“1–7 Mē. Luke 12–17; Sione 11: ‘Tau Fiefia mo Au; he Kuó U ʻIlo ʻA ʻEku Sipi ʻA Ia Naʻe Molé,’” Haʻu, ʻo Muimui ʻIate Au—Maʻá e Lautohi Faka-Sāpaté: Fuakava Foʻou 2023 (2022)
“1–7 Mē. Luke 12–17; Sione 11,” Haʻu, ʻo Muimui ʻIate Au—Maʻá e Lautohi Faka-Sāpaté: 2023
Ko e Foha Maumau Koloá, tā fakatātaaʻi ʻe Liz Lemon Swindle
1–7 Mē
Luke 12–17; Sione 11
“Tau Fiefia mo Au; he Kuó u ʻIlo ʻa ʻEku Sipi Naʻe Molé”
Kamata hoʻo teuteú ʻaki hano ako ʻi he faʻa lotu ʻa e Luke 12–17 mo e Sione 11. Ko hai ha “sipi mole” ʻokú ke fakakaukau ki ai ʻi hoʻo kalasí? Fakaʻaongaʻi ʻa e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí mo e fokotuʻutuʻu ko ʻení, ʻi hoʻo fekumi ki he fakahinohino ʻa e ʻEikí ki he founga ke feau lelei taha ai e ngaahi fiemaʻu ʻa e kau mēmipa ʻo e kalasí, neongo kapau ʻoku ʻikai ke nau omi ki he kalasí.
Fakaafeʻi e Feʻinasiʻakí
Ko hono fakaʻaongaʻí ko ha konga mahuʻinga ia ʻo e akó, ko ia ai, fakaafeʻi e kau mēmipa ʻo e kalasí ke vahevahe e founga ne nau fili ke moʻui ʻaki ha meʻa ne nau ako mei he folofolá ʻi he uike ko ʻení.
Akoʻi ʻa e Tokāteliné
ʻOku ʻikai ha ʻuhinga lelei ia ke fakasītuʻaʻi ai ʻa e ongoongoleleí.
-
Ke tokoni ke ako ʻe he kau mēmipa ʻo e kalasí e talanoa fakatātā ʻo e ʻohomohe lahí, te ke lava ʻo fakaafeʻi ke nau fakakaukauloto ki ha paati ʻokú ke fakalele (host). Tuku ke nau vahevahe ha ngaahi ʻuhinga ʻe niʻihi te nau haʻu pe ʻikai haʻu ai ki he pātí. Lau fakataha ʻa e Luke 14:15–24, pea aleaʻi e ngaahi ʻuhinga naʻe ʻomi ʻe he kakai ʻi he tala fakatātaá, ʻi he taimi naʻe fakaafeʻi ai kinautolu ki ha kātoanga ʻokú ne fakaofofongaʻi e ngaahi tāpuaki ʻo e ongoongoleleí. Ko e hā ha ngaahi ʻuhinga ʻoku ʻomi ʻe he kakaí he kuongá ni ki he ʻikai ke nau lava ʻo tali e ngaahi fakaafe ʻa e Fakamoʻuí, ke maʻu e ngaahi tāpuaki ʻa e Tamai Hēvaní? ʻE lava ke vahevahe ʻe he kau mēmipa ʻo e kalasí e ngaahi tāpuaki kuo nau maʻu ʻi he taimi ne nau fai ai e ngaahi feilaulau naʻe fie maʻu ke nau moʻui ʻaki ai ha ngaahi tefitoʻi moʻoni pau ʻo e ongoongoleleí.
Te tau lava ʻo kumi kinautolu ʻoku heé pea fiefia fakataha mo e Tamaí ʻi he taimi ʻoku nau foki mai aí.
-
Te ke ʻoange fēfē ki he kau mēmipa ʻo e kalasí ha faingamālie ke vahevahe ʻa e meʻa kuo nau ako ʻi he tala fakatātā ʻe tolu ʻi he Luke 15? Fakakaukau ke ke vahe ki he mēmipa takitaha ʻo e kalasí ha taha ʻo e ngaahi tala fakatātaá ke nau toe vakaiʻi. Te nau lava ʻo kumi mo vahevahe e ngaahi tali ki he ngaahi fehuʻi hangē ko ʻení: Ko e hā ha ngaahi foʻi lea ʻi he tala fakatātaá ʻokú ne fakahaaʻi e ongo ʻoku maʻu ʻe he Tamai Hēvaní kiate kinautolu ʻoku heé? Ko e hā ʻoku fokotuʻu mai ʻe he ngaahi tala fakatātaá fekauʻaki mo e founga ʻoku totonu ke tau tokoni ai ki he fānau kotoa ʻa e ʻOtuá? ʻE lava ke vahevahe ʻe he kau mēmipa ʻo e kalasí ʻa e founga ne maʻu ai kinautolu ʻe he Fakamoʻuí ʻi he taimi ne nau ongoʻi hē aí.
-
ʻE lava ke hoko hono hivaʻi ʻo e “ʻOku ʻOfa ʻa e Tauhí” (Ngaahi Himi, fika 128), ko ha tānaki ʻuhingamālie ki he ngaahi akonaki ʻi he ngaahi tala fakatātā ko ʻení.
-
ʻI hoʻomou toe vakaiʻi fakataha ʻa e tala fakatātā ʻo e foha maumau koloá, ʻe ala ʻaonga ki he kau mēmipa ʻo e kalasí ha tukutaha ʻenau tokangá ʻi he ngaahi lea, ngāue, mo e tui ʻa e tokotaha takitaha ʻi he tala fakatātaá. Ko e hā ʻoku tau ako mei he tokotaha takitaha? ʻE lava ke faʻu ʻe he kau akó ha fakaʻosinga kehe ʻo e talanoa fakatātaá ʻoku kehe ai e tōʻonga ʻa e foha lahí ki hono tehiná. Ko e hā ʻoku faleʻi mai ʻe he tamai ʻi he talanoa fakatātaá, fekauʻaki mo e ongo ʻoku totonu ke tau maʻu kiate kinautolu ʻoku molé mo kinautolu ʻoku foki mai ki he ongoongoleleí? (Vakai foki, fakamatala ʻa ʻEletā Sefilī R. Hōlani ʻi he “Ngaahi Maʻuʻanga Tokoni Kehé.”) Pe te ke kole ki he kau mēmipa ʻo e kalasí ke nau fakakaukauloto ko kinautolu ʻa e tamai ʻi he talanoa fakatātā ko ʻení. Ko e hā ha faleʻi kehe te ke ʻoange ki he foha lahí ke tokoni ke fiefia ʻi he fakalakalaka mo e lavameʻa ʻa e niʻihi kehé?
Te u ofi ange ki he ʻOtuá ʻi heʻeku houngaʻia ʻi hoku ngaahi tāpuakí.
-
Fakaafeʻi e kau mēmipa ʻo e kalasí ke nau vahevahe e meʻa ne nau ako fekauʻaki mo e loto-houngaʻiá mei heʻenau ako e Luke 17:11–19. Naʻe tāpuekina fēfē ʻa e tangata kilia ne loto-fakafetaʻí ʻi heʻene fakahaaʻi ʻene houngaʻiá? ʻOku faitāpuekina fēfē kitautolu ʻi heʻetau fakahaaʻi ʻetau houngaʻiá? ʻE lava ke fokotuʻu mai ʻe he kau mēmipa ʻo e kalasí ha ngaahi founga te tau lava ai ʻo fakahaaʻi ʻetau houngaʻia ki he ʻOtuá mo e niʻihi kehé.
Ko Sīsū Kalaisi ʻa e Toetuʻú mo e Moʻuí.
-
Ko ha founga ʻe taha ke vakavakaiʻi ai e Sione 11:1–46 ko e kole ki he kau mēmipa ʻo e kalasí ke nau taufetongi ʻi hono lau e ngaahi vēsí, pea fakaafeʻi kinautolu ke taʻofi ʻenau laú ʻi he taimi ʻoku nau maʻu ai ha fakamoʻoni ʻo e tui kia Sīsū Kalaisí. Te ke lava foki ʻo kole ki he kau mēmipa ʻo e kalasí ke nau fakakaukau ki he ngaahi fakakaukau ʻa e kakai naʻe kau aí—kau ai ʻa e Fakamoʻuí, kau ʻAposetoló, Māʻata, Mele, mo Lāsalosi. Ko e hā te tau lava ʻo ako meiate kinautolu takitaha? Mahalo naʻa lava ke vahevahe ʻe he kau mēmipa ʻo e kalasí ha ngaahi aʻusia naʻe fakamālohia ai ʻenau tui kia Sīsū Kalaisí he lolotonga ha ʻahiʻahi.
Ngaahi Maʻuʻanga Tokoni Kehé
Ko e ako mei he maumau koloa ʻe tahá.
Naʻe fai ʻe ʻEletā Sefilī R. Hōlani ʻa e fakamatala ko ʻení fekauʻaki mo e tokoua lahi ʻo e foha maumau koloá: “ʻOku ʻikai ke fuʻu ʻita lahi ʻa e foha ko ʻení ʻi he foki mai ʻa e foha ʻe tahá ki ʻapí, ʻo hangē ko ʻene ʻita ʻi he fuʻu fiefia ai ʻa ʻene ongomātuʻá. … Kuo teʻeki ke ne maʻu ʻa e manavaʻofa mo e ʻaloʻofa, ʻa e angaʻofa lahi ke ʻiloʻi ʻoku ʻikai ko ha foki mai ʻeni ʻo ha fili. Ko hono tehiná ia. Hangē ko e kole kiate ia ʻene tamaí ke ne ʻiloʻí, ko ia naʻe maté kuo toe moʻui. Ko ia naʻe molé kuo toe maʻu” (“The Other Prodigal,” Ensign, May 2002, 63).
Ko e Fakatupulaki ʻEtau Founga Akoʻí
Tokoniʻi ʻa e toko tahá. Hangē ko e tauhisipi ʻi he tala fakatātā ʻa e Fakamoʻuí (vakai, Luke 15:4), “te ke lava ʻo tokoni kiate kinautolu ʻoku ʻikai maʻu kalasí. Ko ho ngaahi faingamālie ko ia ke akoʻi mo hiki hake e kau mēmipa hoʻo kalasí pea tokoni ke nau haʻu kia Kalaisí, ʻoku mahulu atu ia ʻi lokiako pea mo kinautolu ʻoku kau mai ki hoʻo ngaahi lēsoní” (Ko e Faiako ‘i he Founga ‘a e Fakamo‘uí, 8).