Getsemane Bus, i kam long Derek Hegsted

12–18 Jun

Luk 22; Jon 18

“I No Olsem Tingting blong Mi, Be Mekem Olsem Tingting blong Yu Nomo”

Tingting long wanem blong mekem blong invaetem Spirit i kam long klas blong yu taem yu stap tokbaot ol tabu samting we oli stap hapen long ol japta ia. Wetem prea lukaotem blong helpem ol memba blong klas blong mekem lav mo fet blong olgeta long Sevya i i kam moa bigwan.

Invaetem Ol Memba blong Serem Wanem Oli Gat

Leftemap tingting blong ol memba blong klas blong oli serem wanem we oli filim, we Lod i wantem olgeta blong lanem aot long ol ves ia.

Stap Tijim Doktrin

Luk 22:39–46

Yumi kam moa olsem Kraes taem yumi jusum blong putum evri tingting blong yumi folem tingting blong Papa.

• Eksampol blong Sevya blong putum tingting blong hem blong folem tingting blong Papa i save helpem ol memba blong klas blong yu taem bae oli nidim blong mekem semmak. Blong statem wan storian, yu save invaetem ol memba blong klas blong serem ol eksperiens blong olgeta abaot, taem we oli givim olgeta long samting we oli save se God i wantem olgeta blong mekem. Askem olgeta blong serem olsem wanem oli save se God i wantem olgeta blong mekem mo olsem wanem God i blesem olgeta from mekem samting folem tingting blong Hem. Invaetem Klas blong rid long Luk 22:39–46 mo tokbaot from wanem Sevya i wantem blong mekem samting folem tingting blong Papa blong Hem. ?Olsem wanem nao yumi save folem eksampol blong Sevya?

• Antap long fasin blong Sevya we i stap lisin long God long Luk 22:42, wanem nara eksampol blong hem blong stap lisin we yumi faenem long Luk 22 mo Jon 18? ?Olsem wanem nao Sevya i mekem i hapen evri wok blong Papa blong Hem long taem blong laef blong Hem long wol ia? ?Bae yumi mekem wanem blong kam moa olsem hem? Toktok blong Elda Neal A. Maxwell long “Sam Moa Risos” i maet help blong givim insperesen long ol memba blong klas blong tingting long olsem wanem oli save givim wil blong olgeta long wil blong God.

Luk 22:39–46

Jisas Kraes i mekem wan Atonmen blong yumi we i no gat en.

• Luk 22:39–46 i tokbaot wanem i bin tekem ples long Getsemane. Blong helpem ol memba blong klas blong oli andastanem mining blong tabu taem ia, maet bae yu raetem long bod ol kwestin olsem ?Wanem i hapen long Getsemane? mo ?From wanem i impoten long mi? Ol memba blong klas oli save faenem ansa long Luk 22:39–46; Alma 7:11–13; Doktrin mo Kavenan 19:16–19; mo vidio “The Savior Suffers in Gethsemane” (ChurchofJesusChrist.org). Oli save faenem ansa tu long mesej blong Presiden Tad R. Callister “Atonmen blong Jisas Kraes” (Liahona, May 2019, 85–87)

• Long Buk blong Momon, Jekob i singaotem Atonmen blong Jisas Kraes “wan atonmen we i no gat en” (2 Nifae 9:7). Blong helpem ol memba blong klas andastanem wanem mining blong toktok ia, yu save serem tijing blong Presiden Russell M. Nelson long “Sam Moa Risos” mo askem ol memba blong klas blong mekem wan lis blong ol wei we i mekem se sakrifaes blong Sevya i no gat en. Oli save ridim ol skripja ia tu mo ademap long lis blong olgeta: Hibru10:10; Alma 34:10–14; Doktrin mo Ol Kavenan 76:24; mo Moses 1:33. ?Olsem wanem yumi save soem se yumi glad long wanem we Sevya i mekem blong yumi?

Peter’s Denial [Pita I Talem Se Hem I NO Save Jisas], i kam long Carl Heinrich Bloch

Luk 22:54–62

Yumi save stap fetful long Jisas Kraes nomata long ol fraet o ol wiknes blong yumi.

• Blong helpem ol memba blong klas i luk sam samting we i tekples long Luk 22:54–62, yu maet soem wan pikja, olsem, Peter’s Denial [Pita I Talem Se Hem I NO Save Jisas] (ChurchofJesusChrist.org), o vidio ia “Jesus Is Tried by Caiaphas, Peter Denies Knowing Him” (ChurchofJesusChrist.org). Ol memba blong klas oli save serem wanem oli lanem long ol eksperiens blong Pita we i givim insperesen long olgeta blong stap fetful long Jisas Kraes.

Sam Moa Risos

Stap biaen long evri samting we Papa i tingting blong putum long yumi.

Elda Neal A. Maxwell i bin tijim: “Taem yu stap biaen long evri samting we God i tingting blong putum long yu, yu stap givim long Hem wan samting we yu nomo yu save givim long Hem we i blong yuwan blong givim. Yu no stap wet longtaem blong faenem olta o blong stat blong putum presen blong wil blong yu long hem!” (“Remember How Merciful the Lord Hath Been,” Liahona, May 2004, 46).

Atonmen we i no gat en.

Presiden Russell M. Nelson i tijim:

“Atonmen blong [Jisas Kraes] i no gat en. I no gat en tu from se evriwan bae oli sef aot long ded ia we i no gat en. I no gat en from bigfala harem nogud blong Hem. I no gat en from taem i no gat en, i putum wan en long fasin blong mekem animol sakrifaes. I no gat en from bae i mas hapen wan taem nomo blong oltaem. Mo bigfala sore blong Atonmen i no kasem nomo namba blong pipol we i no gat en, be tu namba blong ol wol we Hem i krietem we i no gat en. I no gat en bitim we man i save mesarem o wan we i save ded i andastanem.

“Jisas i wan man ia nomo we i save mekem atonmen ia we i no gat en, from se Hem i bon long wan mama we i save ded mo wan Papa we i no save ded. From raet ia we i kasem long Papa mo mama blong Hem, Jisas i bin wan Man we i no gat en” (“The Atonement,” Ensign, Nov. 1996, 35).

Kam Antap long Fasin blong Yumi blong Stap Tij

Stap wan tul blong Spirit, we yu gat tingting i stap daon. “Stamba tingting blong yu, olsem wan tija, i no blong mekem wan gudfala presentesen, be i blong helpem ol narawan blong filim paoa blong Tabu Spirit we i lidim olgeta—Tabu Spirit ia we i tru tija” (Teaching in the Savior’s Way, 10).