Jisōs ippān kōrā eo ekar wōtļo̧k ioon bwidej

N̄a I Jab Liaakḷọk Eok, jān Eva Koleva Timothy

Eprōļ 24–30

Jon 27–10

“N̄a Seperd Em̧m̧an”

Kwe im ro uwaan kūlaaj eo naaj bōk kōļmenļo̧kjeņ ko ilo ami riiti Jon 7–10 wiik in. Keememej bwe ļōmņak ko ilo unin tōl in rej aikuj jipan̄ ijello̧kin an bōk jikin im̧we eo kwoj bōke jān ekkatak jeje ko rekwojarjar.

pija ej bōk jikin kwaļo̧k

Kajjitōk bwe ren Kwaļo̧k

Kakeememej ro uwaan kūlaaj eo kōn aōrok eo an kōm̧m̧ani im̧ōk im̧wer jikin eo eļap jikin ekkatak gospel eo. Kajjitōk ippāer n̄an kwaļo̧k ta eo Jetōb Kwojarjar ekar katakin er ilo aer kar ekkatak Jon 7–10 ilo m̧weo, kajjojo armej im ippān baam̧le ko aer.

pija eo ej bōk jikin katakin

Katakin Katak eo

Jon 27–10

Jisōs Kraist ej Rilo̧mo̧o̧r eo an laļ in.

• Ilo aolepān Jon 7–10, Rilo̧mo̧o̧r eo ekar kōm̧m̧ane jet naan in kean̄ ko me remaron̄ jipan̄ ro uwaan kūlaaj eo kōkōm̧anm̧anļo̧k aer meļeļe mijen eo An im epaakeļo̧k E. Ļōmņak in kajjitōk ippān ro uwaan kūlaaj eo n̄an riiti eoon in jipan̄ kein an jeje ko rekwojarjar im kwaļo̧k ta eo rej katakin kōn mijen kwojarjar eo an Rilo̧mo̧o̧r. Ekōjkan an Kraist kart kakūrm̧ool eddo kein ilo mour ko ad?

  • Jon 7:37–39: Unjen “dān in mour”

  • Jon 8:12; 9:4–5: “Meram an laļ”

  • Jon 9:8–10, 35–38: “Nejin Anij”

  • Jon 10:7–9: “Kōjām eo”

  • Jon 10:11–14: “Seperd Em̧m̧an”

Jisōs Kraist

Meram in Laļ, jān Howard Lyon

Jon 7:14–17

Ilo ad mour kōn katak ko an Jisōs Kraist, jenaaj itok n̄an jeļā bwe rej m̧ool.

• Ilo jet jekjek, bōk juon naan in kam̧ool ej āinwōt ekkatak juon kapeel—jim̧or aikuj kaminene im jeļā kake. N̄an kwaļo̧k menin, kwomaron̄ kajjitōk ippān ro uwaan kūlaaj eo me ewōr ippāer juon kapeel emakeļo̧k, ko āinwōt lejon̄jon̄ ak kōjan̄ juon kein kōjan̄jan̄, n̄an kōmeļeļeik ekōjkan aer kōļapļo̧k kapeel eo aer. Etke ejjab bwe n̄an riit kōn juon kapeel ak alooje an juon kōjan̄ e? Āinwōt juon kūlaaj, ekōnono kōn ekōjkan an kijejeto bōk koņaan ilo kamineneik juon kapeel ejjeļo̧k oktak n̄an jon̄ak eo ilo jetōb Rilo̧mo̧o̧r eo ekar kōmeļeļeik ilo Jon 7:14–17. Ewi wāween an oktak?

• Bōlen ro uwaan kūlaaj eo remaron̄ kwaļo̧k en̄jake ko me mour kōn juon m̧ool an gospel eo ekar jipan̄ er bōk juon naan in kam̧ool kake. Leļo̧k n̄an ro uwaan kūlaaj eo iien n̄an ļōmņak kōn juon pedped in katak an gospel eo rekōņaan bōk juon naan in kam̧ool ekajoorļo̧k kake, innām kōketak er n̄an kōm̧m̧ane jet kōttōpar ko remakeļo̧k bwe en ļapļo̧k aer mour kōn pedped in katak jab eo.

Jon 8:1–11

Jouj eo an Rilo̧mo̧o̧r eo ej etal n̄an aolep ro rej ukweļo̧k.

• N̄an ro me rej en̄jake liaakeļo̧k kōnke kōn jerawiwi ko aer, bwebwenato eo kōn an Rilo̧mo̧o̧r eo leļo̧k jouj im ukweļo̧k n̄an kōrā eo ekar ļōn̄ emaron̄ in juon unjen kōketak. Ak, eļan̄n̄e ro uwaan kūlaaj eo rej en̄jake kapok n̄an liaakeļo̧k ro jet kōnke kōn jerawiwi ko aer, bwebwenato eo emaron̄ jerbal āinwōt juon kakkōl. Kwomaron̄ kajjitōk ippān ro uwaan kūlaaj eo n̄an riiti Jon 8:1–11, kappukōt uwaak ko n̄an kajjitōk ko āinwōt kein: Ta eo bwebwenato in ej katakin kōn jouj eo an Rilo̧mo̧o̧r eo? Ekōjkan an bōk jouj eo An maron̄ in n̄e jej jerawiwi jipan̄ kōj n̄e jej en̄jake kapo n̄an ekajet ro jet? (lale Alma 29:9–10).

• N̄an jipan̄ ro uwaan kūlaaj eo lo men ko rejetjet n̄an juon make ilo Jon 8:1–11, ļōmņak in ajije kūlaaj eo n̄an jilu kumi ko—juon n̄an pedped ioon naan ko im jerbal ko an Ripharise ro, juon n̄an pedped ioon naan ko im jerbal ko an Rilo̧mo̧o̧r eo, im juon n̄an pedped ioon naan ko im jerbal ko an kōrā eo. Remaron̄ kōm̧m̧ane menin ilo aer riiti bwebwenato eo ak ilo aer alooje pija in alooj eo “Go and Sin No More” (ChurchofJesusChrist.org). Kajjitōk ippān kajjojo kumi n̄an kōm̧m̧ane juon laajrak in m̧ool ko ilo jetōb rej ekkatak jān riiti kajjojo m̧ōttan in bwebwenato eo.

• Jet iien jejjab jeļā kōn wāween ko me jej ekajete ro jet. En̄in ej juon m̧akūtkūt n̄an jipan̄ ro uwaan kūlaaj eo anjo̧ ioon ļamļam in: Kajjitōk ippān ro uwaan kūlaaj eo n̄an jipan̄ eok ejake juon laajrak in wāween ko jej ekajete armej ro (kōn paotok eo aer, m̧wilier, bwebwenato im mour eo aer, ak ko eierļo̧k). Leļo̧k n̄an ro uwaan kūlaaj eo m̧ōttan peba ko m̧wjiti ilo ļōmān juon deka, im kajjitōk ippāer kāālet juon wāween ekajete ro jet me rej en̄jake rej bōd kake im je ioon juon peba ļōmān dekā. Jej ekkatak jān naan ko an Rilo̧mo̧o̧r eo n̄an Ripharise ro ilo Jon 8:1–11? Kajjitōk ippān kūlaaj eo n̄an je ioon turejet eo juon in peba dekā ko aer juon men me enaaj kakeememej er n̄an jab ekajet (bōlen juon eoon jān Jon 8).

Jon 8:18–19, 26–29

Ilo ad itok n̄an jeļā Jisōs Kraist, jej itok n̄an jeļā Jemen.

• Ta eo naan ko an Rilo̧mo̧o̧r eo ilo Jon 8:18–19, 26–29 ej katakin kōn ekkejel eo ikōtaan E im Eo Jemen? Ālkin riiti im ekōnono kōn eoon kein, ro uwaan kūlaaj eo remaron̄ laajrake ioon boot eo juon men Jisōs ekar kōm̧m̧ane, kar ba, ak katakin. Ta eo jej ekkatak kōn Anij Jemen jān men kein?

Kōkōm̧anm̧anļo̧k Ad Katakin

Mour erreo kōn tōl eo an Jetōb N̄e kwoj mour kōn gospel eo, kwoj erreo kōn jem̧jerā eo an Jetōb eo. Ilo am̧ kappukot tōl eo An, E enaaj lewaj n̄an eok ļōmņak ko im im̧we ko am̧ kōn ekōjkan tōpar aikuj ko an ro kwoj katakin. (Lale Teaching in the Savior’s Way, 5.)