga Apostol iti daytoy a dispensasion, inikkan ida ni Oliver Cowdery iti komision a maipada iti maysa nga inted ni Jesucristo iti Mateo 10. Kinunana:
“‘Nasken a paksiatenyo ti amin a dakes a panangipapan ti amin a pagilian. … Ngarud, ballaagankayo a mangpatanor iti nalaus a kinapakumbaba, ta ammok ti kinapasindayag iti puso ti tao. Agannadkayo, amangan ta itag-aynakayo dagiti mangpatpatiray-ok ti lubong. Agannadkayo amangan ta maguyugoy ti ayatyo kadagiti nailubongan a banag. Unaenyo koma ti panagministroyo. … [Daytoy] ti kasapulan tapno maawatyo ti pammaneknek manipud iti Langit para iti bagbagiyo, tapno makaibinglaykayo iti pammaneknek iti kinapudno. …
“‘… Nasken nga iburayyo daytoy a mensahe kadagitay mangibilang iti bagbagida a masirib. Ket mabalin a dagiti kasta ti mangidadanes kadakayo; mabalin a gandatenda ti manggudas iti biagyo. Kanayon a ginandat ti kabusor ti biag dagiti katulongan ti Dios. Ngarud, nasken nga agsaganakayo iti amin a panawen a mangaramid iti maysa a sakripisio ti biagyo, no idawat ti Dios a kasapulan kadakuada iti pannakaital-o ken pannakabangon ti panggepna. …
“Kalpasanna saggaysa nga iniggamanna ida ket kinunana, ‘Naan-anay kadi ti panggep ti pusom a makiraman iti daytoy a panagministro, a mangipakdaar iti ebanghelio iti amin a kinapasnek kadagitoy kakabsatyo, a maibatay iti pudno a kaipapanan ken panggep ti pagrebbengan nga inawatmo?’ Immanamong ti tunggal maysa” (iti “Minutes and Blessings, 21 Pebrero 1835,” Minute Book 1, 159–161, 164, josephsmithpapers.org; napabaro ti ispeling ken puntuasion).
Panangpadur-as iti Panangisurotayo
Paneknekam dagiti bendision. No mangidiayaka kadagiti awis nga agtignay, paneknekam kadagiti sursuruam nga umawatdanto kadagiti bendision nga inkari ti Dios no agtignayda nga addaan iti pammati kadagiti pannursurona. Saan koma a dagiti bendision ti kangrunaan a motibasion iti panagtungpal, ngem tarigagayan ti Nailangitan nga Ama ti mangbendision iti amin nga annakna. (Kitaen iti Panangisuro iti Wagas ti Mangisalakan, 35.)