em̧m̧aan eo ej atbakwoj ļeo nejin

Nejin Eo Ejerwan, jān Liz Lemon Swindle

Māe 1–7

Luk 12–17; Jon 11

“Kom̧win Lan̄lōn̄ Ippa; Bwe I ar Lo Sip eo Aō E kar Jako”

Jino m̧aanjabpopo eo am̧ kōn jar ilo ekkatak Luk 12–17 im Jon 11. Ta “sip eo ekar jako” ilo kūlaaj eo am̧ ej itok n̄an ļōmņak eo am̧? Kōjebal Itok, Ļoor Eō—N̄an Kajjojo Armej im Baam̧le ko im unin tōl in ilo am̧ pukōt tōl eo an Irooj kōn ewi wōt jekjek eo em̧m̧an tata n̄an tōpar aikuj ko an ro uwaan kūlaaj eo, men̄e rejjab itok n̄an kūlaaj.

pija ej bōk jikin kwaļo̧k

Kajjitōk bwe ren Kwaļo̧k

Mour kake ej juon m̧ōttan ekkatak aorōk, kōn menin kajjitōk ippān ro uwaan kūlaaj eo n̄an kwaļo̧k ekōjkan aer kāālet n̄an mour kōn juon men raar ekkatak jān jeje ko rekwojarjar wiik in.

pija eo ej bōk jikin katakin

Katakin Katak eo

Luk 14:15–24

Ejjeļo̧k jekpen ņae ebwe n̄an kowaan gospel eo.

• N̄an jipan̄ ro uwaan kūlaaj eo ekkatak būrabōļ eo kōn kōjota eo eļap, kwomaron̄ kajjitōk ippāer n̄an pijaikļo̧k juon bade me kwonaaj bōk eddo in. Kōm̧m̧an bwe ren kwaļo̧k un ko etke remaron̄ ak maron̄ jab etal n̄an e. Riiti Luk 14:15–24 ippān doon, im ekōnono kōn jekpen ņae ko armej ro ilo būrabōļ eo raar kōm̧m̧ani ke kar kajjitōk ippāer n̄an kwojkwoj eo me ekar bōk jikin kōjeraam̧m̧an ko an gospel eo. Ta jekpen ņae ko armej ro rej kōm̧m̧ani rainin n̄an likjab in bōk kūr ko an Rilo̧mo̧o̧r eo n̄an bōk kōjeraam̧m̧an ko an Jemedwōj Ilan̄? Bōlen ro uwaan kūlaaj eo remaron̄ kwaļo̧k kōjeraam̧m̧an ko raar būki ke raar kōm̧m̧ani kaarmejete ko remenin aikuj n̄an mour kōn jet pedped in katak ko an gospel eo.

Luk 15

Jemaron̄ pukōtļo̧k ro me rejako im lem̧ōņōņō ippān Jemed n̄e rej ro̧o̧ltok.

• Ekōjkan am̧ naan leļo̧k n̄an ro uwaan kūlaaj eo iien em̧m̧an n̄an kwaļo̧k ta eo raar ekkatak kōn būrabōļ ko jilu ilo Luk 15? Ļōmņak in kappeik kajjojo uwaan kūlaaj eo juon iaan būrabōļ ko n̄an etale. Remaron̄ kappukōt im kwaļo̧k uwaak ko n̄an kajjitōk ko āinwōt kein: Ta naan ko ilo būrabōļ eo ej kwaļo̧k ekōjkan an Jemedwōj Ilan̄ en̄jake kōn ro me rej jako? Ta eo būrabōļ kein rej elmakote kōn ekōjkan ad aikuj pukōt aolep ajri ro nejin Anij? Ro uwaan kūlaaj eo remaron̄ kwaļo̧k ekōjkan an Rilo̧mo̧o̧r eo kar lo er ke raar en̄jake aer kar jōbwābwe.

• Al “Dear to the Heart of the Shepherd” (Hymns, nō. 221) ippān doon emaron̄ in juon kakobaba eļap meļeļe in n̄an katak ko an būrabōļ kein.

• Ilo ami etale būrabōļ eo kōn nejin eo ejerwan ippān doon, ro uwaan kūlaaj eo remaron̄ in jeraam̧m̧an jān kalimjōk naan ko, jerbal ko, im tōmak ko an kajjojo armej ro ilo būrabōļ eo. Ta eo jej ekkatak jān kajjojo armej? Bōlen ro uwaan kūlaaj eo remaron̄ je juon eo ej ālij n̄an būrabōļ eo kōn kilen ļaddik eo erūtto ņae ļaddik eo jatin eoktak. Ta kapilōk eo an eo jemen ilo būrabōļ eo ej katakin kōj kōn ekōjkan ad aikuj en̄jake kōn ro me raar jōbwābwe im ro me rej bar ro̧o̧ltok n̄an gospel eo? (Lale barāinwōt ennaan eo an Elder Jeffrey R. Holland ilo “Kein Jipan̄ ko Jet.”) Ak kwomaron̄ kajjitōk ippān ro uwaan kūlaaj eo n̄an pijaikļok bwe rej eo jemen ilo būrabōļ eo. Ta kapilōk ko jet renaaj kar liļo̧k n̄an ļeo nejin erūtto n̄an jipan̄ e lem̧ōņōņō ilo eddōkļo̧k eo ak jeraam̧m̧an eo an ro jet?

Luk 17:11–19

Kam̧m̧oolol kōn kōjeraam̧m̧an ko aō enaaj kepaakļo̧k eō n̄an Anij.

• Kajjitōk ippān ro uwaan kūlaaj eo n̄an kwaļo̧k ta eo raar ekkatak kōn kam̧m̧oolol jān ekkatak eo aer kōn Luk 17:11–19 im pija in alooj “President Russell M. Nelson on the Healing Power of Gratitude” (ChurchofJesusChrist.org). Ekōjkan an kar rileba eo ekar kam̧m̧oolol jeraam̧m̧an kōn kwaļo̧k an kam̧m̧oolol? Ekōjkan ad jeraam̧m̧an n̄e jej kwaļo̧k kam̧m̧oolol? Ro uwaan kūlaaj eo remaron̄ elmakote wāween ko jemaron̄ kwaļo̧k ad kam̧m̧oolol n̄an Anij im ro jet.

Jon 11:1–46

Jisōs Kraist ej Jerkakpe eo im Mour eo.

• Juon wāween n̄an etale Jon 11:1–46 ej n̄an kajjitōk ippān ro uwaan kūlaaj eo n̄an juon illo̧k juon riiti eoon ko im kajjitōk ippāer im ekōnono kajjojo iien rej lo kein kam̧ool ko kōn tōmak ilo Jisōs Kraist. Kwomaron̄ barāinwōt kajjitōk ippān ro uwaan kūlaaj eo n̄an ļōmņak kōn kōļmenļo̧kjeņ ko an armej ro raar pād ie—ekoba Rilo̧mo̧o̧r eo, Rijilōk ro, Martha, Mary, im Lazarus. Ta eo jej ekkatak jān kajjojo iaer? Bōlen ro uwaan kūlaaj eo remaron̄ kwaļo̧k en̄jake ko bwe tōmak eo aer ilo Jisōs Kraist ekar kajoorļo̧k ilo juon iien mālijjon̄.

pija ej bōk jikin kein jipan̄ ko

Kein Jipan̄ ko jet

Ekkatak jān nejin eo ejerwan jet.

Elder Jeffrey R. Holland ekar kōm̧m̧ane ekkatak in kōn ļeo jein nejin eo ejerwan: “Lein erūtto ejjab kanooj illu bwe eo jatin ekar ro̧o̧ltok n̄an m̧weo āinwōt an illu bwe ro jinen im jemen rej lukkuun m̧ōņōnō kake. … E ekar aikuj in kōļapļo̧k jouj im meanwōd, kōļmenļo̧kjeņ eo emenin aikuj n̄an lo bwe menin ejjab juon ro̧o̧l in jum̧ae doon. Ej ļeo jatin eo. Ke jemen ekar akweļap ippān n̄an leo, ej eo me ekar mej im kiiō ej mour. E eo ekar jarko im kiiō loe” (“The Other Prodigal,” Ensign, Māe 2002, 63).

Kōkm̧anm̧anļo̧k Ad Katakin

Pukōtļo̧k eo juon. Āinwōt Separd eo ilo būrabōļ eo an Rilo̧mo̧o̧r eo (lale Luk 15:4), “kwomaron̄ pukōtļo̧k ro me rejako jān kūlaaj eo am̧. Iien ko rem̧m̧an am̧ n̄an katakin im ļōn̄aj ro uwaan kūlaaj eo im jipan̄ er itok n̄an Kraist ej ilo̧k eļapļo̧k jān kūlaaj ruum̧ eo im eļapļo̧k jān ro me rej ekkā aer pād ilo katak ko” (Teaching in the Savior’s Way, 8).