8–14 Mē

Mātiu 19–20; Maʻake 10; Luke 18

“Ko e Hā ʻOku Ou Kei Hala Aí?”

ʻI hoʻo teuteu ke faiakó, fakakaukau ʻi he faʻa lotu ki he founga te ke lava ai ʻo tokoniʻi e kau mēmipa ʻo e kalasí ke nau vahevahe ʻa e meʻa ne nau ako pe ongoʻi he lolotonga ʻenau akó.

Fakaafeʻi e Feʻinasiʻakí

ʻE ala tokoni ke faʻa aleaʻi ʻe he kau mēmipa ʻo e kalasí ʻa e ngaahi aʻusia fakalūkufua ʻo e ako e ongoongoleleí ʻo fakatefito ʻi ʻapí. Ko e hā ha ngaahi aʻusia ola lelei te nau lava ʻo vahevahé? Ko e hā ha ngaahi fakafeʻātungia pe faingataʻa ʻoku nau fehangahangai mo iá? Ko e hā ha faleʻi te nau lava ke fefakahokoʻaki?

Akoʻi ʻa e Tokāteliné

Mātiu 19:3–9

Ko e mali ʻi ha vā ʻo ha tangata mo ha fefiné ʻoku mahuʻinga ia ki he palani taʻengata ʻa e ʻOtuá.

• Ko e fakakaukau ʻa e māmaní ki he nofo-malí ʻoku fakautuutu ʻene mavahe mei he moʻoni taʻengatá. Koeʻuhí ke tokoni ke ʻilo ʻe hoʻo kalasí e fakakakau ʻa e ʻOtuá ki he nofo-malí, te ke ala fakaafeʻi kinautolu ke nau lau ʻa e Mātiu 19:3–9 pea lisi ʻi he palakipoé ʻa e ngaahi moʻoni ʻoku nau maʻu fekauʻaki mo e nofo-malí. Te nau ala hiki foki ha lisi ʻo ha ngaahi moʻoni kehe ne nau maʻu ʻi he ʻū potufolofola ko ʻení: Sēnesi 1:27–28; 1 Kolinitō 11:11; Tokāteline mo e Ngaahi Fuakava 42:22; 49:15–17; 131:1–4; 132:19; mo e Mōsese 3:18, 21–24. ʻOku toe fakamamafaʻi fēfē ʻa e ngaahi moʻoni ko ʻení ʻi he Ko e Fāmilí: Ko ha Fanongonongo ki Māmaní”? (ChurchofJesusChrist.org).

Mātiu 20:1–16

ʻE lava ke maʻu ʻe he tokotaha kotoa ʻa e tāpuaki ʻo e moʻui taʻengatá, tatau ai pē pe ko e fē taimi te nau tali ai ʻa e ongoongoleleí.

• Ko e hā ʻe tokoni ki he kau mēmipa ʻo hoʻo kalasí ke nau moʻui ʻaki e ngaahi tefitoʻi moʻoni ʻi he tala fakatātā ʻo e kau ngāue ʻi he ngoue vainé? Te ke ala fakaafeʻi ha kau mēmipa toko siʻi ʻo e kalasí ke nau teuteu ke tulamaʻi ʻa e tala fakatātaá ki he kalasí. Ka hili hono fakaʻaliʻalí, ʻe lava ke vahevahe ʻe he niʻihi ne nau fakatātaaʻi e kau ngāué ʻenau ongo fekauʻaki mo e totongi naʻa nau maʻú pea mo e ʻuhingá. Ko e hā ʻoku fokotuʻu mai ʻe he tala fakatātaá ni fekauʻaki mo e puleʻanga ʻo e langí? Ko e hā mo ha ngaahi toe ʻilo kehe ʻoku tau maʻu fekauʻaki mo e tala fakatātā ko ʻení, ʻi he pōpoaki ʻa ʻEletā Sefilī R. Hōlani “Ko e Kau Ngāue ʻi he Ngoue Vainé”? (Liahona, Mē 2012, 31–33).

Mātiu 19:16–22; Maʻake 10:17–27

ʻE tataki kitautolu ʻe he Fakamoʻuí ke tau ofi ange kiate Ia ʻi heʻetau kole ʻEne tokoní.

• Te ke lava fēfē ʻo tokoni ki he kau mēmipa ʻo e kalasí ke nau ʻilo mo moʻui ʻaki e ngaahi tefitoʻi moʻoni ʻi he talanoa ʻo e talavou koloaʻiá? Ko ha founga ʻe taha ko hano kole ange ke nau lau ʻa e Maʻake 10:17–27 mo fakakaukau pe kuo ʻi ai ha taimi ne nau ongoʻi ai ʻo hangē ko e talavou koloaʻiá. Ko e hā kuo tokoni ke tau muimui ai ki he faleʻi ʻa e Fakamoʻuí neongo naʻe faingataʻa hono fakahokó? Mahalo naʻa loto-fiemālie ʻa e kau mēmipa ʻo e kalasí ke vahevahe ha ngaahi aʻusia ʻa ia ne nau fehuʻi ai “Ko e hā ʻoku ou kei hala aí?” (Mātiu 19:20) pea maʻu ha ueʻi fakataautaha ke fakalakalaka. Ke tokoni ki he kau mēmipa ʻo e kalasí ʻa ia te nau ala loto-foʻi ʻi heʻenau tokanga taha ki he meʻa ʻoku ʻikai ke nau maʻú, ʻe lava ke ke vahevahe ange ʻa e fakamatala ʻi he “Ngaahi Maʻuʻanga Tokoni Kehé.”

• Mahalo ne ʻosi lau ʻe he kau mēmipa ʻo e kalasí ha pōpoaki konifelenisi ʻoku fekauʻaki mo e ngaahi veesi ko ʻení ʻo hangē ko hono fokotuʻu mai ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí . Fakaafeʻi ke nau vahevahe ʻa e ngaahi ʻilo ne nau maʻú.

Ko e Tangata Tānaki Tukuhau Kuo Fakatomalá mo e Tangata Fālesi Angatonú ʻi he Temipalé, tā fakatātāʻi ʻe Frank Adams

Luke 18:9–14

ʻOku totonu ke tau falala ki he ʻaloʻofa ʻa e ʻOtuá, kae ʻikai ko ʻetau māʻoniʻoní.

• ʻE lava ʻo tokoni atu e tala fakatātā ʻa e Fakamoʻuí ʻi hono fakafehoanaki e lotu ʻa e Fālesí mo e tangata tānaki tukuhaú, ke ke fakamamafaʻi e meʻa ʻoku kole ʻe he ʻEikí meiate kinautolu ʻoku fekumi ke muimui ʻiate Iá. Koeʻuhí ke tokoniʻi ʻa e kau mēmipa ʻo e kalasí ke nau fakaʻaongaʻi e tala fakatātā ko ʻení ki hotau kuongá, te ke ala fakaafeʻi kinautolu ke nau toe hiki e lotu ʻa e kau Fālesí ʻi ha founga ʻokú ne fakaʻaongaʻi ha ngaahi fakaikiiki fakaonopooni, kae kei fakamatalaʻi pē ʻa e loto tatau. Te nau lava ‘o fai e me’a tatau mo e lotu ‘a e tokotaha tānaki tukuhaú pea toki vahevahe leva ʻa e meʻa ne nau tohí. ʻOku fekauʻaki fēfē ʻa e veesi 15–17 mo e 18–24 ki he meʻa naʻe akoʻi ʻe he Fakamoʻuí ʻi he tala fakatātā ko ʻení? Te ke ala vahevahe foki e fakamatala ko ʻeni fekauʻaki mo e ngaahi veesi ko ʻeni naʻe fai ʻe ʻEletā Teili G. Lenilaní: “ʻOku mahino kiate kitautolu ʻa e pōpoakí: ʻoku ʻunuʻunu ofi ange ha tokotaha faiangahala ʻoku fakatomala ki he ʻOtuá, ʻi ha tokotaha fiemāʻoniʻoni ʻokú ne fakamalaʻiaʻi ʻa e taha faiangahalá” (“Ko Hotau Tauhisipi Leleí,” Liahona, Mē 2017, 31).

Ngaahi Maʻuʻanga Tokoni Kehé

ʻOua naʻa tau fakafiefiemālie pe loto-foʻi.

Naʻe akoʻi ʻe ʻEletā D. Toti Kulisitofāsoni:

“Kapau te tau fehuʻi fakamātoato, ‘Ko e hā ʻoku ou kei hala aí?’ He ʻikai tuku [ʻe he ʻOtuá] ke tau fakamahamahalo, ka te Ne tali ʻi he ʻofa ke tau fiefia. Pea te Ne foaki mai ha ʻamanaki lelei.

“Ko ha ngāue lahi fau ia, pea ʻe mātuʻaki fakatupu foʻi kapau ne tau tuēnoa ʻi heʻetau fāifeinga ki he māʻoniʻoní. Ko e foʻi moʻoni nāunauʻiá, ʻa e ʻikai ke tau tuenoá. ʻOku tau maʻu e ʻofa ʻa e ʻOtuá, ʻa e ʻaloʻofa ʻa Kalaisí, ʻa e fakafiemālie mo e tataki ʻa e Laumālie Māʻoniʻoní, pea mo e feohi mo e fakalotolahi ʻa e Kāinga Māʻoniʻoní ʻi he sino ʻo Kalaisí. ʻOua muʻa naʻa tau fakafiefiemālie ʻi hotau tuʻunga lolotongá, pea ʻoua foki naʻa tau loto-foʻi” (“Ko e Mā ʻo e Moʻui Naʻe Hāʻele Hifo mei Langí,” Liahona, Nōvema 2017, 39).

Ko Hono Fakatupulaki ʻEtau Founga Akoʻí

ʻOku fie maʻu ʻe he ʻOtuá homou ngaahi talēniti makehé mo e meʻa ʻoku mou malavá. “Te ke lava ʻo faitāpuekina e fānau ʻa e ʻOtuá ʻi hoʻo ʻofa ʻi he niʻihi kehé, ko e ngaahi meʻa-foaki kuo foaki atu ʻe he ʻOtuá pea mo e ngaahi aʻusia pe taukei ʻo hoʻo moʻuí. ʻI hoʻo ngāue faivelenga mo fekumi ki he tokoni ʻa e ʻOtuá, te Ne fakatupulekina koe, pea te ke tupulaki ʻi hoʻo malava ke akoʻi e ongoongoleleí ʻi he founga ʻa e Fakamoʻuí” (Ko e Faiako ‘i he Founga ‘a e Fakamoʻuí, 5).