Wūleej

Eprōļ 3–9.

Ijtō

“O Mej, Ewi Am̧ Anjo̧?

Ilo am̧ m̧aanjabpopo n̄an katakin ilo wiik in, ļōmņak kōn ekōjkan an juon iien ekōnono an kūlaaj eo am̧ kōn Jabōt in Ijtō maron̄ kalōk tōmak ilo Jisōs Kraist im Pinmuur eo An.

pija ej bōk jikin kwaļo̧k

Kajjitōk bwe ren Kwaļo̧k

Kajjitōk ippān ro uwaan kūlaaj eo kōn ekōjkan aer naaj kar uwaake kajjitōk ko āinwōt “Ta Pinmuur eo an Jisōs Kraist?” im “Ekōjkan aō maron̄ bōk kōjeraam̧m̧an ko an Pinmuur eo an Kraist?” Kajjitōk ippāer n̄an kwaļo̧k jabdewōt eoon in jipan̄ an jeje ko rekwojarjar raar riiti wiik in me ejipan̄ uwaake kajjitōk kein.

pija eo ej bōk jikin katakin

Katakin Katak eo

Jisōs Kraist ekar kadiwōj kōj jān jerawiwi im mej, ej kōkajoorļo̧k kōj ilo m̧ōjņo̧ ko ad, im ej kaenōm̧m̧an kōj ilo mālijjon̄ ko ad.

• Ro uwaan kūlaaj eo am̧ rej ke meļeļe bwe Jisōs ej kaenōm̧m̧an kōj ilo mālijjon̄ ko ad im ej kōkajoorļo̧k kōj ilo m̧ōjņo̧ ko ad, barāinwōt kadiwōjļo̧k kōj jān jerawiwi im mej? Juon wāween kwomaron̄ jipan̄ er lo pedped in katak kein ej n̄an je naan kein ioon boot eo : Jerawiwi, Mej, Mālijjon̄ ko, M̧ōjņo̧ ko. Kajjojo ro uwaan kūlaaj eo remaron̄ riiti juon iaan eoon in jipan̄ ko an jeje ko rekwojarjar kar kōllaajraki ilo “Kein Jipan̄ ko Jet” im kejekļo̧kjeņ kōn ekōjkan an Rilo̧mo̧o̧r eo jipan̄ kōj anjo̧ ak niknik ilo men kein. Innām ro uwaan kūlaaj eo remaron̄ je ta eo rej ekkatak jan eoon in jipan̄ kein an jeje ko rekwojarjar ium̧we kajjojo taitōļ ko im kwaļo̧k naan in kam̧ool eo aer kōn Rilo̧mo̧o̧r eo im Pinmuur eo An.

  Jisōs ilo debwāāl eo

  Debwāāl, jān Louise Parker

• Bōlen juon kein katakin (object lesson) epidodo emaron̄ jipan̄ kōmeļeļeik oktak eo ikōtaan erreo jān jerawiwi im weppāān: Kwomaron̄ je ioon boot eo jāntōj ko jejjo im̧aan tata jān Moronai 10:32, bōtaab kobaik bōd in jipeel ak kūram̧an. Innām kajjitōk ippān juon uwaan kūlaaj eo n̄an jeerļo̧k (ak jab kajim̧we) bōd ko. Menin ekar ke ņa mejļan jorrāān eo? Ta katak ko jej ekkatak jān eoon in jipan̄ in an jeje ko rekwojarjar im kein katak in (object lesson) kōn tōprak eo an Pinmuur eo an Rilo̧mo̧o̧r emaron̄ kōm̧m̧ane n̄an kōj? Ennaan in jān Būreentōn Dieter F. Uchtdorf emaron̄ in barāinwōt jipan̄: “Eļan̄n̄e lo̧mo̧o̧r ej meļeļein wōt jereļo̧k bōd ko ad im jerawiwi ko, innām lo̧mo̧o̧r—em̧m̧an āinwōt ej—ejjab kakūrm̧ool wōt kōttōbar eo eļap an Jemād n̄an kōj. Jibadbad eo an eutiejļo̧k: E ekōņaan bwe ļaddik im leddik ro nejin ren erom āinwōt E” (“Menin Letok eo kōn Tiriam̧o̧,” Liaona, Māe 2015, 108).

• Bwebwenato ko im waanjon̄ak ko remaron̄ jipan̄ kōkōm̧anm̧anļo̧k ad meļeļe kōn Pinmuur eo an Kraist. Kwomaron̄ kōņaan kwaļo̧k juon bwebwenato ak juon waanjon̄ak jān juon iaan ennaan ko an kweilo̧k eo eļap ilo “Kein Jipan̄ ko Jet.” Ak kom̧ maron̄ alooje ippān doon “Handel’s Messiah: Debtor’s Prison” (video), ChurchofJesusChrist.org, im ekōnono kōn ekōjkan an Pinmuur eo an Jisōs Kraist kanemkwoj kōj jān kalbuuj ko ad. Innām ro uwaan kūlaaj eo remaron̄ kwaļo̧k jabdewōt ļōmņak ko ak en̄jake ko ewōr ippāer kōn Rilo̧mo̧o̧r eo im Pinmuur eo An n̄an kōj.

Matu 28:1–10; Luk 24:13–35; Jon 20:1–29; 1 Korint 15:3–8, 55–58

Rikam̧ool ro ilo Kallim̧ur Ekāāl raar kwaļo̧k naan in kam̧ool bwe Jisōs Kraist ekar anjo̧ ioon mej.

• Ļōmņak in etale bwebwenato eo ilo jejek ko rekwojarjar kōn Ijtō eo im̧aan tata—Jerkakpeje eo an Jisōs Kraist. Kwomaron̄ kajjitōk ippān ro uwaan kūlaaj eo n̄an bar bwebwenato kōn bwebwenato eo ilo naan ko an make (lale Jon 20:1–17). Kwomaron̄ barāinwōt kwaļo̧k pija in alooj in Baibōļ, eo āinwōt “He Is Risen” (ChurchofJesusChrist.org

• Bōlen ro uwaan kūlaaj eo renaaj bōk juon meļeļe em̧wilaļļo̧k kōn aorōk eo an rikam̧ool ro an Jerkakpeje eo an Jisōs Kraist eļan̄n̄e rej pijaikļo̧k bwe rej ļo̧er ro ak rikōm̧m̧an nuuj ro rej etale naan eo bwe Kraist ekar jerkakpeje. Kajjitōk ippāer n̄an pukōt armej ro ilo eoon in jipan̄ kein an jeje ko rekwojarjar me remaron̄ jutak āinwōt rikam̧ool ro (lale Matu 28:1–10; Luk 24:13–35; Jon 20:19–29; 1 Korint 15:3–8, 55–58). Aaet remaron̄ je juon ennaan ilo tukadu in kōn ta eo armej rein remaron̄ in kar ba n̄e kam̧ool ilo jikin ekajet eo ak n̄e rej intōrpiu n̄an juon riboot ilo nuuj.

• Juon wāween n̄an kam̧wilaļļo̧k kam̧m̧oolol eo ad kōn Jerkakpeje eo an Rilo̧mo̧o̧r ej n̄an ļōmņak kōn ekōjkan ad naaj kōmeļeļeik tōmak ko ad n̄an ro jet. Ekōjkan an naaj ro uwaan kūlaaj eo kwaļo̧k naan in kam̧ool ko aer kōn Jisōs Kraist ilo jekjek kein: juon uwaan baam̧le eo kar lo an nan̄inmej kōn juon nan̄inmej eļap; juon m̧ōttan ekar mej juon eo ejitōnbōro, juon ruturin ej kajjitōk etke kwoj keemem e Ijtō. Kōketak er n̄an etale eoon in jipan̄ ko an jeje ko rekwojarjar (āinwōt ko ilo “Kein Jipan̄ ko Jet”) ilo aer ļōmņak kōn uwaak ko aer. Kajjitōk ippān jejjo ro uwaan kūlaaj eo bwe ren kwaļo̧k ļōmņak ko aer.

pija ej bōk jikin kein jipan̄ ko

Kein Jipan̄ ko Jet

Eoon in jipan̄ ko an jeje ko rekwojarjar kōn Pinmuur eo im Jerkakpeje eo an Rilo̧mo̧o̧r eo.

• Aiseia 25:8; 53:3–6

• Jon 20:11–17

• Rom 8:31–39

• 2 Nipai 9:5–12

• Mosaia 3:5–10

• Alma 7:10–14; 11:42–44

• 3 Nipai 11:8–17; 27:13–20

• Moronai 7:41

• Katak im Bujen Ko 19:15–19

Ennaan ko kōn Pinmuur eo im Jerkakpeje eo an Rilo̧mo̧o̧r eo.

• Dale G. Renlund, “Ļōmņak kōn Em̧m̧an im Meanwōd an Anij,” Liaona, Māe 2020, 41–44

• Gerrit W. Gong, “Seperd Em̧m̧an, Ļaam̧ an Anij,” Liaona, Māe 2019, 97–100

• Sharon Eubank, “Kraist: Meram eo Me ej Romaak ilo Marok,” Liaona, Māe 2019, 73–76

• Cristina B. Franco, “Kajoor in Kōmour an Jisōs Kraist,” Liaona, Nob. 2020, 60–62

Kōkōm̧anm̧anļo̧k Ad Katakin

Erom̧ juon kein jerbal an Jetōb eo. “Kōttōbar eo am̧ āinwōt juon rūkaki ejjab n̄an kōm̧m̧ane juon kwaļo̧k eo em̧m̧an bōtaab ej n̄an jipan̄ ro jet bōk im̧we ko an Jetōb Kwojarjar, eo ej rūkaki eo em̧ool” (Teaching in the Savior’s Way, 10).