Oktak in Nemāme eo an Kraist

Oktak in Nemāme eo, jān Carl Heinrich Bloch

Eprōļ 10–16

Matu 15–17; Mark 7–9

“Kwe Ri Kraist ”

Juon iaan jibadbad ko reļļap āinwōt juon rūkaki ej n̄an jipan̄ kalōk tōmak eo an ro jet ilo Jisōs Kraist. Likūt wōt ilo kōļmenļo̧kjeņ ilo am̧ ekkatak jeje ko rekwojarjar ilo wiik in. Ta eo kwoj loe me emaron̄ jipan̄ ro uwaan kūlaaj eo ļapļo̧k an m̧wilaļļo̧k aer tōmak ilo E.

pija ej bōk jikin kwaļo̧k

Kajjitōk bwe ren Kwaļo̧k

Juon wāween kwomaron̄ kōketak ro uwaan kūlaaj eo n̄an ekkatak jeje ko rekwojarjar an juon make im ippān baam̧le ko aer ej n̄an kajjitōk ippāer n̄an kwaļo̧k ekōjkan an ekkatak eo aer kōn jeje ko rekwojarjar kar jipan̄ er bōk revelesōn im kar kōjeraam̧m̧an mour ko aer. N̄an waanjon̄ak, ekōjkan an kar ekkatak jepta kein kareel kāālet ko raar kōm̧m̧ani ilo wiik in?

pija eo ej bōk jikin katakin

Katakin Katak eo

Matu 16:13–17

Juon naan in kam̧ool kōn Jisōs Kraist ej itok kōn revelesōn.

• Enan̄in ke ewōr jabdewōt ro uwaan kūlaaj eo ekar aikuj kōmeļeļeik juon armej ekōjkan aer jeļā bwe gospel eo em̧ool? Ilo Matu 16:13–17, ta eo Rilo̧mo̧o̧r eo ekar katakin kake kōn ekōjkan ad bōk juon naan in kam̧ool? Kwomaron̄ kwaļo̧k ekōjkan an Alma kar bōk naan in kam̧ool eo an (lale Alma 5:45–46) ak ta eo Irooj ekar katakin Oliver Cowdery kōn revelesōn (lale Katak im Bujen Ko 6:14–15, 22–23; 8:2–3). Ta eo kwoj ļōmņak Piter ak Alma ak Oliver Cowdery remaron̄ in kar ba eļan̄n̄e juon armej ekar kajjitōk ippāer ekōjkan aer jeļā bwe gospel eo em̧ool?

• Emaron̄ in wōr armej ro ilo kūlaaj eo am̧ me rej jar kōn revelesōn an juon make bōtaab rejjab jeļā ekōjkan kile n̄e ej itok. Ilo HearHim.ChurchofJesusChrist.org, kwomaron̄ lo pija in alooj ko me ritōl ro an Kabun̄ in rej kwaļo̧k ekōjkan aer kile ainikien Irooj. Kwomaron̄ alooje juon iaan pija in alooj kein ippān kūlaaj eo im kōnono kōn ta eo pija in alooj ko rej katakin kōn bōk revelesōn. Ta katak ko jet ak eoon in jipan̄ ko an jeje ko rekwojarjar kūlaaj eo am̧ emaron̄ in ļōmņak kaki me enaaj jipan̄ juon armej kile revelesōn eo an juon make? (N̄an waanjon̄ak, lale 1 Kiin̄ Ro 19:11–12; Galetia 5:22–23; Inōs 1:1–8; Katak im Bujen Ko 6:22–24; 8:2–3; 9:7–9.)

Matu 16:13–19; 17:1–9

Priesthood ki ko rej menin aikuj n̄an lo̧mo̧o̧r eo ad.

• N̄an jino juon iien ekōnono kōn ki ko an priesthood eo, kwomaron̄ je eoon in jipan̄ ko āinwōt kein ioon boot eo: Matu 16:19; Katak im Bujen Ko 107:18–20; 128:8–11; 132:18–19, 59; Josep Smith—Bwebwenato 1:72; im “Ki ko an Priesthood eo” ilo Unin Tōl eo n̄an Jeje Ko Rekwōjarjar (scriptures.ChurchofJesusChrist.org). Innām kajjitōk ippān ro uwaan kūlaaj eo n̄an riiti juon ak elōn̄ļo̧k eoon ko im kwaļo̧k juon men rej ekkatak jān er kōn ki ko an priesthood eo. Etke jej aikuji ki ko an priesthood eo?

• N̄an jipan̄ ro uwaan kūlaaj eo kōkajoorļo̧k naan in kam̧ool ko aer kōn jepļaaktok eo an ki ko an priesthood eo ilo raan kein āliktata, kwomaron̄ kajjitōk ippān jimettan in kūlaaj eo n̄an ekkatak kōn Matu 17:1–9 im jimettan eo juon n̄an ekkatak kōn Katak im Bujen Ko 110. Innām remaron̄ kwaļo̧k ippān doon ta eo raar ekkatak im kile men ko reier wōt juon ikōtaan bwebwenato kein ruo. Pija in alooj eo “Priesthood Keys: The Restoration of Priesthood Keys” (ChurchofJesusChrist.org) emaron̄ barāinwōt jipan̄.

annan̄ eo an Piter jibwe ki ko

Ki ko an priesthood eo rej mālim n̄an tōl kōjerbal priesthood eo.

Mark 9:14–30

N̄en kappukōt eļapļo̧k tōmak, jej jino kōn tōmak eo ewōr ippād.

• Elder Jeffrey R. Holland ekar kōjerbal bwebwenato eo kōn juon baba eo ej kappukōt kemour n̄an ļaddik eo nejin n̄an katakin ekōjkan ad aikuj in kepaak Irooj n̄e jej en̄jake bwe tōmak eo ad ejabwe (lale “Irooj, Ij Tōmak,” Liaona, Māe 2013, 93–95). Ālkin riiti Mark 9:14–30 āinwōt juon kūlaaj, kwomaron̄ ekōnono ippān doon kōn men ko jilu an Elder Holland (lale “Kein Jipan̄ ko Jet”).

pija ej bōk jikin kein jipan̄ ko

Kein Jipan̄ ko jet

Katak ko jilu n̄an jipan̄ kōj bōk eļapļo̧k tōmak.

Ālkin bar kwaļo̧k bwebwenato eo loe ilo Mark 9:14–29, Elder Jeffrey R. Holland ekar katakin:

“Men eo jinoin tata n̄an kile kōn bwebwenato in ej bwe n̄e jej kwaļo̧k apan̄ eo n̄an bōk tōmak eo, jemād ej kwaļo̧k kajoor eo An moktata im n̄an wōt kile jekjek eo ekkar n̄an E. An kōmlet ekajoor im ejjeļo̧k pere: ‘Irooj, ij tōmak.’ Inaaj ba n̄an aolep ro reaikuj eļapļo̧k tōmak, keememej em̧m̧aan in! Ilo iien mijak ak pere ak iien jorrāān, kōjparok tōmak eo emōj am kadede ejaake, aaet men̄e tōmak eo ejjab bwe. …

“Men eo kein karuo ej oktak in aorōk an men eo kein kajuon. N̄e jorrāān ko rej waļo̧k im kajjitōk ko rej jarjar, jab jino kajjitōk kōn tōmak eo am jen ba ewōr jete ejjeļo̧k ippam̧, jino jān am ‘jab tōmak.’ … Ij jab kajjitōk ippam bwe kwōn kwaļo̧k etan n̄e ewōr tōmak in ejjeļo̧k ippam. Ij kajjitōk ippam n̄an m̧ool ilo tōmak in am̧. …

“Men eo āliktata: N̄e pere ak eppen ej itok, jab mijak n̄an kajjitōk jipan̄. Eļan̄n̄e jipan̄ āinwōt eo ettā im m̧ool āinwōt an baba in kar kōm̧m̧ane, jemaron̄ bōke” (“Irooj, Ij Tōmak,” Liaona, Māe 2013, 93–94).

Kōkōm̧anm̧an Ad Katakin

Kajjitōk kajjitōk ko me rej akjo̧ketok naan in kam̧ool. Kajjitōk kajjitōk ko rej kōketak ro uwaan kūlaaj eo n̄an kwaļo̧k naan in kam̧ool ko aer emaron̄ in juon wāween ewejepedik n̄an akjo̧ketok Jetōb eo. N̄an waanjon̄ak, n̄e ekōnono kōn Matu 16:13–17, kwomaron̄ kajjitōk, “Ta eo kwar ekkatak kōn Rilo̧mo̧o̧r eo me ekar kōkajoorļo̧k naan in kam̧ool eo am̧ kōn E āinwōt Rilo̧mo̧o̧r eo?” (Lale Teaching in the Savior’s Way, 32.)