“Hunyo 12–18. Lucas 22; Juan 18: ‘Dili ang Akong Pagbuot Kondili ang Imo Maoy Matuman’” Dali, Sunod Kanako—Alang sa Sunday School: Bag-ong Tugon 2023 (2022)
“Hunyo 12–18. Lucas 22; Mateo 18,” Dali, Sunod Kanako—Alang sa Sunday School: 2023
Gethsemane Grove [Kakahoyan sa Getsemani], ni Derek Hegsted
Hunyo 12–18
Lucas 22; Juan 18
“Dili ang Akong Pagbuot Maoy Matuman kondili ang Imo”
Ikonsiderar kon unsa ang imong buhaton aron madapit ang Espiritu ngadto sa imong klase samtang maghisgot kamo sa sagradong mga panghitabo niining mga kapitulo. Mainampoon nga mangita og mga paagi sa pagtabang sa sakop sa klase aron mapalawman ang ilang gugma alang sa Manluluwas ug ang ilang hugot nga pagtuo diha Kaniya.
Dapita ang Pagpaambit
Dapita ang pipila ka mga sakop sa klase sa pagpaambit kon unsa ang ilang gibati samtang sila nagbasa niing semanaha ug unsa nga mga bersikulo ang nakatabang nila nga mobati niining paagiha.
Itudlo ang Doktrina
Kita mahimong mas mahisama ni Kristo kon atong itugyan ang atong kabubut-on ngadto sa Amahan.
-
Ang ehemplo sa Manluluwas sa pagtugyan ngadto sa kabubut-on sa Amahan makatabang sa mga sakop sa imong klase kon kinahanglan nilang mobuhat sa samang butang. Aron sa pagsugod og usa ka panaghisgotan, mahimo nimong dapiton ang matag sakop sa klase sa pagpaambit og panahon sa dihang gitugyan nila ang ilang kaugalingon ngadto sa butang nga ilang nahibaloan nga gusto sa Dios nga ilang buhaton. Hangyoa sila sa pagpaambit kon sa unsang paagi nga ilang nahibaloan kon unsa ang gusto sa Dios nga ilang buhaton ug kon sa unsang paagi sila napanalanginan tungod sa pagtugyan ngadto sa Iyang kabubut-on. Dapita ang klase sa pagbasa sa Lucas 22:39–46 ug hisgoti kon nganong ang Manluluwas andam sa pagtugyan sa Iyang kabubut-on ngadto sa kabubut-on sa Iyang Amahan. Unsaon nato pagsunod ang ehemplo sa Manluluwas?
-
Agig dugang ngadto sa buhat sa Manluluwas sa pagtugyan ngadto sa Dios diha sa Lucas 22:42, unsa ang ubang mga ehemplo sa Iyang pagkamatugyanon ang atong makit-an diha sa Lucas 22 ug Juan 18? Giunsa sa Manluluwas sa pagtugyan ngadto sa kabubut-on sa Iyang Amahan sa tibuok Niyang kinabuhi? Unsa ang atong buhaton aron mahimong mas mahisama Kaniya? Ang pamahayag gikan ni Elder Neal A. Maxwell sa “Dugang nga mga Kapanguhaan” nga lagmit makadasig sa mga sakop sa klase sa pagkonsiderar kon unsaon nila sa pagtugyan sa ilang kabubut-on ngadto sa Dios.
Si Jesukristo mipahigayon og walay kinutoban nga Pag-ula alang kanato.
-
Ang Lucas 22:39–46 naghulagway sa unsay nahitabo didto sa Getsemani. Aron matabangan ang mga sakop sa klase, nga masabtan ang personal nga kamakahuloganon niining sagradong panghitabo, tingali mahimo nimong isulat diha sa pisara ang mga pangutana sama sa Unsay nahitabo didto sa Getsemani? ug Nganong importante man kini ngari nako? Ang mga sakop sa klase mahimong makapangita og mga tubag diha sa Lucas 22:39–46; Alma 7:11–13; Doktrina ug mga Pakigsaad 19:16–19. Makapangita usab sila og mga tubag diha sa mensahe ni Presidente Tad R. Callister “Ang Pag-ula ni Jesukristo” (Liahona, Mayo 2019, 85–87).
-
Diha sa Basahon ni Mormon, gitawag ni Jacob ang Pag-ula ni Jesukristo nga “walay kinut[o]ban nga pag-ula” (2 Nephi 9:7). Aron matabangan ang mga sakop sa klase nga makasabot kon unsay kahulogan niini, mahimo nimong ipakigbahin ang mga pagtulon-an ni Presidente Russell M. Nelson diha sa “Dugang nga mga Kapanguhaan” ug hangyoa ang mga sakop sa klase sa paglista og mga paagi nga ang impluwensiya sa sakripisyo sa Manluluwas gikonsiderar nga walay kinutoban. Mahimo usab nilang basahon ang mosunod nga mga kasulatan ug idugang diha sa ilang lista: Mga Hebreohanon 10:10; Alma 34:10–14; Doktrina ug mga Pakigsaad 76:24; ug Moises 1:33. Unsaon man nato sa pagpakita sa atong pasalamat sa unsay nahimo sa Manluluwas alang kanato?
Peter’s Denial [Ang Paglimod ni Pedro], ni Carl Heinrich Bloch
Kita mahimong magmatinud-anon ngadto ni Jesukristo bisan pa man sa atong mga kahadlok ug mga kahuyang.
-
Aron matabangan ang mga sakop sa klase nga mapanglantawan ang mga panghitabo diha sa Lucas 22:54–62, tingali imong ipakita ang usa ka hulagway, sama sa Paglimod ni Pedro (ChurchofJesusChrist.org). Ang mga sakop sa klase mahimong makapaambit unsa ang ilang nakat-onan gikan sa mga kasinatian ni Pedro nga nakapadasig kanila nga mamahimong matinud-anon ngadto ni Jesukristo.
Dugang nga mga Kapanguhaan
Pagtugyan sa atong kabubut-on ngadto sa Amahan.
Si Elder Neal A. Maxwell nagtudlo: “Kon itugyan ninyo ang inyong kabubut-on ngadto sa Dios, inyong gihatag Kaniya ang bugtong butang nga inyoha gayod nga mahatag Kaniya nga matawag og inyo gayod. Ayaw dugaya ang pagpangita sa altar o pagsugod sa pagbutang sa gasa gikan sa inyong kabubut-on diha niini!” (“Remember How Merciful the Lord Hath Been,” Liahona, Mayo 2004, 46).
Ang walay kinutoban nga Pag-ula.
Si Presidente Russell M. Nelson nagtudlo:
“Ang Pag-ula [ni Jesukristo] walay kinutoban—walay kataposan. Kadto usab walay kinutoban diin ang tanang katawhan maluwas gikan sa walay kataposan nga kamatayon. Kadto walay kinutoban kon hisgotan ang hilabihan Niya nga pag-antos. Kadto walay kinutoban sa panahon, nga mitapos sa nag-una nga sundanan sa pagsakripisyo og hayop. Kadto walay kinutoban sa gidak-on—kinahanglan kadtong pagahimoon gayod. Ug ang grasya sa Pag-ula molugway dili lamang sa walay kinutobang gidaghanon sa katawhan, apan ngadto usab sa walay kinutobang gidaghanon sa mga kalibotan nga Iyang gilalang. Kadto walay kinutoban sa bisan unsang tawhanong pangsukod o mortal nga panabot.
“Si Jesus lamang ang makahalad sa ingon nianang walay kinutoban nga pag-ula, gumikan kay gipakatawo Siya sa mortal nga inahan ug imortal nga Amahan. Tungod nianang talagsaong katungod sa pagkatawo, si Jesus usa ka walay kinutoban nga Nilalang” (“The Atonement,” Ensign, Nob. 1996, 35).
Pagpalambo sa Atong Pagtudlo
Magmahimong mapaubsanon nga instrumento sa Espiritu. “Ang imong katuyoan isip usa ka magtutudlo dili ang paghimo og impresibo nga presentasyon apan sa pagtabang sa uban nga modawat sa impluwensiya sa Espiritu Santo, kinsa mao ang tinuod nga magtutudlo” (Pagtudlo sumala sa Pamaagi sa Manluluwas, 10).