“5–11 Jun. Jon 14–17: ‘Oltaem Yufala I Mas Joen Gud long Mi blong Mi Mi Save Lavem Yufala Olwe,’” Kam Folem Mi—Blong Sandei Skul: Niu Testeman 2023 (2022)
“5–11 Jun. Jon 14–17,” Kam Folem Mi—Blong Sandei Skul: 2023
Las Sapa, i kam long William Henry Margetson
5–11 Jun
Jon 14–17
“Oltaem Yufala I Mas Joen Gud long Mi blong Mi Mi Save Lavem Yufala Olwe”
Taem yu stap stadi wetem prea long Jon 14–17, tingting hevi long olsem wanem yu save soem lav long olgeta we yu stap tijim olgeta. Tabu Spirit bae i tekem i kam long maen blong yu ol aedia taem yu stap stadi long ol skripja, Kam Folem Mi—Blong Wanwan Man, Woman mo Famli, mo long aotlaen ia.
Invaetem Ol Memba blong Serem Wanem Oli Gat
Raetem ol namba ia 14 kasem 17 long bod, we i ripresentem ol japta long buk blong Jon we ol klas memba oli ridim long wik ia. Askem ol memba blong klas blong raetem long saed blong wanwan namba blong japta, sam toktok blong ol ves we Tabu Spirit i bin helpem olgeta blong andastanem gud moa o we oli laekem blong toktok raon long hem olsem wan klas.
Stap Tijim Doktrin
Tabu Spirit i helpem yumi fufilim stamba tingting blong yumi olsem ol disaepol blong Jisas Kraes.
-
Blong helpem ol memba blong klas oli andastanem ol defdefren wok blong Tabu Spirit, invaetem olgeta blong ridim wan o moa long ol ves we i stap ia: Jon 14:16–27; 15:26; mo 16:7–15. Oli save raetem long bod wanem oli lanem abaot Tabu Spirit long ol ves ia. Oli save lukaotem tu ol niu tingting abaot Tabu Spirit insaed long ol skripja mo ol mesej we oli raetemdaon i stap long “Sam Moa Risos.” ?Olsem wanem nao Tabu Spirit i mekem i hapen ol wok ia long laef blong yumi? Maet yu save tingting blong karem i kam long klas sam samting blong lukluk o samting blong wok long hem, blong helpem ol memba blong klas blong andastanem sam long ol wok ia.
-
Tingting blong invaetem sam long ol memba blong klas bifo taem blong klas, blong stadi wan long ol toktok blong konfrens we i stap long “Sam Moa Risos” (o wan nara konfrens toktok we oli save long hem) we i tokbaot Tabu Spirit. Askem olgeta blong serem smol wanem oli lanem wetem klas. ?Wanem nao ol mesej ia oli ademap long wanem yumi bin lanem abaot Tabu Spirit long Jon 14–16?
Las Sapa, i kam long Clark Kelley Price
Taem yumi joen long Kraes, bae yumi karem ol gudfala frut mo stap glad.
-
Tingting blong karem i kam long klas wan smol plant (o wan pikja blong wan) mo yusum blong helpem ol memba blong klas blong luk tijing blong Sevya abaot rop mo ol branj. Afta we yu ridim Jon 15:1–12 olsem wan klas, yufala i save toktok raon long wanem i minim blong joen long Kraes” (Jon 15:4). Sam long ol memba blong klas oli save serem olsem wanem oli faenemaot se Jon 15:5 i tru. (Luk tu long toktok we i kam long Elda Jeffrey R. Holland long “Sam Moa Risos.”)
Papa long Heven mo Jisas Kraes tufala i yunaet gud.
-
Maet yu no save tijim evri impoten trutok we yu save faenem long Jon 17 long wan storian long klas, be hemia wan wei blong helpem klas blong save faenemaot sam long olgeta. Raetem wan lis long bod blong ol stamba toktok we i stap long Jon 17, olsem olgeta ia:
-
Rilesensip blong yumi wetem Jisas Kraes
-
Rilesensip blong Jisas Kraes wetem Papa blong Hem
-
Rilesensip blong yumi wetem narafala haf blong wol
-
Rilesensip blong yumi wetem wanwan long yumi olsem ol disaepol blong Hem
Invaetem wanwan memba blong klas blong jusum wan long ol stamba toktok ia mo ridim Jon 17, blong lukaotem ves we i go wetem stamba toktok ia. Askem sam long ol memba blong klas blong serem wanem oli lanem.
?Olsem wanem rilesensip blong yumi wetem God i wok, wetem rilesensip we yumi gat wetem wanwan long yumi? ?Olsem wanem rilesensip we yumi gat wetem wanwan long yumi, i soem rilesensip we yumi gat wetem God?
-
Sam Moa Risos
Tabu Spirit.
-
Wok 2:37–38; Galesia 5:22–23; 1 Nifae 10:17–19; 2 Nifae 32:3–5; Mosaea 3:19; 3 Nifae 27:20; Moronae 8:26; 10:4–5; Doktrin mo Kavenan 8:2–3; 42:17
-
Henry B. Eyring, “His Spirit to Be with You,” Liahona, May 2018, 86–89
-
David A. Bednar, “Receive the Holy Ghost,” Liahona, Nov. 2010, 94–97
-
Michelle D. Craig, “Spiritual Capacity,” Liahona, Nov. 2019, 19–21
Joen long Kraes
Toktok ia joen we yumi yusum long ples ia i tekem ples blong wan Inglis toktok we i “abide” toktok ia i minim komitmen mo blong oltaem, Elda Jeffrey R. Holland i bin tijim :
“Sens blong [toktok] ia hem i ‘stap—be stap blong oltaem.’ … Kam, be kam blong stap. Kam wetem tru save mo stap strong. …
“Jisas i talem, ‘Sipos yufala i no joen gud long mi, yufala i no save mekem wan samting nating’ [Jon 15:5]. Mi testifae se Hemia i trutok blong God. Kraes i evri samting long yumi mo yumi mas ‘joen’ long Hem blong oltaem. Blong yumi karem gud frut blong gospel ia blong blesem laef blong yumi, yumi mas fasem gud yumi wetem Hem, Sevya blong yumi evriwan, mo long Jos blong Hem, we i tekem tabu nem blong Hem. Hem i vaen we i tru stamba blong paoa mo wan stamba ia nomo blong laef we i no save finis. Long Hem bae yumi no stap strong nomo be bae yumi win long tabu wok ia we bae i neva save letem yumi daon” (“Abide in Me,” Liahona, May 2004, 32).
Kam Antap long Fasin blong Yumi blong Stap Tij
Stap Invaetem Spirit. “Yumi save stap ol tul long han blong God blong helpem ol pikinini blong Hem lan tru long Spirit. Blong mekem hemia, yumi invaetem paoa blong spirit i kam long laef blong yumi mo leftemap tingting blong olgeta we yumi stap tijim blong mekem semmak. … Tabu miusik, ol skripja, ol toktok blong ol profet blong las dei, seremaot lav mo testemoni, mo taem blong stap kwaet mo tingting dip evri samting ia i invaetem Spirit blong kam” (Teaching in the Savior’s Way, 10).