“22–28 Mē. Siosefa Sāmita—Mātiu 1; Mātiu 24–25; Maʻake 12–13; Luke 21: ʻKa Haʻu ʻa e Foha ʻo e Tangatá,’” Haʻu ʻo Muimui ʻIate Au—Maʻá e Lautohi Faka-Sāpaté: Fuakava Foʻou 2023 (2022)
“22–28 Mē. Siosefa Sāmita—Mātiu 1; Mātiu 24–25; Maʻake 12–13; Luke 21,” Haʻu ʻo Muimui ʻIate Au—Maʻá e Lautohi Faka-Sāpaté: 2023
The Second Coming [Ko e Hāʻele ʻAnga Ua Maí], tā fakatātaaʻi ʻe Harry Anderson
22–28 Mē
Siosefa Sāmita—Mātiu 1; Mātiu 24–25; Maʻake 12–13; Luke 21
“Ka Haʻu ʻa e Foha ʻo e Tangatá”
Manatuʻi ke kamata hoʻo teuteu ke faiakó ʻaki hano lau ʻi he faʻa lotu ʻa e Siosefa Sāmita—Mātiu 1; Mātiu 24–25; Maʻake 12–13; mo e Luke 21. Fekumi ki ha tataki fakalaumālie, peá ke toe vakaiʻi leva e fokotuʻutuʻu ko ʻení ki ha ngaahi fakakaukau kehe.
Fakaafeʻi e Feʻinasiʻakí
Hiki ʻi he palakipoé ha lisi ʻo e ngaahi tala fakatātā ʻa e Fakamoʻuí ʻoku maʻu ʻi he laukonga ʻo e uike ní, hangē ko e fuʻu fikí, tangata leleí mo e tangata kaihaʻá, ko e tamaioʻeiki faivelengá mo e tamaioʻeiki koví, kau tāupoʻou ʻe toko hongofulú, ngaahi talēnití, mo e fanga sipí mo e fanga kosí. Kole ki he kau mēmipa ʻo e kalasí ke nau vahevahe ha ngaahi moʻoni kuo nau ako mei he ngaahi tala fakatātā ko ʻení, ʻe lava ʻo tokoni ke nau teuteu ki he Hāʻele ʻAnga Ua Mai ʻa e ʻEikí. Ko e hā ʻoku nau fai ke fakaʻaongaʻi e ngaahi moʻoni ko ʻení ʻi heʻenau moʻuí?
Akoʻi ʻa e Tokāteliné
ʻE lava ke tokoniʻi kitautolu ʻe he ngaahi kikite fekauʻaki mo e Hāʻele ʻAnga Ua Mai ʻa e Fakamoʻuí, ke tau fehangahangai mo e kahaʻú ʻi he tui.
-
Mahalo ʻe faingataʻa ke mahino e ngaahi fakaʻilonga ʻo e Hāʻele ʻAnga Ua Mai ʻa e Fakamoʻuí ki ha niʻihi ʻo e kau mēmipa ʻo e kalasí. ʻE ala tokoni kiate kinautolu ke nau ngāue fakakulupu ʻo kumi e ngaahi fakaʻilonga ʻoku nau maʻu ʻi he Siosefa Sāmita—Mātiu 1:21–37. ʻE ala tokoni foki ke mahino ange kiate kinautolu hono mahuʻinga ʻo e ngaahi fakaʻilonga ko ʻení, kapau te nau fakafehoanaki ia mo e ngaahi fakaʻilonga he hala puleʻangá. Ko e hā ʻoku mahuʻinga ai e ngaahi fakaʻilonga he halá? ʻOku tatau fēfē ʻa e ngaahi fakaʻilonga ʻo e Hāʻele ʻAnga Ua Maí mo e ngaahi fakaʻilonga he halá? ʻOku nau faikehekehe fēfē? ʻE lava ke ke tufa ki he kulupu takitaha ha laʻipepa ʻi he fuo ʻo e ngaahi fakaʻilonga he halá pea fakaafeʻi kinautolu ke nau tohi ʻi he laʻipepa takitaha ha fakaʻilonga ʻe hoko kimuʻa ʻi he Hāʻele ʻAnga Ua Maí. Tuku ke nau vahevahe ʻa e meʻa ne nau ʻiló, pea fakaafeʻi ʻa e kalasí ke nau aleaʻi ha fakamoʻoni ki he ngaahi fakaʻilonga ko ʻení ʻi māmani he ʻahó ni.
Siosefa Sāmita—Mātiu 1:26–27, 38–55; Mātiu 25:1–13
Kuo pau ke tau mateuteu maʻu pē ki he Hāʻele ʻAnga Ua Mai ʻa e Fakamoʻuí.
-
ʻE lava ke tokoni e ngaahi tala fakatātā ʻi he Siosefa Sāmita—Mātiu 1:26–27, 38–55 mo e Mātiu 25:1–13 ke ʻilo ʻe he kau mēmipa ʻo e kalasí hono mahuʻinga ke mateuteu ki he Hāʻele ʻAnga Ua Maí. Fakaafeʻi ʻa e kau mēmipa ʻo e kalasí ke nau fakatotolo ʻi he ngaahi veesi ko ʻení pea vahevahe ʻa e meʻa ʻoku nau ongoʻi ʻoku fakaafeʻi kitautolu ʻe he Fakamoʻuí ke tau faí. Naʻe fai ʻe ʻEletā Tēvita A. Petinā ha fakaʻuhinga ki he tala fakatātā ʻo e kau tāupoʻou ʻe toko hongofulú ʻe lava ʻo tokoni (vakai, “Ngaahi Maʻuʻanga Tokoni Kehé”). Ko e hā kuo pau ke tau takitaha aʻusia ai ʻa e uluí? ʻOku tau fakahoko fēfē nai ʻeni? Ko e hā ʻoku tānaki mai ʻe he Tokāteline mo e Ngaahi Fuakava 45:56–57 ki he mahino ʻoku tau maʻu fekauʻaki mo e tala fakatātā ko ʻení?
-
ʻI hoʻomou ako fekauʻaki mo e toe hāʻele mai ʻa e Fakamoʻuí, mahalo te mou lau ai pe hivaʻi fakataha ʻa e ngaahi himi fekauʻaki mo e Hāʻele ʻAnga Ua Maí (vakai, Sīsū Kalaisi—Hāʻele ʻAnga Ua Maí” ʻi he fakahokohoko fakamotuʻalea he konga fakaʻosi ʻo e tohi himí).
ʻI he Fakamaau Fakaʻosí, te tau fai ai ha fakamatala ʻo ʻetau moʻuí ki he ʻEikí.
-
ʻE lava ʻa e tala fakatātā ʻo e ngaahi talēnití mo e tala fakatātā ʻo e fanga sipí mo e fanga kosí ʻo ueʻi fakalaumālie kitautolu ke tau fakakaukau ki he fakamatala ʻo ʻetau moʻuí te tau fai ki he ʻEikí ʻi he Fakamaau Fakaʻosí. Te mou lava ke lau fakataha ʻa e ngaahi tala fakatātaá pea fakaafeʻi ʻa e mēmipa takitaha ʻo e kalasí ke nau vahevahe ha fehuʻi ʻe ala fakahoko ʻe he Fakamoʻuí fekauʻaki mo ʻetau moʻuí ʻi he taimi ʻe fakamāuʻi ai kitautolú. ʻOange ha taimi ki he kau mēmipa ʻo e kalasí ke nau palani ai ha ngaahi founga te nau fakahoko ai e ngaahi ongo kuo nau maʻu ʻi he lolotonga ʻo e fealeaʻakí.
ʻĪmisifanga sipí mo e fanga kosíNaʻe fakaʻaongaʻi ʻe Kalaisi ʻa e fanga sipí mo e kosí ke akoʻi fekauʻaki mo e Fakamaau Fakaʻosí (vakai, Mātiu 25:31–33).
-
Ke kamataʻi ha fealēleaʻaki fekauʻaki mo e Mātiu 25:34–40, te ke lava ʻo fakaafeʻi e kau mēmipa ʻo e kalasí ke vahevahe ha ngaahi sīpinga ʻo e kakai ʻoku nau fakafōtunga ʻa e manavaʻofa ʻoku fakamatalaʻi ʻi he ngaahi veesi ko ʻení. Tuku ange ha taimi ke nau fakalaulauloto ai pe ko hai te ne ala fie maʻu ʻenau tokoní. Ko e hā ha ngaahi founga ʻaonga te tau lava ai ʻo fafangaʻi ʻa e fiekaiá, fakakofuʻi ʻa e telefuá, mo ʻaʻahi ki he kau mahakí?
Ngaahi Maʻuʻanga Tokoni Kehé
Ko e lolo ʻo e uluí.
Naʻe fokotuʻu mai ʻe ʻEletā Tēvita A. Petinā ʻa e ʻuhinga ko ʻení ki he tala fakatātā ʻo e kau tāupoʻou ʻe toko hongofulú:
“Fakakaukau ko e loló ko e lolo ia ʻo e uluí [vakai, Mātiu 25:4–9]. …
“Naʻe siokita nai mo taʻe fie vahevahe e kau tāupoʻou poto ʻe toko nimá, pe naʻa nau fakahā totonu pē he ʻikai lava ʻo kole ke fakaʻaongaʻi ʻa e lolo ʻo e uluí? ʻE lava nai ke foaki ki ha taha kehe ʻa e mālohi fakalaumālie ʻoku maʻu tupu mei he talangofua maʻu pē ki he ngaahi fekaú? ʻE lava nai ke foaki ʻa e ʻilo naʻe maʻu ʻi hono ako mo e fakalaulauloto fakamātoato ki he folofolá, ki ha taha ʻokú ne fie maʻu? ʻE lava nai ke ʻave ʻa e melino ʻoku ʻomi ʻe he ongoongoleleí mei ha tokotaha Siasi faivelenga ki ha taha ʻokú ne aʻusia ha ʻahiʻahi pe faingataʻa lahi? Ko e tali mahino ki he ngaahi fehuʻi takitaha ko ʻení ko e ʻikai.
“Hangē ko hono fakamamafaʻi totonu ʻe he kau tāupoʻou potó, kuo pau ke tau ‘takitaha fakatau maʻatautolu.’ Naʻe ʻikai fakamatala e kau fafine ko ʻeni ne ueʻi fakalaumālié ki ha fefakatauʻaki fakapisinisi; ka ko ʻenau fakamamafaʻi hotau fatongia fakafoʻituitui ke tauhi ke kei ulo atu ʻetau maama ʻo e fakamoʻoní mo tauhi ha lolo feʻunga ʻo e uluí. ʻOku maʻu e lolo mahuʻingá ni ko e tulutā ki he tulutā—ʻʻa e ʻotu lea ki he ʻotu lea [mo e] akonaki ki he akonaki’ (2 Nīfai 28:30), ʻi he faʻa kātaki mo e vilitaki” (“Ului ki he ʻEikí,” Liahona, Nōvema 2012,109).
Ko Hono Fakatupulaki ʻEtau Founga Akoʻí
Fakapapauʻi ʻokú ke akoʻi ʻa e tokāteline moʻoní. “Toutou fehuʻi loto pē, ʻKo e hā ha founga ʻe tokoni ai ki he kalasí e meʻa ʻoku ou akoʻí ke langaki ʻenau tui kia Kalaisí, ke nau fakatomala pea fakahoko mo tauhi ʻenau ngaahi fuakava mo e ʻOtuá pea maʻu mo e Laumālie Māʻoniʻoní?’” (Ko e Faiako ʻi he Founga ʻa e Fakamoʻuí,, 20).