Kakaywan iti Getsemani, ni Derek Hegsted

Hunio 12–18

Lucas 22; Juan 18

“Saan a ti Pagayatak, No Di ti Pagayatam, ti Maaramid”

Ibilang no kasano ti panangawismo iti Espiritu iti klasem bayat ti panangilawlawagmo kadagiti sagrado a pasamak kadagitoy a kapitulo. Nainkararagan a mangsapul kadagiti wagas tapno matulongam dagiti miembro ti klase a mangpatibker ti panagayatda iti Mangisalakan ken ti pammatida Kenkuana.

Yawis ti Panagbibinninglay

Awisem dagiti sumagmamano a miembro ti klase a mangiburay no ania ti nariknada bayat ti panagbasada ita a lawas ken no ania dagiti bersikulo a nangtulong kadakuada tapno mariknada ti kastoy.

Isuro ti Doktrina

Lucas 22:39–46

Agbalintayo nga ad-adda a kas ken ni Cristo no pilientayo nga itulok ti pagayatantayo iti pagayatan ti Ama.

• Ti pagwadan ti Mangisalakan iti panagtulok iti pagayatan ti Ama ket makatulong kadagiti miembro ti klase no kasapulanda ti agaramid iti isu met laeng. Ti panangirugi iti panaglilinnawag, mabalinmo nga awisen dagiti miembro ti klase a mangibinglay kadagiti padasda idi intulokda ti bagbagida nga agaramid iti maysa a banag nga ammoda a kayat ti Dios nga aramidenda. Idawatmo kadakuada a mangiburay iti no kasano a naammuanda no ania ti kayat ti Dios nga aramidenda ken no kasano a nabendisionanda gapu iti panagtulokda iti pagayatanna. Awisem ti klase a mangbasa iti Lucas 22:39–46 ken pagsasaritaan no apay a natallugod nga intulok ti Mangisalakan ti pagayatanna iti pagayatan ti Amana. Kasano a masurottayo ti pagwadan ti Mangisalakan?

• Malaksid iti kinamanagpabus-oy ti Mangisalakan iti Lucas 22:42, ania pay dagiti pagarigan a makitatayo iti kinamanagpabus-oyna iti Lucas 22 ken Juan 18? Kasano a nagpasakop ti Mangisalakan iti pagayatan ti Ama iti unos ti panangbiagna? Ania ti maaramidtayo tapno agbalintayo nga ad-adda pay a kas Kenkuana? Ti palawag ni Elder Neal A. Maxwell iti “Dagiti Nainayon a Resources” ket mabalin a mangparegta kadagiti miembro ti klase a mangibilang no kasano a makapagtulokda iti pagayatan ti Apo.

Lucas 22:39–46

Inaramid ni Jesucristo ti awan patinggana a Pannubbot para kadatayo.

• Iladawan tiLucas 22:39–46 no ania ti napasamak iti Getsemani. Tapno matulongan dagiti miembro ti klase a maawatan ti personal a kaipapanan daytoy a sagrado a pasamak, mabalinmo nga isurat iti pisarra dagiti saludsod kas iti Ania ti napasamak iti Getsemani? ken Apay a napateg daytoy kaniak? Mabalin a sapulen dagiti miembro ti klase dagiti sungbat iti Lucas 22:39–46; Alma 7:11–13; Doktrina ken Katulagan 19:16–19; ken ti video “The Savior Suffers in Gethsemane” (ChurchofJesusChrist.org). Mabalinda pay a makita dagiti sungbat iti mensahe ni Presidente Tad R. Callister iti “The Atonement of Jesus Christ” (Liahona,, Mayo 2019, 85–87).

• Iti Libro ni Mormon, awagan ni Jacob ti Pannubbot ni Jesucristo iti “agnanayon a pannakasubbot” (2 Nephi 9:7 Tapno matulongan a maawatan dagiti miembro ti klase no ania ti kaipapanan daytoy, mabalinmo nga ibinglay dagiti pannursuro ni Presidente Russell M. Nelson iti “Additional Resources” ket idawat kadagiti miembro ti klase a mangilista kadagiti wagas a ti impluensia ti sakripisio ti Mangisalakan ket mabalin a maibilang nga awan patinggana. Mabalin pay a basaenda dagiti sumaganad a nasantuan a kasuratan ket inayon kadagiti listaanda: Hebreo 10:10; Alma 34:10–14; Doktrina ken Katulagan 76:24; ken Moises 1:33. Kasano a maipakitatayo ti panagdayaw iti inaramid ti Mangisalakan para kadatayo?

Ti Panaglibak ni Pedro, ni Carl Heinrich Bloch

Lucas 22:54–62

Kabaelantayo iti agbalin a napudno ken Jesucristo iti likod dagiti pagbutngan ken kinakapuytayo.

• Tapno matulongan dagiti miembro ti klase a mangiladawan kadagiti pasamak iti Lucas 22:54–62, mabalinmo ti mangipakita iti ladawan, kas iti Panaglibak ni Pedro (ChurchofJesusChrist.org), wenno ti video “Jesus Is Tried by Caiaphas, Peter Denies Knowing Him” (ChurchofJesusChrist.org). Mabalin nga iburay dagiti miembro ti klase no ania ti naadalda manipud iti padas ni Pedro a nangparegget kadakuada nga agbalin a napudno ken ni Jesucristo.

Dagiti Nainayon a Resources 

Panangitulok iti pagayatantayo iti Ama.

Insuro ni Elder Neal A. Maxwell: “No itulokyo ti pagayatanyo iti Dios, it-itedyo Kenkuana ti kakaisuna a banag a mabalinyo a pudno a maited Kenkuana a talaga a bukbukodyo nga ited. Saankayo nga aguray iti nabayag unay a mangsarak iti altar wenno mangrugi a mangikabil iti sagut dagiti pagayatanyo iti daytoy a lugar!” (“Remember How Merciful the Lord Hath Been,” Liahona, Mayo 2004, 46).

Ti awan patinggana a Pannubbot.

Insuro ni Presidente Russell M. Nelson:

“Awan patinggana ti Pannubbot ni [Jesucristo]—awan ti paggibusanna. Daytoy pay ti awan patinggana no maipanggep iti dayta a maisalakan ti amin a sangkataw-an manipud iti awan-paggibusanna nga ipapatay. Awan patinggana daytoy iti baet ti nakaro a panagsagabana. Awan patinggana iti panawen, a namaggibus iti kannawidan a panangisakripisio iti ayup a naaramid agingga iti dayta a kanito. Awan patinggana iti kaatiddog—isu a maaramid iti namimpinsan para iti amin. Ken ti asi ti Pannubbot ket mangsakup saan laeng iti awan patinggana a bilang dagiti tao, no di ketdi pay iti awan patinggana a bilang dagiti lubong a pinarsuana. Awan patinggana iti labes ti ania man a timbangan ti rukod ti tao wenno mortal a pannakaawat.

“Ni Jesus laeng ti agmaymaysa a makaidiaya iti kasta nga awan inggana a pannubbot, gapu ta nayanak Isuna iti mortal nga ina ken imortal nga Ama. Gapu iti dayta naidumduma a saguday ti pannakayanak, awan patinggana a Nabiag ni Jesus” ((“The Atonement,” Ensign,, Nob. 1996,35).

Panangpadur-as iti Panangisurotayo

Agbalin a maysa a napakumbaba a ramit ti Espiritu. “Panggepmo kas maysa a mannursuro ti saan a mangidatag iti maysa a napintas a presentasion ngem ketdi tapno makatulong iti dadduma nga umawat iti impluensia ti Espiritu Santo, nga isu ti pudno a mannursuro” (Panangisuro iti Wagas ti Mangisalakan, 10).