rijerbal ro ilo juon jikin kallūb

Māe 8–14

Matu 19–20; Mark 10; Luk 18

“Ewi Men eo I Jan̄in Tōpare?”

Ilo am̧ m̧aanjabpopo n̄an katakin, jar ilo ļōmņak ekōjkan am̧ maron̄ jipan̄ ro uwaan kūlaaj eo kwaļo̧k ta eo raar ekkatak ak en̄jake ilo iien ekkatak eo aer make.

pija ej bōk jikin kwaļo̧k

Kajjitōk bwe ren Kwaļo̧k

Emaron̄ jipan̄ n̄an jet iien ekōnono kōn aolep en̄jake ko an ro uwaan kūlaaj eo kōn ekkatak gospel eo pedped ilo m̧weo. Ta en̄jake ko rem̧m̧an remaron̄ kwaļo̧k? Ta kabbōjrak ko ak kapan̄pan̄ ko rej jelm̧ai? Ta kapilōk eo er kajjojo remaron̄ leļo̧k n̄an doon?

pija eo ej bōk jikin katakin

Katakin Katak eo

Matu 19:3–9

M̧are eo kōtaan juon em̧m̧aan im juon kōrā elukkuun menin aikuj n̄an karōk indeeo an Anij.

• Eļapļo̧k jān m̧okta, laļ in ej kalimjōk m̧are eļap an oktak jān m̧ool eo indeeo. N̄an jipan̄ ro uwaan kūlaaj eo ekkatak kōn an Anij kalimjōk m̧are, kwomaron̄ kajjitōk ippāer n̄an riiti Matu 19:3–9 im laajrake ioon boot eo m̧ool ko rej loi ikkijien m̧are. Remaron̄ barāinwōt kōllaajrake m̧ool ko jet rej loi ilo eoon in jipan̄ kein: Jenesis 1:27–28; 1 Korint 11:11; Katak im Bujen Ko 42:22; 49:15–17; 131:1–4; 132:19; im Moses 3:18, 21–24. Ekōjkan an m̧ool kein bar kapenļo̧k ilo “Baam̧le Eo: Juon Naan in Kean̄ n̄an Laļ in”? (ChurchofJesusChrist.org

Matu 20:1–16

Aolep remaron̄ bōk kōjeraam̧m̧an eo an mour indeeo, jekdo̧o̧ņ ta n̄aat eo rej bōk gospel eo.

• Ta eo enaaj jipan̄ ro uwaan kūlaaj eo kōjerbal pedped in katak ko ilo būrabōļ eo an rijerbal ro ilo jikin kallūb eo? Kwomaron̄ kajjitōk ippān jejjo ro uwaan kūlaaj eo n̄an kōpoj juon ikkure eo ej pijaikļo̧k būrabōļ eo n̄an kwaļo̧k n̄an kūlaaj eo. Ālkin kwaļo̧ke, armej ro rej arromeļo̧k rijerbal ro remaron̄ kwaļo̧k ekōjkan aer kar en̄jake kōn kōļļā eo raar bōke im etke. Ta eo būrabōļ in ej elmakote kōn aelōn̄ in kiin̄ in lan̄? Ta kōļmenļo̧kjeņ ko jet jej būki kōn būrabōļ in jān ennaan eo an Elder Jeffrey R. Holland “Rijerbal ro ilo Jikin Kallib eo”? (Liaona,, Māe 2012, 31–33).

Matu 19:16–22; Mark 10:17–27

Rilo̧mo̧o̧r eo enaaj tōk kōj epaakeļo̧k E ilo ad kajjitōk An jipan̄.

• Ekōjkan am̧ maron̄ jipan̄ ro uwaan kūlaaj eo kile im kōjerbal pedped in katak ko ilo bwebwenato eo an em̧m̧aan rim̧wie eo? Juon jekjek emaron̄ in kajjitōk ippāer n̄an riiti Mark 10:17–27 im ļōmņak eļan̄n̄e renan̄in kar en̄jake āinwōt em̧m̧an rim̧wie eo. Ta eo ekar jipan̄ kōj ļoor kapilōk eo an Rilo̧mo̧o̧r eo men̄e n̄e kōm̧m̧an āindein ekar pen? Ro uwaan kūlaaj eo remaron̄ m̧ōņōņō in kwaļo̧k en̄jake ko me raar kajjitōk “Ewi men eo I jan̄in tōpare?” (Matu 19:20) im bōk juon im̧we ejake wōt n̄an eok n̄an kōkōm̧anm̧anļo̧k. N̄an jipan̄ ro uwaan kūlaaj eo me remaron̄ erom ebbweer jān kalimjōk wōt ta eo rejjan̄in tōpare, kwomaron̄ kwaļo̧k juon ennaan ilo “Kein Jipan̄ ko Jet.”

• Ro uwaan kūlaaj eo remaron̄ m̧ōj aer kar riiti juon ennaan an kweilo̧k eo eļap eiookļo̧k eoon kein āinwōt kar elmakoti ilo Itok, Ļoor Eō—N̄an Kajjojo Armej im Baam̧le ko. Kajjitōk ippāer n̄an kwaļo̧k kōļmenļo̧kjeņ ko raar būki.

em̧m̧aan eo ettā im Ripharise eo

Riukweļo̧k Ritōltōl Ewōj eo im Ripharise eo Emake Ba Ejim̧we ilo Tampeļ eo, jān Frank Adams

Luk 18:9–14

Jej aikuj lōke tūriam̧o kake eo an Anij, ejjab jim̧we eo ad make.

• Būrabōļ eo an Rilo̧mo̧o̧r eo kōn keidi jar eo an Ripharise eo ippān ritōltōl ewōj eo emaron̄ jipan̄ eok kalikkar m̧wil eo me Irooj ej kajjitōk ippān ro rej kappukōt E. N̄an jipan̄ ro uwaan kūlaaj eo kōjerbal būrabōļ in n̄an mour ko ad, kwomaron̄ kajjitōk ippāer n̄an bar je jar eo an Ripharise eo ilo juon wāween me ej kōjerbal meļeļe ko raan kein bōtaab ej kwaļo̧k ejja m̧wil ko wōt. Remaron̄ kōm̧m̧ane ejja āinwōt kōn jar eo an ritōltōl ewōj eo innām kwaļo̧k ta eo raar je. Ekōjkan an eoon 15–17 im 18–24 iookļo̧k ta eo Rilo̧mo̧o̧r eo ekar katakin ilo būrabōļ in? Kwomaron̄ barāinwōt kwaļo̧k ennaan in ikkijien eoon kein jān Elder Dale G. Renlund: “Ennaan in ealikar n̄an kōj: juon rijerawiwi eo ej ukweļo̧k ej epaakeļo̧k Anij jān eo ej kōwānōk e make eo ej liaakeļo̧k rijerawiwi ro” (“Ad Seperd Em̧m̧an,” Liaona, Māe 2017, 31).

pija ej bōk jikin kein jipan̄ ko

Kein Jipan̄ ko jet

Jej aikuj jab jum̧ae ak ebbweer.

Elder D. Todd Christofferson ekar katakin:

“Eļan̄n̄e jej m̧ool ilo ad kajjitōk, “Ewi men eo ijjan̄in tōpar e? [Anij] ejāmin likūt kōj n̄an anto̧o̧n, ak ilo iakwe Enaaj uwaak n̄an em̧m̧an eo ad im ad m̧ōņōņō. Im E enaaj letok n̄an kōj kōjatdikdik.

“Ej juon kijejeto eļap, im enaaj lukkuun kaam̧jak n̄e ilo ad kajjieon̄ pukot kwojarjar ippād make. Mool eo eaiboojoj ej jejjab make iaad. Ewōr ippād iakwe eo an Anij, tūriam̧o̧ eo an Kraist, kaenōm̧m̧an im tōl eo an Jetōb Kwojarjar, im jem̧jerā eo im rōjan̄ ko an Rikwojarjar ro ilo ānbwinnin Kraist. Jen jab jum̧ae ijo jej pād ie, ak barāinwōt jen jab ebbeer” (“Pilawā in Mour Eo Ekar Itok jān Lan̄,” Liaona, Nob. 2017, 39).

Kōkm̧anm̧anļo̧k Ad Katakin

Anij ej aikuji tōļan ko im maron̄ ko ami rejej uwaer. “Kwomaron̄ kōjeraam̧m̧an ajri ro nejin Anij kōn kōjerbal iakwe eo ewōr ippam̧ n̄an ro jet, menin letok ko Anij ekar liwaj n̄an eok, im en̄jake ko am̧ ilo mour. Ilo am̧ jerbal tiljek im kappukōt jipan̄ eo an Anij, E enaaj kōļapļo̧k eok, im kwonaaj eddōkļo̧k ilo maron̄ eo am̧ n̄an katakin gospel eo ilo wāween eo an Rilo̧mo̧o̧r” (Teaching in the Savior’s Way, 5).