Pakalaglagipan Kaniak, ni Walter Rane

Mayo 29–Hunio 4

Mateo 26; Marcos 14; Juan 13

“Kas Panglagip”

Basaem ti Mateo 26; Marcos 14; ken Juan 13, ket utobem dagiti kapanunotan ken impresion a sumangbay iti panunotmo. Ania dagiti mensahe a mangbendision kadagiti miembro ti klasem?

Yawis ti Panagbibinninglay

Awisem dagiti miembro ti klase nga ibinglayda ti maysa a banag a nasursuroda itoy a lawas a nakatulong kadakuada a mangsapul iti ad-adu pay a kaipapanan iti sakramento. Ania ti inaramidda ken kasano a nakaapekto daytoy iti padasda iti pannakiranud iti sakramento?

Isuro ti Doktrina

Mateo 26:20–22

Nasken nga amirisentayo ti bukodtayo a biag tapno maikeddeng no kasano a mayaplikar kadatayo dagiti balikas ti Apo.

• Mangngegtayo ti adu nga adalen iti ebanghelio iti biagtayo, ngem no dadduma makasulisog nga ipagaruptayo a mayaplikar ti kaaduan kadagita nga adalen iti dadduma a tao. Ti panaglilinnawag maipapan iti Mateo 26:20–22 ket makatulong kadatayo a mangparmek iti daytoy nga ayo (tendency). Ania dagiti adalen a masursurotayo manipud iti no kasano nga inyaplikar dagiti disipulo dagiti balikas ti Mangisalakan iti bagbagida? No adda man kadagiti miembro ti klase ti nakabasa iti nagibasaran ni Presidente Dieter F. Uchtdorf iti daytoy a pakaammuan iti mensahena a “Lord, Is It I?,” mabalinda nga ibinglay dagiti nalawag a pannakaammo ken pannakaawat a nagun-odda (Liahona, Nob. 2014, 56–59).

Mateo 26:26–29

Ti sakramento ti maysa a gundaway a pananglagip iti Mangisalakan.

• Kasano nga ipalawag dagiti miembro ti klase ti sagrado nga ordinansa ti sakramento iti maysa a tao a saanna nga ammo daytoy? Nalabit a mangaramidka iti listaan dagiti mabalin a saludsoden ti maysa a tao maipapan iti sakramento, kas iti “Apay nga inted ti Apo ti sakramento kadatayo? Apay a ti tinapay ken danum ti nabileg a simbolo ni Jesucristo? Ania ti ikaritayo no makiranudtayo iti sakramento? Ania dagiti kari a maawattayo?” Mabalin a mangsapul dagiti miembro ti klase kadagiti sungbat iti sumaganad a resources: Mateo 26:26–29; Doktrina ken Katulagan 20:75–79; ken iti Gospel Topics, “Sacrament” (topics.ChurchofJesusChrist.org). Mabalinmo pay nga ibinglay dagiti nalawag a pannakaammo ken pannakaawat manipud ken ni Elder D. Todd Christofferson iti “Dagiti Nainayon a Resources.”

  

  Tulongannatayo ti sakramento a manglagip ken ni Jesucristo.

• Nalabit a mangted ti pagimbagan kadagiti miembro ti klase manipud iti panangdengngegda kadagiti kapanunotan ti tunggal maysa maipapan iti no kasano ti manglaglagip iti Mangisalakan kabayatan ti sakramento ken iti unos ti makalawas (kitaen iti Lucas 22:19–20; Doktrina ken Katulagan 6:36–37). Nalabit a mabalinmo nga awisen ida a mangibinglay no ania ti makatulong kadakuada ken dagiti pamiliada a manglaglagip iti Mangisalakan ken mangtungpal kadagiti katulaganda. Mabalinda pay nga iburay no ania ti aramidenda tapno agbalin a sagrado a padas ti sakramento.

Juan 13:1–17

Ti Mangisalakan ti pagwadantayo iti napakumbaba a panagserbi iti dadduma.

• Tapno matulongam dagiti miembro ti klase a mangutob iti kinapateg ti panangbuggo ni Jesus iti saksaka dagiti disipulona, mabalinmo nga awisen ti maysa a miembro ti klase nga agakem iti papel ni Pedro ken makiuman dagiti dadduma pay iti klase. Mabalin a sukisoken dagiti miembro ti klase ti Juan 13:1–17 ken panunotenda dagiti napnuan kaipapanan a saludsod a damagenda ken ni Pedro tapno maammuanda maipapan iti padasna. Ania ti masursurotayo manipud iti daytoy a pakasaritaan a mabalin a mangapekto no kasano nga agserbitayo iti dadduma?

Juan 13:34–35

Ti panagayattayo iti dadduma ket maysa a pagilasinan a pudnotayo a disipulo ni Jesucristo.

• Kasano a maparegtam dagiti miembro ti klase nga agbalin nga ad-adda pay a managayat? Nalabit a mabalinmo a saludsoden kadakuada no ania dagiti kababalin a madlawda no adda maam-ammoda a maysa a tao a pasurot ni Cristo. Mabalinmo nga awisen ida a mangsukisok iti Juan 13:34–35 tapno masursuruan no kasano ti mangilasin kadagiti pudno a disipulo ti Mangisalakan. Ania ti maaramidtayo tapno mapagbalintayo a ti ayat ti nalawag a kababalin ti kinadisipulotayo? Nalabit a mabalinmo nga ilawlawag no kasano a ti kinamanagayat iti dadduma ket maysa a wagas ti panangipaneknek maipapan ken ni Jesucristo. Kasano a maaramidtayo daytoy iti pamiliatayo, iti social media, ken iti dadduma pay a gundaway?

• Kas maysa a klase, nasursuroyo ti adu maipapan iti biag ti Mangisalakan iti daytoy a tawen, a pakairamanan ti adu a pagarigan ti no kasano nga impakitana ti ayatna para kadagiti dadduma. Maysa a wagas tapno matulongan dagiti miembro ti klase nga utobenda ti bilin iti Juan 13:34 ket mabalin nga isurat ti Kas iti Panagayatko Kadakayo iti pisarra ken kiddawem kadagiti miembro ti klase a mangilista kadagiti pagarigan a malagipda manipud iti Baro a Tulag a magiladawan iti ayat ni Jesus. Kalpasanna mabalinmo nga isurat ti Agiinnayatkayo iti pisarra ket kiddawem kadagiti miembro ti klase a mangilista kadagiti wagas a pakasurotantayo iti pagwadanna iti ayat. Mabalin a makasapul dagiti miembro ti klase kadagiti kapanunotan iti maysa kadagiti video a nailista iti “Dagiti Nainayon a Resources.”

Dagiti Nainayon a Resources

“Ibiagyo dagiti kalidad ken kababalin ni Cristo.”

Insuro ni Elder D. Todd Christofferson, “Ti figurativo a pannangan iti bagi ti [Mangisalakan] ken pananginum iti darana ket panangibiag kadagiti kalidad ken kababalin ni Cristo, panangtallikud iti natural a tao ken panagbalin a Santo ‘babaen ti panangsubbot ni Cristo nga Apo’ [Mosiah 3:19]. Kabayatan ti pannakiranudtayo iti sakramento ti tinapay ken danum a linawas, ikalikagumtayo a nasayaat a nasken nga ibiagtayo ti kababalin ken pagtuladan ti awan mulitna a biagna iti biagtayo” (“The Living Bread Which Came Down from Heaven,” Liahona, Nob. 2017, 37).

Dagiti video maipapan iti ayat iti ChurchofJesusChrist.org.

• “Love One Another”

• “Families Sacrifice, Give, and Love”

• “Preparation of Thomas S. Monson: He Learned Compassion in His Youth”

Panangpadur-as iti Panangisurotayo

Matmatam dagiti mata ti Dios. Ikarigatam ti kumita kadagiti miembro ti klasem a kas iti panangkita ti Dios kadakuada, ket ipakitanto kenka ti Espiritu dagiti nadiosan a pateg ken potensialda. No aramidem daytoy, matarabaykanto kadagiti panagkagumaam a makatulong kadakuada (kitaen iti Panangisuro iti Wagas ti Mangisalakan, 6).