Ti Maudi a Pangrabii, ni William Henry Margetson

Hunio 5–11

Juan 14–17

“Agtultuloykayo iti Ayatko”

Bayat ti sikakararag a panangadalmo iti Juan 13–17, utobem no kasano ti kasayaatan a panangipakitam iti ayat kadagiti sursuruam. Ti Espiritu Santo ti mangisangbayto kadagiti kapanunotan iti panunotmo bayat ti panagadalmo kadagiti nasantuan a kasuratan, Umaykayo, Sumurot Kaniak—Para kadagiti Indibidual ken Pamilia, ken daytoy a balabala.

Yawis ti Panagbibinninglay

Isuratmo dagiti numero 14 agingga iti 17 iti pisarra, a mangibagi kadagiti kapitulo iti Juan a basaen dagiti miembro ti klase iti daytoy a lawas. Awisem ti sumagmamano a miembro ti klase a mangisurat, iti abay ti tunggal numero ti kapitulo, iti maysa a bersikulo a naawatanda a nasaysayaat ta insuro ida ti Espiritu Santo wenno no kayatda a paglilinnawagan kas maysa a klase.

Isuro ti Doktrina

Juan 14:16–27; 15:26; 16:7–15

Ti Espiritu Santo ti mangtulong kadatayo a mangipatungpal kadagiti panggeptayo kas disipulo ni Jesucristo.

• Tapno matulongan dagiti miembro ti klase a makasursuro maipapan kadagiti agduduma nga akem ti Espiritu Santo, ibilangmo ti panangawis kadakuada a mangbasa iti maysa wenno ad-adu pay kadagiti sumaganad a binatog: Juan 14:16–27; 15:26; ken 16:7–15. Mabalinda a mangisurat iti pisarra no ania ti masursuroda maipapan iti Espiritu Santo manipud kadagitoy a binatog. Mabalinda pay ti mangbirok kadagiti nalawag a pannakaammo ken pannakaawat maipapan iti Espiritu Santo kadagiti nasantuan a kasuratan ken mensahe a nakalista iti “Dagiti Nainayon a Resources.” Kasano a naipatungpal ti Espiritu Santo dagitoy nga akem iti biagtayo? Mabalin a mangpanunotka kadagiti banag wenno tulong a pangisuro (visual aids) nga itugotmo iti klase tapno matulongam dagiti miembro ti klase a mangawat kadagiti sumagmamano kadagitoy nga akem.

• Ibilangmo ti panangawis iti sumagmamano a miembro ti klase a nasapsapa nga adalenda ti maysa kadagiti mensahe iti sapasap a komperensia a naisingasing iti “Dagiti Nainayon a Resources” (wenno sabali pay a mensahe ti komperensia nga ammoda) maipapan iti Espiritu Santo. Paibinglay biit kadakuada no ania ti nasursuroda iti klase. Ania ti mainayon dagitoy a mensahe iti no ania ti nasursurotayo maipapan iti Espiritu Santo manipud iti Juan 14–16?

Ti Maudi a Pangrabii, ni Clark Kelley Price

Juan 15:1–12

Bayat ti panagtalinaedtayo ken ni Cristo, mangisangbaytayonto iti nasayaat a bunga ket maaddaan iti rag-o.

• Ibilangmo ti panangitugot iti maysa a bassit a mula (wenno maysa a ladawanna daytoy) iti klase tapno mausar daytoy a pangtulong kadagiti miembro ti klase a mangiladawan iti panunotda iti pannursuro ti Mangisalakan maipapan iti ubas ken sangsanga. Kalpasan ti panangbasa iti Juan 15:1–12 kas maysa a klase, mabalinmo nga ilawlawag no ania ti kaipapanan ti “agtalinaed ken ni [Cristo]” (Juan 15:4). Mabalin nga ibinglay dagiti sumagmamano a miembro ti klase no kasano a naammuanda ti Juan 15:5 a pudno. (Kitaen met ti palawag manipud ken ni Elder Jeffrey R. Holland iti “Dagiti Nainayon a Resources.”)

Juan 17

Ti Nailangitan nga Ama ken ni Jesucristo ket naan-anay nga agkaykaysa.

• Nalabit a saanmo a maisuro ti amin a napapateg a kinapudno a masarakan iti Juan 17 iti maysa a panaglilinnawag iti klase, ngem daytoy ti maysa a wagas a makatulong iti klase nga agsukisok iti sumagmamano kadakuada. Ilistam iti pisarra dagiti konsepto manipud iti Juan 17, kas kadagitoy.

  • Ti pakainaigantayo ken ni Jesucristo

  • Ti pakainaigan ni Jesucristo iti Amana

  • Ti pakainaigantayo iti dadduma pay iti lubong

  • Ti pakainaigantayo iti tunggal maysa a kas disipulona

  Awisen ti tunggal a miembro ti klase a pumili iti maysa kadagitoy a konsepto ken basaen ti Juan 17, a mangsukisok kadagiti bersikulo a mainaig iti daytoy. Idawat kadagiti sumagmamano a miembro ti klase nga ibinglayda no ania ti masursuroda.

  Kasano a maapektuan ti pakainaigantayo iti Dios iti pakainaigantayo iti tunggal maysa? Kasano a maapektuan dagiti pakainaigantayo iti tunggal maysa ti pakainaigantayo iti Dios?

Dagiti Nainayon a Resources 

Ti Espiritu Santo.

• Dagiti Aramid 2:37–38; Taga Galacia 5:22–23; 1 Nephi 10:17–19; 2 Nephi 32:3–5; Mosiah 3:19; 3 Nephi 27: 20; Moroni 8:26; 10:4–5; Doktrina ken Katulagan 8:2–3; 42:17

• Henry B. Eyring, “His Spirit to Be with You,” Liahona, Mayo 2018, 86–89

• David A. Bednar, “Receive the Holy Ghost,” Liahona, Nob. 2010, 94–97

• Michelle D. Craig, “Spiritual Capacity,” Liahona, Nob. 2019, 19–21

Panagtalinaed ken ni Cristo.

Makita a ti balikas nga agtalinaed ket addaan kadagiti kaipapanan ti kinamanayon ken panagkumit, insuro ni Elder Jeffrey R. Holland:

“Ngarud ti kayat a sawen daytoy a [balikas] ket ‘agtalinaed—ngem agtalinaed iti agnanayon.’ … Umaykayo, ngem umaykayo nga agtalinaed. Umaykayo nga addaan iti natibker a pammati ken kinaandur. …

“Kinuna ni Jesus, ‘No awanak awan ti mabalinyo nga aramiden’ [Juan 15:5]. Paneknekak a dayta ti kinapudno ti Dios. Ni Cristo ti amin a banag kadatayo ken datayo ti ‘agtalinaed’ Kenkuana a simamanayon, saan a sumuko, ngem sititibker, iti agnanayon. Tapno agbukar ti bunga ti ebanghelio ken mangbendision iti biagtayo, nasken a sititibker a maireppengtayo Kenkuana, ti Mangisalakan kadatayo amin, ken iti Simbaan, nga agikut iti nasantuan a naganna. Isu ti ubas a pudno a pagtaudan ti pigsa ken ti kakaisuna a pagtaudan ti biag nga agnanayon. Kenkuana saantayo laeng nga agibtur ngem agtalinaed pay ken agballigi iti daytoy nasantuan a panggep a dinto kaano man mangpaay kadatayo” (“Abide in Me,” Liahona, Mayo 2004, 32).

Panangpadur-as iti Panangisurotayo

Awisen ti Espiritu. “Makapagbalintayo a ramit kadagiti ima ti Dios tapno matulongan dagiti annakna a makasursuro babaen ti Espiritu. Tapno maaramid daytoy, awisentayo ti impluensia ti Espiritu iti biagtayo ken allukoyentayo dagiti sursuruantayo a mangaramid met iti kastoy. … Ti sagrado a musika, dagiti nasantuan a kasuratan, dagiti balikas dagiti propeta iti ud-udina nga aldaw, dagiti panangipeksa iti ayat ken pammaneknek, ken dagiti kanito ti naulimek a panagutob ket makaawis amin iti kaadda ti Espiritu” (Panangisuro iti Wagas ti Mangisalakan, 10).