The Last Supper [Ang Kataposang Panihapon], ni William Henry Margetson

Hunyo 5–11

Juan 14–17

“Pabilin Kamo sa Akong Gugma”

Samtang ikaw mainampoong magtuon sa Juan 14–17, pamalandonga kon unsaon nimo nga labing mapakita ang gugma ngadto niadtong imong gitudloan. Ang Espiritu Santo modala og mga ideya sa imong hunahuna samtang magtuon ka sa mga kasulatan, Dali, Sunod Kanako—Alang sa mga Indibidwal ug mga Pamilya, ug niining latid.

Dapita ang Pagpaambit

Isulat ang mga numero nga 14 hangtod 17 diha sa pisara, nga magrepresentar sa mga kapitulo sa Juan nga gibasa sa mga sakop sa klase karong semanaha. Dapita ang pipila ka sakop sa klase sa pagsulat, tupad sa matag numero sa kapitulo, sa pakisayran sa usa ka bersikulo diin ang Espiritu Santo mitabang kanila nga mas makasabot o nga gusto nilang hisgotan isip usa ka klase.

Itudlo ang Doktrina

Juan 14:16–27; 15:26; 16:7–15

Ang Espiritu Santo motabang kanato nga makatuman sa atong katuyoan isip mga disipulo ni Jesukristo.

• Aron matabangan ang mga sakop sa klase nga makakat-on mahitungod sa lain-laing mga tahas sa Espiritu Santo, ikonsiderar ang pagdapit kanila sa pagbasa og usa o dugang pa sa mosunod nga mga tudling: Juan 14:16–27; 15:26; ug 16:7–15. Mahimo nilang isulat diha sa pisara kon unsa ang ilang nakat-onan mahitungod sa Espiritu Santo gikan niining mga tudling. Makapangita usab sila og mga ideya mahitungod sa Espiritu Santo diha sa mga kasulatan ug mga mensahe nga nalista diha sa “Dugang nga mga Kapanguhaan.” Sa unsa nga paagi nga ang Espiritu Santo nakatuman niini nga mga tahas sa atong kinabuhi? Tingali maghunahuna usab ka og mga butang o biswal nga tabang nga imong madala sa klase aron matabangan ang mga sakop sa klase nga makasabot sa uban niining mga tahas.

• Ikonsiderar ang pagdapit daan og pipila ka sakop sa klase nga magtuon sa usa sa mga pakigpulong sa kinatibuk-ang komperensiya nga gisugyot diha sa “Dugang nga mga Kapanguhaan” (o sa ubang mga pakigpulong sa komperensiya nga ilang nahibaloan) mahitungod sa Espiritu Santo. Tugoti sila nga mopakigbahin og kadali kon unsay ilang nakat-onan sa klase. Unsa ang gikadugang niining mga mensahe ngadto sa unsay atong nakat-onan mahitungod sa Espiritu Santo gikan sa Juan 14–16?

Ang Kataposang Panihapon,, ni Clark Kelley Price

Juan 15:1–12

Kon magpabilin kita diha ni Kristo, magmabungahon kita ug makabaton ug makaangkon og hingpit nga kalipay.

• Ikonsiderar ang pagdala og gamayng tanom (o usa ka litrato sa tanom) ngadto sa klase ug gamiton kini sa pagtabang sa mga sakop sa klase nga mapanglantawan ang pagtulon-an sa Manluluwas mahitungod sa punoan sa paras ug mga sanga. Human sa pagbasa sa Juan 15:1–12 isip usa ka klase, mahimo nimong hisgotan kon unsay gipasabot sa “pabilin kamo [kang Kristo]” (Juan 15:4). Mahimo nimong dapiton ang pipila ka sakop sa klase sa pagpaambit kon giunsa nila sa pagsuta ang Juan 15:5 nga tinuod. (Tan-awa usab sa pamahayag gikan ni Elder Jeffrey R. Holland diha sa “Dugang nga mga Kapanguhaan.”)

Juan 17

Ang Langitnong Amahan ug si Jesukristo hingpit nga nagkahiusa.

• Tingali dili nimo matudlo ang tanang importante nga mga kamatuoran nga makita sa Juan 17 sa usa ka panaghisgotan sa klase, apan ania ang usa ka paagi nga matabangan ang klase sa pagsuhid sa pipila niini. Ilista diha sa pisara ang mga konsepto gikan sa Juan 17, sama niini:

  • Ang atong relasyon ngadto ni Jesukristo

  • Ang relasyon ni Jesukristo ngadto sa Iyang Amahan

  • Ang atong relasyon ngadto sa tibuok kalibotan

  • Ang atong relasyon ngadto sa usag usa isip Iyang mga disipulo

  Dapita ang matag sakop sa klase sa pagpili og usa niining mga konsepto ug sa pagbasa sa Juan 17, nga mangita og mga bersikulo nga may kalabotan niini. Hangyoa ang pipila ka sakop sa klase sa pagpaambit kon unsa ang ilang nakat-onan.

  Sa unsa nga paagi nga ang atong relasyon sa Dios makaapekto sa atong relasyon sa usag usa? Sa unsa nga paagi nga ang atong relasyon sa usag usa makaapekto sa atong relasyon sa Dios?

Dugang nga mga Kapanguhaan

Ang Espiritu Santo.

• Mga Buhat 2:37–38; Mga Taga-Galatia 5:22–23; 1 Nephi 10:17–19; 2 Nephi 32:3–5; Mosiah 3:19; 3 Nephi 27:20; Moroni 8:26; 10:4–5; Doktrina ug mga Pakigsaad 8:2–3; 42:17

• Henry B. Eyring, “Ang Iyang Espiritu Magauban Kaninyo,” Liahona, Mayo 2018, 86–89

• David A. Bednar, “Dawata ang Espiritu Santo Liahona, Nob. 2010, 94–97

• Michelle D. Craig, “Espirituhanong Kapasidad,” Liahona, Nob. 2019, 19–21

Pagpabilin kang Kristo.

Nahinumdom nga ang pulong nga pabilin adunay gipasabot sa kapermanente ug pasalig [commitment], si Elder Jeffrey R. Holland nagtudlo:

“Nan ang buot ipasabot niining [pulong] mao ang ‘pagpuyo—apan mopuyo sa kahangt[o]ran.’ … Duol, apan moduol aron magpabilin. Duol uban sa konbiksyon ug paglahutay. …

“Si Jesus miingon, ‘kon wala ako, wala kamoy mahimo’ [Juan 15:5]. Ako mopamatuod nga mao kana ang kamatuoran sa Dios. Si Kristo mao ang tanan kanato ug kita gayod ‘magpabilin’ diha Kaniya sa kanunay, dili matar[o]g, makanunayon, sa kahangtoran. Kay aron ang bunga sa ebanghelyo mamulak ug mopanalangin sa atong kinabuhi, kita kinahanglan gay[o]d nga lig-ong magkupot Kaniya, ang Manluluwas kanatong tanan, ug niining Iyang Simbahan, diin nagdala sa Iyang balaan nga ngalan. Siya ang tinuod nga punoan nga parras nga mao ang atong tinuod nga tinubdan sa kalig-on ug ang mao lamang nga tinubdan sa kinabuhing dayon. Diha Kaniya dili lamang kita molahutay apan usab mopatigbabaw ug magmadaogon niining balaanong kawsa nga dili gayod mopakyas kanato” (“Pabilin Kanako,” Liahona, Mayo 2004, 32).

Pagpalambo sa Atong Pagtudlo

Dapita ang Espiritu. “Apan kita mahimong mga instrumento sa mga kamot sa Dios aron sa pagtabang sa Iyang mga anak nga makakat-on pinaagi sa Espiritu. Sa pagbuhat niini, kita nagdapit sa impluwens[i]ya sa Espiritu diha sa atong mga kinabuhi ug nag-awhag niadtong atong gitudloan sa pagbuhat sa ingon. … Ang sagrado nga musika, ang mga kasulatan, mga pulong sa mga propeta sa ulahing mga adlaw, mga pagpahayag sa gugma ug pagpamatuod, ug mga panahon sa hilom nga pagpamalandong tanan makadapit sa presens[i]ya sa Espiritu” (Pagtudlo sumala sa Pamaagi sa Manluluwas, 10).